𐴉𐴡𐴑𐴃𐴤𐴟 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴔𐴡𐴊𐴡𐴊 𐴕𐴡 𐴉𐴡𐴀𐴡𐴕𐴠 𐴈𐴥𐴡𐴀𐴡𐴕𐴡𐴃 𐴉𐴞𐴕𐴊𐴤𐴡𐴕𐴡𐴃 𐴔𐴡𐴐𐴑𐴞𐴓𐴡𐴃 𐴱𐴱

𐴀𐴝𐴌𐴑𐴝𐴕 , 𐴉𐴡𐴑𐴃𐴤𐴟 𐴀𐴠𐴓𐴝𐴑𐴝𐴌 𐴚𐴥𐴝 𐴆𐴤𐴙𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴊𐴠𐴐𐴁𐴞𐴊𐴠𐴐𐴤𐴡𐴌 𐴃𐴡𐴌𐴉𐴥𐴡𐴌 𐴃𐴧𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴔𐴡𐴊𐴡𐴊 𐴀𐴥𐴡 𐴕𐴡 𐴉𐴝𐴀𐴝𐴌 , 𐴀𐴝𐴌 𐴈𐴝𐴔 𐴒𐴡𐴌𐴥𐴞 𐴀𐴝𐴘 𐴈𐴝𐴔𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴘𐴥𐴡 𐴎𐴝𐴘 𐴕𐴡 𐴉𐴝𐴌𐴥𐴡𐴕𐴠 , 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴀𐴝𐴌 𐴈𐴦𐴡𐴌𐴠 𐴏𐴟𐴖𐴡𐴌𐴠 𐴁𐴠𐴐𐴤𐴞 𐴊𐴟𐴑𐴧𐴤𐴡𐴃 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 𐴀𐴥𐴠 𐴚𐴥𐴝 𐴆𐴤𐴙𐴡𐴚 𐴌𐴞𐴉𐴟𐴎𐴞 𐴑𐴠𐴀𐴠𐴔 ( 𐴱 ) 𐴑𐴠𐴀𐴠𐴔 ( 𐴲 ) 𐴊𐴟𐴕𐴥𐴞 𐴑𐴠𐴀𐴠𐴔 𐴔𐴞𐴓𐴝𐴘 𐴊𐴟𐴘 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴒𐴤𐴡𐴌 𐴀𐴝𐴏𐴥𐴠 𐴀𐴝𐴌 𐴊𐴡𐴐𐴢 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠 𐴱𐴱

𐴌𐴞𐴉𐴟𐴎𐴞 𐴀𐴥𐴟𐴀𐴟𐴕𐴠 𐴁𐴞𐴐𐴧𐴤𐴡 𐴈𐴥𐴝𐴕𐴝𐴌 𐴂𐴡𐴌𐴟𐴒𐴠𐴌𐴝𐴔 𐴃𐴡𐴕𐴎𐴞𐴔𐴡𐴌 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴌𐴉𐴥𐴡𐴌 𐴃𐴧𐴟 , 𐴎𐴡𐴕 𐴉𐴡𐴃𐴞 𐴔𐴝𐴐𐴤𐴠 ( 𐴰 𐴰 𐴰 𐴳 𐴱 ) 𐴄𐴞𐴛𐴝 ( 𐴳 𐴱 ) 𐴐𐴤𐴠𐴌 𐴓𐴡𐴃𐴞 𐴏𐴡𐴙𐴓 ( 𐴶 ) 𐴖𐴝 𐴊𐴟𐴊𐴤𐴡𐴌 𐴉𐴡𐴄𐴢 𐴉𐴝𐴘𐴃𐴡 𐴊𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌 𐴃𐴧𐴟 𐴘𐴥𐴡 𐴑𐴠𐴙𐴏𐴧𐴥𐴟 𐴉𐴝𐴘𐴃𐴡 𐴊𐴠 𐴀𐴥𐴞𐴀𐴞𐴕 𐴓𐴡𐴘 𐴒𐴟𐴎𐴝𐴌𐴝 𐴒𐴡𐴌𐴥𐴞 𐴉𐴝𐴙𐴃𐴧𐴡 , 𐴀𐴠𐴈𐴥𐴡𐴕 𐴔𐴡𐴊𐴡𐴊 𐴀𐴥𐴞𐴀𐴞𐴕 𐴉𐴝𐴀𐴝 𐴕𐴡 𐴎𐴝𐴀𐴝𐴌 𐴊𐴧𐴠 𐴀𐴠𐴑 𐴔𐴝𐴐𐴤𐴡𐴌 𐴁𐴠𐴐𐴤𐴞 𐴀𐴥𐴡𐴘𐴧𐴠 , 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴘𐴥𐴡 𐴎𐴝𐴘 𐴕𐴡 𐴉𐴝𐴌𐴥𐴡𐴕𐴠 𐴏𐴦𐴟𐴌𐴡𐴃 𐴇𐴥𐴝𐴀𐴝𐴓 𐴖𐴦𐴝𐴙𐴆𐴧𐴤𐴙𐴝 𐴃𐴤𐴝𐴑𐴤𐴝 𐴉𐴡𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴑𐴠𐴀𐴠𐴔 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴀𐴝𐴏𐴥𐴠𐴊𐴠 𐴊𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴃 𐴔𐴝𐴓 𐴏𐴥𐴝𐴔𐴝𐴕𐴡𐴌 𐴊𐴝𐴔 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴞 𐴎𐴡𐴀𐴡𐴕𐴠 𐴀𐴝𐴌𐴀𐴥𐴡 𐴊𐴟𐴑 𐴉𐴝𐴀𐴝 𐴎𐴝𐴀𐴝𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 , 𐴚𐴥𐴝 𐴆𐴤𐴙𐴡𐴚 𐴑𐴠𐴀𐴠𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴌𐴝𐴘𐴐𐴤𐴠𐴕 𐴔𐴡𐴊𐴡𐴊𐴡𐴌 𐴁𐴝𐴁𐴡𐴃𐴠 𐴊𐴠𐴐𐴁𐴞𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴟𐴒𐴧𐴤𐴖𐴝𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕 𐴓𐴡𐴘 𐴎𐴝𐴕𐴞 𐴏𐴝𐴀𐴝 𐴒𐴞𐴘𐴠 , 𐴃𐴡𐴀𐴡𐴘 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴊𐴠 ! 𐴀𐴝𐴣𐴀𐴝𐴌𐴝 𐴌𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴌𐴝𐴏𐴧𐴝 𐴁𐴡𐴕𐴒𐴡𐴌𐴥𐴞 𐴊𐴞𐴘𐴠 𐴔𐴡𐴊𐴡𐴊 𐴓𐴡𐴘 𐴎𐴝𐴘𐴃𐴡 𐴕𐴡 𐴊𐴠𐴀𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴌 𐴔𐴟𐴃𐴦𐴝𐴓𐴧𐴠𐴑𐴝 𐴀𐴡𐴉𐴥𐴞𐴏𐴢 ( 𐴘𐴟 𐴀𐴠𐴕 𐴀𐴡 𐴏𐴞 𐴀𐴠𐴙𐴆 𐴀𐴠 ) 𐴘𐴠 , 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴕𐴦𐴠𐴓𐴥𐴝𐴘𐴧𐴠 𐴊𐴠 𐴌𐴠𐴂𐴟𐴄 𐴔𐴡𐴎𐴞𐴕 , 𐴀𐴝𐴌𐴑𐴝𐴕𐴡𐴃 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴀𐴝𐴌 ( 𐴀𐴠 𐴀𐴠 ) 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴉𐴥𐴞𐴃𐴞𐴕 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴀𐴥𐴡𐴀𐴡𐴕𐴠 𐴀𐴠𐴈𐴥𐴡𐴕 𐴀𐴝𐴌 𐴀𐴝𐴒𐴡𐴌 𐴒𐴤𐴟𐴕 𐴔𐴞𐴓𐴝𐴘 𐴌𐴞𐴉𐴟𐴎𐴞 𐴀𐴥𐴡𐴘𐴧𐴠𐴊𐴠 𐴑𐴟𐴌𐴞 𐴇𐴥𐴝𐴎𐴝𐴌𐴡𐴌 𐴁𐴠𐴐𐴤𐴞 𐴀𐴥𐴡𐴘𐴧𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴕𐴥𐴟𐴙𐴐𐴢 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞𐴁𐴤𐴝𐴌 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 𐴀𐴝𐴌 𐴉𐴝𐴕𐴥𐴞𐴌 𐴌𐴝𐴏𐴧𐴝 𐴁𐴠𐴒𐴧𐴤𐴞𐴕 𐴁𐴡𐴕 𐴒𐴡𐴌𐴥𐴞 𐴊𐴡𐴀𐴡𐴕𐴠 𐴔𐴡𐴊𐴡𐴊 𐴉𐴡𐴣𐴀𐴡𐴏𐴝𐴘𐴃𐴠 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴌𐴠𐴂𐴟𐴄𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

Sources : RFAburmese.com