𐴀𐴥𐴝𐴣𐴃𐴞𐴘𐴝𐴌 , 𐴒𐴟𐴓𐴞 𐴐𐴤𐴡𐴣𐴀𐴡 𐴁𐴡𐴌𐴔𐴥𐴝𐴃𐴧𐴟 𐴒𐴤𐴡𐴓𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴱𐴱

𐴕𐴝𐴉𐴢 𐴊𐴡𐴙𐴅𐴧𐴙𐴝𐴃 𐴑𐴝𐴌𐴖𐴝𐴘 𐴏𐴝𐴓𐴝𐴘 , 𐴀𐴥𐴝𐴣𐴃𐴞𐴘𐴝𐴌 , 𐴒𐴟𐴓𐴞 𐴀𐴝𐴌 𐴕𐴞𐴐𐴤𐴝 𐴐𐴤𐴡𐴣𐴀𐴡 𐴁𐴡𐴌𐴔𐴥𐴝𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴡𐴃 𐴒𐴤𐴡𐴓𐴠𐴌 𐴊𐴧𐴠 𐴐𐴤𐴡𐴣𐴀𐴡𐴃 , 𐴁𐴝𐴚𐴓𐴝𐴊𐴠𐴐𐴢 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 ( 𐴁𐴞 𐴅𐴞 𐴁𐴞 ) 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠 , 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞 𐴎𐴡𐴕 𐴀𐴝𐴃𐴡𐴚𐴁𐴝𐴊𐴞 𐴕𐴡𐴁𐴞 𐴇𐴥𐴟𐴏𐴡𐴕 𐴒𐴟𐴌𐴥𐴟𐴂𐴡𐴌 𐴔𐴝𐴕𐴥𐴟𐴙𐴐𐴢 𐴁𐴡𐴓𐴞 , 𐴁𐴞 𐴅𐴞 𐴁𐴞 𐴘𐴠 𐴈𐴡𐴘𐴧𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴱 𐴱 𐴁𐴝𐴎𐴠 𐴵 𐴱 𐴔𐴞𐴓𐴥𐴡𐴄𐴡𐴃 , 𐴁𐴡𐴌𐴥𐴡𐴘 𐴃𐴡𐴓𐴥𐴞 𐴁𐴡𐴑𐴧𐴡𐴌𐴡𐴌 𐴎𐴤𐴟𐴌𐴝𐴌 𐴀𐴠𐴓𐴝𐴑𐴝𐴃𐴧𐴤𐴟 𐴀𐴥𐴞𐴃𐴝𐴌𐴝 𐴌𐴥𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴁𐴞 𐴅𐴞 𐴁𐴞 𐴲 𐴓𐴡𐴔𐴁𐴤𐴡𐴌 𐴁𐴠𐴄𐴤𐴠𐴓𐴞𐴘𐴠𐴕𐴠 𐴈𐴡𐴘𐴧𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 / 𐴔𐴟𐴇𐴝𐴔𐴧𐴡𐴊 𐴎𐴟𐴁𐴝𐴙𐴌 𐴁𐴝𐴉𐴢 𐴔𐴟𐴇𐴝𐴔𐴧𐴡𐴊 𐴐𐴤𐴡𐴌𐴞𐴉𐴢 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟 𐴉𐴝𐴓𐴡𐴚 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 , / 𐴔𐴟𐴇𐴝𐴔𐴧𐴡𐴊 𐴀𐴝𐴕𐴖𐴝𐴌 𐴁𐴝𐴉𐴢 𐴀𐴝𐴔𐴞𐴌 𐴇𐴥𐴟𐴏𐴝𐴙𐴕 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 𐴀𐴠𐴑𐴤𐴟𐴘 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 𐴱𐴱

𐴄𐴠𐴑𐴕𐴝𐴉𐴢 𐴁𐴞 𐴅𐴞 𐴁𐴞 𐴲 𐴓𐴡𐴔𐴁𐴤𐴡𐴌 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴎𐴞𐴔𐴧𐴝𐴊𐴝𐴌 / 𐴓𐴠𐴉𐴄𐴤𐴠𐴕 𐴑𐴡𐴌𐴕𐴡𐴓 𐴔𐴟𐴇𐴞𐴘𐴟𐴊𐴧𐴞𐴕 𐴀𐴝𐴇𐴔𐴡𐴊𐴠 , 𐴔𐴦𐴝𐴔𐴠𐴓𐴝 𐴏𐴥𐴡𐴀𐴞 𐴀𐴝𐴌 𐴈𐴥𐴝𐴄𐴤𐴞 𐴁𐴡𐴓𐴞 𐴈𐴡𐴘𐴧𐴠 , 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴎𐴝𐴕𐴝𐴘𐴧𐴠𐴊𐴠 ! 𐴁𐴡𐴌𐴔𐴥𐴝𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴕𐴞𐴐𐴤𐴝𐴌 𐴑𐴤𐴠𐴂𐴢 𐴏𐴝𐴓𐴝𐴕 𐴀𐴟𐴒𐴧𐴤𐴗𐴝 𐴒𐴤𐴡𐴓𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 , 𐴱 𐴱 𐴁𐴝𐴎𐴠 𐴵 𐴱 𐴔𐴞𐴓𐴥𐴡𐴄𐴡𐴃 𐴄𐴠𐴑𐴕𐴝𐴉𐴢 𐴲 𐴓𐴡𐴔𐴁𐴤𐴡𐴌 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴒𐴡𐴐𐴃𐴤𐴡 𐴉𐴝𐴄𐴞𐴌 𐴊𐴡𐴓 𐴀𐴟𐴒𐴧𐴤𐴗𐴝 𐴘𐴠 , 𐴁𐴡𐴌𐴥𐴡𐴘 𐴃𐴡𐴓𐴞 𐴁𐴡𐴑𐴧𐴡𐴌𐴡𐴌 𐴎𐴤𐴟𐴌𐴝 𐴀𐴠𐴓𐴝𐴑𐴝𐴃 𐴇𐴥𐴠𐴑𐴔𐴡𐴃 𐴀𐴝𐴌 𐴑𐴟𐴐𐴤𐴡𐴓𐴡𐴌 𐴏𐴥𐴝𐴣𐴀𐴝𐴃𐴠 𐴎𐴝𐴒𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴎𐴞𐴌𐴥𐴟 𐴓𐴝𐴙𐴕 𐴉𐴝𐴌𐴥𐴝𐴘 𐴁𐴡𐴑𐴧𐴡𐴌𐴡𐴌 𐴎𐴤𐴟𐴌𐴝 𐴀𐴠𐴓𐴝𐴑𐴝𐴃 𐴒𐴤𐴡𐴓𐴡𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 , 𐴒𐴡𐴐𐴃𐴤𐴡 𐴊𐴡𐴓𐴠 𐴊𐴟𐴘𐴧𐴥𐴝𐴕 𐴕𐴦𐴡 𐴌𐴥𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴌 𐴃𐴧𐴟 𐴒𐴤𐴞𐴌𐴞 𐴉𐴥𐴠𐴓𐴝𐴘 𐴁𐴦𐴝𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴀𐴥𐴠 𐴀𐴡𐴑𐴃𐴤𐴡𐴃 𐴉𐴠𐴏𐴥𐴠 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴕𐴦𐴡 𐴘𐴥𐴝𐴀𐴝𐴕 𐴖𐴝𐴉𐴠𐴏𐴢 𐴁𐴡𐴌𐴔𐴥𐴝𐴌 𐴀𐴟𐴎𐴟 𐴊𐴤𐴝𐴘 𐴒𐴞𐴘𐴡𐴘 , 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴉𐴡𐴌𐴠 𐴒𐴡𐴐𐴃𐴤𐴡 𐴊𐴡𐴓𐴠 𐴕𐴦𐴡 𐴌𐴥𐴠 𐴃𐴡𐴓𐴝𐴐𐴤𐴞 𐴒𐴡𐴌𐴥𐴞 , 𐴀𐴟𐴒𐴧𐴤𐴗𐴝 𐴊𐴠𐴐𐴤𐴞 𐴃𐴡𐴘𐴧𐴝𐴌𐴞 𐴊𐴟𐴘 𐴕𐴝𐴓𐴞 𐴁𐴡𐴕𐴋𐴟𐴑 , 𐴀𐴟𐴒𐴧𐴤𐴗𐴝 𐴁𐴞𐴊𐴠𐴐𐴤𐴞 𐴉𐴞𐴃𐴡𐴓 , 𐴀𐴟𐴒𐴧𐴤𐴗𐴝 𐴇𐴥𐴠𐴕 𐴒𐴠𐴌𐴥𐴠𐴕 , 𐴸 𐴖𐴥𐴝 𐴉𐴞𐴏𐴃𐴡𐴓𐴡𐴌 𐴒𐴟𐴓𐴞 , 𐴀𐴟𐴒𐴧𐴤𐴗𐴝 𐴈𐴥𐴝𐴓𐴞 𐴑𐴤𐴟𐴓 , 𐴱 𐴲 𐴐𐴤𐴗𐴝 𐴃𐴝𐴎𐴝 𐴒𐴟𐴓𐴞 , 𐴸 𐴖𐴥𐴝 𐴊𐴠𐴐𐴤𐴞 𐴈𐴝𐴃𐴧𐴟𐴙𐴆𐴢 , 𐴊𐴟𐴘 𐴑𐴠 𐴅𐴞 𐴰 𐴴 𐴱 𐴒𐴠𐴌𐴥𐴝𐴔 𐴑𐴞𐴌𐴞𐴏𐴃𐴝𐴓 𐴔𐴥𐴠𐴃 𐴀𐴦𐴝𐴙𐴏𐴢 ( 𐴕𐴞𐴐𐴤𐴝 ) 𐴀𐴠𐴑𐴧𐴤𐴝𐴕 𐴊𐴦𐴡 𐴉𐴝𐴀𐴝 𐴒𐴞𐴘𐴠 , 𐴁𐴦𐴝𐴊𐴠 𐴀𐴝𐴙𐴕 𐴔𐴡𐴃𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴀𐴝𐴐𐴤𐴝𐴔𐴞 𐴀𐴥𐴡𐴑𐴧𐴡𐴓𐴡𐴌𐴠 𐴄𐴠𐴑𐴕𐴝𐴉𐴢 𐴔𐴡𐴋𐴠𐴓 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴞𐴘𐴝 𐴒𐴞𐴘𐴠 𐴱𐴱

Sources : Ukhiyanews.com