𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 𐴘𐴠 𐴉𐴡𐴃𐴧𐴞 𐴌𐴟𐴇𐴝𐴙𐴚𐴒𐴙𐴝𐴌 𐴓𐴧𐴝 𐴌𐴝𐴘𐴐𐴤𐴡𐴕 𐴰 𐴱 𐴋𐴦𐴡𐴓𐴝𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴎𐴤𐴝𐴇𐴝𐴕𐴞 𐴈𐴥𐴝𐴕𐴝𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴕𐴎𐴞𐴔𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴉𐴡𐴃𐴧𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴌𐴝𐴘𐴐𐴤𐴡𐴕 , 𐴸 𐴋𐴦𐴡𐴓𐴝𐴌 𐴀𐴥𐴡𐴀𐴡𐴙𐴓 𐴊𐴠 𐴀𐴥𐴠𐴃𐴧𐴟 𐴁𐴝𐴌𐴥𐴝𐴘 𐴰 𐴱 𐴋𐴦𐴡𐴓𐴝𐴌 𐴒𐴡𐴙𐴅𐴧𐴤𐴙𐴠 , 𐴎𐴞𐴘𐴥𐴝𐴕𐴡𐴌 𐴖𐴡𐴌𐴠 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴱 𐴃𐴝𐴌𐴥𐴞𐴑 𐴴 𐴲 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴀𐴝𐴔𐴥𐴡𐴓 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴡 𐴱𐴱

𐴀𐴠 𐴔𐴡𐴐𐴑𐴞𐴓 𐴁𐴡𐴏𐴥𐴡𐴌𐴡𐴌 𐴔𐴧𐴝𐴎𐴤𐴠 , 𐴎𐴠𐴈𐴥𐴡𐴕 𐴁𐴡𐴀𐴡𐴃 𐴋𐴦𐴡𐴙𐴓𐴧𐴝 𐴏𐴥𐴡𐴚𐴑𐴡𐴄 𐴀𐴥𐴡𐴑𐴧𐴡𐴓 𐴀𐴥𐴡𐴘𐴧𐴠 𐴀𐴝𐴌 𐴊𐴝𐴕 𐴈𐴥𐴡𐴌𐴝𐴃 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴀𐴡 𐴇𐴥𐴠𐴔𐴝𐴘𐴡𐴃 𐴎𐴡𐴌𐴟𐴌𐴡𐴃 𐴀𐴥𐴡𐴘𐴧𐴠 , 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴊𐴝𐴕 𐴈𐴥𐴡𐴌𐴝𐴃 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 , 𐴔𐴟𐴀𐴟𐴔𐴧𐴞𐴑𐴧𐴤𐴝 𐴀𐴝𐴒𐴧𐴗𐴝𐴘 𐴉𐴥𐴝𐴌𐴡𐴃 𐴊𐴞𐴓𐴡𐴌 𐴏𐴥𐴝𐴣𐴀𐴝𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴓𐴧𐴝 𐴇𐴥𐴞𐴏𐴧𐴝 𐴓𐴡𐴘𐴧𐴥𐴠 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴃𐴤𐴝𐴑𐴤𐴠𐴊𐴠 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴕𐴎𐴞𐴔𐴡𐴌 𐴋𐴝𐴘𐴌𐴥𐴠𐴑𐴄𐴝𐴌 / 𐴋𐴡𐴔 𐴀𐴠𐴏𐴑𐴝 𐴂𐴞𐴓𐴞 𐴘𐴠 𐴈𐴡𐴘𐴧𐴠 𐴱𐴱

𐴉𐴥𐴡𐴕 𐴀𐴞𐴁𐴤𐴝𐴌 𐴎𐴡𐴌𐴞𐴘𐴝 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴉𐴡𐴃𐴧𐴞 𐴌𐴟𐴇𐴝𐴙𐴚𐴒𐴙𐴝𐴌𐴠 𐴸 𐴋𐴦𐴡𐴓𐴝𐴌 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴀𐴥𐴠𐴃𐴧𐴟 𐴁𐴝𐴌𐴥𐴝𐴘 𐴰 𐴱 𐴋𐴦𐴡𐴓𐴝𐴌 𐴒𐴡𐴌𐴥𐴞 𐴅𐴝𐴕𐴖𐴝𐴌𐴞 𐴴 𐴲 𐴰 𐴲 𐴀𐴥𐴡𐴘𐴃𐴠 𐴌𐴝𐴘𐴐𐴤𐴡𐴕 𐴁𐴝𐴌𐴥𐴝𐴘 𐴊𐴞𐴀𐴞 𐴉𐴝𐴙𐴅𐴧𐴟𐴔 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴇𐴥𐴝𐴔𐴊𐴡𐴌𐴡𐴊𐴞 𐴘𐴝𐴀𐴝𐴕𐴡𐴌 𐴖𐴡𐴌𐴠 𐴀𐴝𐴣𐴀𐴝𐴌𐴝 𐴁𐴠𐴐𐴤𐴞 𐴑𐴤𐴟𐴐𐴞 𐴀𐴥𐴡𐴘𐴧𐴞 𐴀𐴝𐴌 𐴀𐴝𐴐𐴤𐴝 𐴒𐴡𐴌𐴥𐴞𐴌 𐴊𐴧𐴠 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴏𐴥𐴝𐴔𐴧𐴠 𐴘𐴥𐴡 𐴊𐴝𐴕 𐴈𐴥𐴡𐴌𐴝𐴃 𐴒𐴡𐴌𐴥𐴡𐴕𐴡𐴃 𐴓𐴝𐴒𐴝𐴃𐴝𐴌 𐴁𐴝𐴌𐴥𐴝𐴘 𐴁𐴝𐴌𐴥𐴝𐴘 𐴇𐴥𐴞𐴏𐴧𐴝 𐴓𐴟𐴀𐴝𐴃 𐴃𐴤𐴝𐴑𐴤𐴞𐴁𐴤𐴝 𐴁𐴡𐴓𐴞 , 𐴃𐴦𐴝𐴑𐴤𐴞 𐴌𐴞𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴌 𐴔𐴟𐴓 𐴎𐴡𐴌𐴟𐴌𐴡𐴃 𐴉𐴟𐴌𐴝 𐴒𐴡𐴌𐴥𐴝 𐴎𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴁𐴡𐴓𐴞 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴕𐴎𐴞𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴱𐴱

𐴀𐴠 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴕𐴎𐴞𐴔𐴠 𐴀𐴝𐴔𐴠𐴌𐴞𐴑𐴝𐴌 𐴅𐴤𐴝𐴇𐴝𐴕𐴡𐴌 𐴃𐴡𐴌𐴡𐴑𐴧𐴞 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊𐴡𐴌 𐴃𐴡𐴕𐴎𐴞𐴔𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 $ 𐴷 𐴸 𐴔𐴡𐴓𐴞𐴘𐴥𐴟𐴕 𐴋𐴦𐴡𐴓𐴝𐴌 𐴁𐴟𐴎𐴤𐴞 𐴉𐴝𐴘𐴧𐴥𐴠 , 𐴀𐴡𐴑𐴃𐴤𐴡𐴌 𐴖𐴡𐴌𐴠 𐴐𐴤𐴡𐴔𐴡𐴘 𐴔𐴡𐴃𐴠 𐴉𐴝𐴘𐴧𐴥𐴠𐴊𐴠 𐴔𐴡𐴊𐴡𐴊 𐴓𐴡𐴘 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴎𐴞𐴕𐴊𐴞𐴒𐴞 𐴁𐴝𐴏𐴝𐴀𐴡𐴕𐴡𐴃 𐴁𐴠𐴐𐴤𐴞 𐴏𐴥𐴝𐴀𐴝𐴌𐴝 𐴀𐴥𐴡𐴘𐴁𐴡 , 𐴎𐴠𐴍𐴥𐴠 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴀𐴝𐴐𐴤𐴝 𐴀𐴟𐴔𐴧𐴞𐴊 𐴏𐴥𐴝𐴌𐴝 𐴉𐴡𐴙𐴃𐴧𐴡 𐴊𐴞𐴕 𐴋𐴦𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴔𐴡𐴏𐴞𐴁𐴡𐴃 𐴀𐴡 𐴀𐴡𐴐𐴤𐴝𐴕𐴃𐴞𐴌 𐴔𐴟𐴑𐴤𐴡𐴃 𐴀𐴝𐴏𐴥𐴠 𐴱𐴱

Sources : Dhakatribune.com