𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴦𐴡𐴙𐴕 𐴊𐴤𐴡𐴌𐴞 𐴰 𐴵 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴎𐴡𐴓𐴞 𐴒𐴞𐴘𐴥𐴡𐴘 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴦𐴡𐴙𐴕 𐴊𐴤𐴡𐴙𐴅𐴧𐴙𐴠 𐴱 𐴒𐴡𐴃𐴡 𐴈𐴝𐴓𐴞𐴘𐴝 𐴐𐴤𐴡𐴕𐴞 𐴁𐴝𐴌 𐴒𐴡𐴃𐴡 𐴌𐴝𐴙𐴃𐴡𐴃 𐴀𐴡𐴕𐴟𐴔𐴝𐴕𐴞𐴑 𐴰 𐴲 : 𐴲 𐴰 𐴊𐴟𐴘 𐴁𐴝𐴎𐴠 𐴑𐴟𐴌𐴞 𐴔𐴞𐴓𐴥𐴡𐴃𐴡𐴃 , 𐴁𐴝𐴓𐴟 𐴈𐴥𐴝𐴓𐴞 𐴱 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 ( 𐴀𐴞 ) 𐴁𐴡𐴓𐴡𐴑𐴡𐴃 𐴀𐴠 𐴀𐴦𐴡𐴙𐴕𐴡𐴌 𐴒𐴤𐴡𐴄𐴡𐴕𐴝 𐴒𐴤𐴡𐴙𐴄𐴧𐴙𐴠 𐴊𐴠 𐴱 𐴎𐴠 𐴒𐴤𐴡𐴄𐴡𐴕𐴝𐴃 𐴰 𐴵 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴎𐴡𐴓𐴞 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 , 𐴀𐴦𐴡𐴙𐴕 𐴕𐴞𐴉𐴥𐴝 𐴉𐴟𐴓𐴞𐴐𐴡𐴌 𐴃𐴞𐴕 𐴋𐴝𐴀𐴝𐴘 𐴘𐴠 𐴂𐴠𐴌𐴝𐴘 𐴰 𐴳 𐴔𐴞𐴓𐴥𐴡𐴄 𐴉𐴡𐴙𐴅𐴧𐴡𐴕𐴃𐴡 𐴏𐴠𐴐𐴄𐴝 𐴒𐴡𐴌𐴥𐴞 𐴀𐴦𐴡𐴙𐴕 𐴑𐴝𐴁𐴟 𐴒𐴡𐴌𐴥𐴞 𐴉𐴝𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴈𐴥𐴡𐴘 𐴈𐴥𐴡𐴃𐴤𐴞 𐴑𐴞 𐴀𐴥𐴡𐴘𐴧𐴠 𐴎𐴝𐴕𐴝 𐴕𐴥𐴡 𐴎𐴝𐴀𐴝 𐴱𐴱

𐴒𐴤𐴡𐴄𐴡𐴕𐴝 𐴏𐴥𐴡𐴀𐴞 𐴁𐴡𐴓𐴞 𐴀𐴟𐴑𐴤𐴞𐴘𐴝 𐴀𐴦𐴡𐴙𐴕 𐴕𐴞𐴉𐴥𐴝 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴀𐴡𐴉𐴥𐴞𐴏𐴝𐴌 / 𐴐𐴡𐴉𐴞𐴑𐴟𐴓 𐴀𐴞𐴏𐴓𐴝𐴔𐴠 𐴈𐴥𐴡𐴁𐴡𐴌 𐴀𐴠𐴅𐴤𐴠𐴕𐴏𐴞 𐴌𐴠 𐴈𐴡𐴘𐴧𐴠𐴊𐴠 ! 𐴀𐴦𐴡𐴙𐴕 𐴊𐴤𐴡𐴌𐴝𐴌 𐴈𐴥𐴡𐴁𐴡𐴌 𐴉𐴝𐴘 𐴔𐴡𐴃𐴧𐴡𐴌 𐴀𐴝𐴣𐴀𐴝𐴌𐴝 𐴒𐴤𐴡𐴄𐴡𐴕𐴝𐴌 𐴎𐴝𐴒𐴝𐴃 𐴉𐴡𐴣𐴀𐴡𐴙𐴏𐴧𐴞 𐴒𐴤𐴡𐴘 , 𐴁𐴠𐴐𐴤𐴞 𐴈𐴥𐴝𐴌𐴝 𐴀𐴦𐴡𐴙𐴕 𐴊𐴡𐴔𐴡𐴕 𐴒𐴡𐴌𐴥𐴞 𐴉𐴝𐴙𐴅𐴧𐴤𐴞 , 𐴀𐴠𐴑𐴀𐴡𐴔 𐴁𐴤𐴝𐴉𐴠 𐴀𐴝𐴕𐴃𐴝𐴎 𐴒𐴡𐴙𐴓𐴧𐴥𐴝𐴔 𐴊𐴠 𐴰 𐴵 𐴐𐴤𐴝𐴕 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴒𐴞𐴘𐴥𐴡𐴘 , 𐴀𐴠 𐴀𐴦𐴡𐴙𐴕𐴡𐴌 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴑𐴞 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃 𐴕𐴥𐴝𐴑𐴞 𐴈𐴡𐴕𐴥𐴡𐴑𐴞𐴘𐴥𐴠 𐴒𐴡𐴌𐴥𐴝𐴘𐴧𐴠 , 𐴀𐴠 𐴁𐴝𐴁𐴡𐴃𐴠 𐴃𐴡𐴊𐴝𐴌𐴟𐴑 𐴏𐴡𐴓𐴠𐴌 𐴁𐴡𐴓𐴞 , 𐴸 𐴓𐴡𐴔𐴁𐴤𐴡𐴌 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴐𐴤𐴝𐴀𐴝𐴂𐴢 𐴀𐴝𐴔𐴞𐴌 𐴅𐴝𐴉𐴡𐴌𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠𐴊𐴠 ! 𐴀𐴦𐴡𐴙𐴕 𐴑𐴠𐴀𐴠𐴕𐴠 𐴊𐴤𐴡𐴌𐴞𐴓𐴥𐴡 𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴀𐴝𐴣𐴀𐴝𐴌𐴝 𐴑𐴤𐴟𐴎 𐴈𐴥𐴡𐴁𐴡𐴌 𐴓𐴟𐴀𐴝𐴃 𐴀𐴝𐴏𐴥𐴞 𐴀𐴝𐴌 𐴃𐴡𐴊𐴝𐴌𐴟𐴑 𐴒𐴡𐴌𐴥𐴝𐴃 𐴀𐴝𐴏𐴥𐴞 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴢 𐴐𐴤𐴟𐴌𐴟𐴃 𐴓𐴡𐴃𐴞 𐴒𐴤𐴡𐴄𐴡𐴕𐴝𐴌 𐴎𐴝𐴒𐴝𐴃 𐴀𐴝𐴏𐴥𐴠 , 𐴕𐴞𐴌𐴝𐴉𐴡𐴃 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴈𐴦𐴝𐴃𐴠𐴌𐴠 𐴀𐴝𐴣𐴀𐴝𐴌𐴝 𐴇𐴥𐴝𐴛𐴐𐴝 𐴘𐴥𐴡𐴛𐴀𐴡𐴃 𐴃𐴤𐴝𐴑𐴤𐴞 , 𐴘𐴦𐴝𐴊 𐴒𐴡𐴌𐴥𐴝𐴘 𐴊𐴞𐴘𐴝 𐴀𐴥𐴞𐴏𐴝𐴉𐴠 ! 𐴐𐴤𐴠𐴐𐴢 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴁𐴡𐴏𐴥𐴡𐴌 𐴀𐴞𐴁𐴤𐴝𐴌 𐴔𐴝𐴌𐴠𐴆𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴀𐴠𐴑𐴤𐴟𐴀𐴞 𐴑𐴠𐴀𐴠𐴔𐴡𐴌 𐴀𐴝𐴌 𐴀𐴠𐴑 𐴁𐴡𐴓𐴡𐴑𐴡𐴃 , 𐴈𐴥𐴡𐴌𐴝𐴁𐴢 𐴔𐴝𐴕𐴥𐴟𐴙𐴐𐴢 𐴈𐴡𐴊𐴟𐴒𐴧𐴤𐴟𐴕𐴠 𐴀𐴦𐴡𐴙 𐴊𐴤𐴡𐴌𐴝𐴘 𐴊𐴞𐴀𐴞𐴓 𐴱𐴱

𐴀𐴥𐴠 𐴒𐴤𐴡𐴄𐴡𐴕𐴝𐴃 𐴰 𐴰 𐴲 𐴲 𐴒𐴤𐴡𐴌 𐴉𐴟𐴌𐴞 𐴒𐴞𐴀𐴞𐴓 𐴒𐴤𐴡𐴘 𐴵 𐴱 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴊𐴟𐴑𐴧𐴤𐴡𐴃 𐴉𐴡𐴌𐴞 𐴒𐴞𐴀𐴞𐴓 𐴒𐴤𐴡𐴘 , 𐴘𐴥𐴝𐴀𐴝𐴌 𐴀𐴝𐴒𐴠 𐴱 𐴲 𐴰 𐴲 𐴐𐴤𐴡𐴕 𐴔𐴝𐴌𐴠𐴆𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴃𐴞𐴕 𐴑𐴠𐴀𐴠𐴔𐴡𐴃 𐴀𐴠𐴑𐴧𐴟 𐴉𐴥𐴟𐴣𐴖𐴥𐴝𐴣𐴃𐴞 𐴁𐴤𐴡𐴘𐴡𐴚𐴑𐴝𐴌 𐴁𐴤𐴝𐴉𐴠 𐴀𐴦𐴡𐴙𐴕 𐴎𐴡𐴓𐴝𐴌 𐴒𐴤𐴡𐴄𐴡𐴕𐴝 𐴒𐴤𐴡𐴄𐴧𐴞𐴀𐴞𐴓 , 𐴀𐴦𐴡𐴙𐴕 𐴎𐴡𐴓𐴝 𐴒𐴤𐴡𐴄𐴡𐴕𐴝 𐴀𐴥𐴞𐴁𐴝𐴃 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴦𐴡𐴙𐴕𐴠 𐴉𐴟𐴌𐴞 𐴔𐴡𐴌𐴞 𐴒𐴞𐴀𐴞𐴓 𐴒𐴤𐴡𐴘 𐴀𐴝𐴌 𐴉𐴝𐴣𐴏𐴢 𐴐𐴤𐴡𐴃𐴡𐴌 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴀𐴡𐴙𐴓 , 𐴹 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴒𐴤𐴡𐴌 𐴉𐴟𐴌𐴞 𐴒𐴞𐴀𐴞𐴓 𐴒𐴤𐴡𐴘 𐴱𐴱

Sources : Ukhiyanews.com