𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴎𐴡𐴌𐴞𐴘𐴝 𐴊𐴡𐴐𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴗𐴃 𐴷 𐴱 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕𐴡𐴃 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴉𐴝𐴃𐴧𐴤𐴡𐴌 𐴑𐴞𐴓𐴧𐴝 𐴊𐴟𐴕𐴥𐴞 𐴎𐴝𐴒𐴝 𐴔𐴞𐴓𐴝𐴘 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴡𐴕𐴠 𐴀𐴝𐴌 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴊𐴡𐴐𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴷 𐴱 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝 𐴎𐴝𐴊𐴞 𐴃𐴡𐴚 𐴉𐴝𐴌𐴝𐴃 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑 𐴌𐴝𐴃𐴞𐴘𐴝 𐴰 𐴰 : 𐴹 𐴰 𐴁𐴝𐴎𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴒𐴤𐴝𐴣𐴄𐴞𐴌 𐴃𐴧𐴟 𐴔𐴝𐴙𐴅𐴧𐴤𐴙𐴠 𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴟𐴔 𐴒𐴞𐴘𐴠𐴊𐴠 𐴒𐴟𐴌𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴐𐴤𐴡𐴣𐴀𐴡 𐴀𐴠𐴑 𐴒𐴤𐴡𐴌𐴒𐴟𐴐𐴧𐴤𐴞𐴌 𐴶 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴝𐴌 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴔𐴡𐴌𐴞 𐴒𐴞𐴘𐴥𐴡𐴘 𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 / 𐴅𐴝𐴉𐴥𐴡𐴌 𐴁𐴡𐴐𐴢 𐴰 𐴶 𐴁𐴡𐴏𐴥𐴡𐴌 / 𐴀𐴝𐴕𐴏𐴝𐴌𐴟 𐴓𐴧𐴝𐴇𐴢 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 / 𐴏𐴥𐴡𐴘𐴡𐴃 𐴀𐴝𐴔𐴞𐴕 𐴁𐴡𐴐𐴢 𐴵 𐴁𐴡𐴏𐴥𐴡𐴌 / 𐴕𐴟𐴌𐴟𐴓 𐴀𐴝𐴔𐴞𐴕 𐴁𐴡𐴐𐴢 𐴳 𐴁𐴡𐴏𐴥𐴡𐴌 / 𐴇𐴝𐴓𐴝𐴘𐴧𐴝 𐴁𐴡𐴐𐴢 𐴱 𐴱 𐴁𐴡𐴏𐴥𐴡𐴌 / 𐴃𐴡𐴏𐴔𐴞𐴕𐴝 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌 , 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴒𐴤𐴡𐴌𐴡𐴃 𐴉𐴡𐴌𐴡𐴕𐴠 𐴀𐴦𐴡𐴙𐴕 𐴊𐴤𐴡𐴌𐴞 𐴒𐴤𐴡𐴌 𐴀𐴥𐴡 𐴎𐴡𐴓𐴞 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 𐴔𐴝𐴕𐴥𐴟𐴙𐴐𐴢 𐴀𐴟𐴀𐴟𐴕 𐴀𐴥𐴡 𐴉𐴟𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝 𐴎𐴝𐴊𐴞 𐴒𐴤𐴟𐴕 𐴎𐴝𐴒𐴝𐴃 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴙𐴑𐴧𐴤𐴙𐴠 𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴞𐴀𐴞𐴕 𐴔𐴝𐴙𐴅𐴧𐴤𐴙𐴠 𐴊𐴠 𐴁𐴡𐴓𐴞 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 , 𐴎𐴝𐴊𐴞 𐴃𐴡𐴚 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴃 𐴰 𐴶 𐴄𐴤𐴝𐴕𐴡𐴌 𐴁𐴠𐴐𐴤𐴞 𐴒𐴤𐴡𐴌 𐴀𐴝𐴏𐴥𐴠 , 𐴰 𐴰 𐴳 𐴃𐴞𐴕 𐴐𐴤𐴡𐴃𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴔𐴡𐴌𐴝 𐴔𐴡𐴌𐴞 𐴀𐴥𐴡𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴌 𐴎𐴡𐴌𐴞𐴘𐴝 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴏𐴞𐴕𐴃𐴝𐴃 𐴀𐴝𐴌 𐴋𐴡𐴌𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴐𐴤𐴟𐴌𐴟𐴃 𐴓𐴡𐴃𐴞 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴡𐴌𐴠 𐴀𐴥𐴟𐴊𐴧𐴝 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴓𐴡𐴌𐴝 𐴏𐴡𐴌𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠 𐴊𐴠 𐴀𐴥𐴠𐴃𐴡𐴓𐴧𐴝 𐴎𐴝𐴕𐴡𐴌 𐴈𐴥𐴡𐴃𐴡𐴌𐴝 𐴀𐴥𐴡𐴀𐴡𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴔𐴝𐴎𐴠 𐴘𐴥𐴡 𐴀𐴡𐴙𐴕𐴧𐴡 𐴎𐴝𐴒𐴝𐴃 𐴎𐴝𐴘 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴤𐴞𐴁𐴡𐴓𐴧𐴝 𐴎𐴝𐴒𐴝 𐴕𐴥𐴝𐴘 𐴔𐴡𐴌𐴡𐴑 𐴁𐴝𐴏𐴡𐴑 𐴉𐴝𐴌𐴝𐴃 𐴀𐴥𐴠 , 𐴃𐴤𐴝𐴑𐴤𐴝 𐴉𐴡𐴌𐴠𐴌 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴀𐴠𐴑𐴤𐴟𐴘 𐴊𐴞𐴕 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴙𐴅𐴧𐴤𐴙𐴠 𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴝𐴃𐴧𐴤𐴡𐴌 𐴑𐴞𐴓𐴧𐴝 𐴀𐴠𐴓𐴝𐴑𐴝𐴌 , 𐴑𐴤𐴝𐴙𐴚 𐴁𐴤𐴡 𐴉𐴝𐴌𐴝𐴃 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴱 𐴱 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴁𐴤𐴟 𐴃𐴡𐴓𐴧𐴥𐴟𐴚 𐴉𐴝𐴌𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴀𐴠𐴑 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴂𐴥𐴡𐴚 𐴋𐴤𐴟 𐴉𐴝𐴌𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴏𐴝𐴙𐴌 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

Sources : RFAburmese.comhttps://www.rfa.org/burmese/news/heavy-weapons-killed-and-injured-12292023031639.html