𐴑𐴠𐴀𐴠𐴔𐴡𐴃𐴧𐴟 𐴕𐴦𐴠𐴓𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴰 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴑𐴠𐴀𐴠𐴔𐴡𐴃𐴧𐴟 𐴕𐴠𐴀𐴠𐴓𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 , 𐴉𐴟𐴓𐴞𐴐𐴠 𐴰 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠 , 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 , 𐴄𐴠𐴑𐴕𐴝𐴉𐴢- 𐴑𐴝𐴑𐴏𐴡 𐴁𐴝𐴎𐴝𐴌 𐴔𐴡𐴇𐴝 𐴏𐴥𐴡𐴍𐴡𐴑𐴡𐴃 , 𐴀𐴟𐴑𐴤𐴞𐴘𐴝 𐴀𐴠𐴓𐴝𐴑𐴝𐴌 𐴁𐴞𐴁𐴤𐴞𐴕𐴧𐴡 𐴎𐴝𐴒𐴝𐴃 𐴒𐴝𐴌𐴥𐴞𐴌 𐴏𐴠𐴑 𐴁𐴟𐴖𐴥𐴝𐴘 𐴁𐴦𐴝𐴊𐴠 𐴏𐴠𐴑 𐴒𐴡𐴌𐴥𐴞 𐴀𐴥𐴞𐴃𐴝𐴌𐴝 𐴌𐴥𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴱𐴱

𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 𐴀𐴡𐴉𐴥𐴞𐴏𐴝𐴌 ( 𐴀𐴡 𐴏𐴞 ) / 𐴐𐴡𐴔𐴞𐴔 𐴇𐴥𐴟𐴏𐴝𐴙𐴕𐴠 𐴈𐴡𐴘𐴧𐴠 𐴊𐴠 ! 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔 𐴏𐴥𐴝𐴌𐴞 𐴁𐴝𐴀𐴝𐴌𐴠 𐴕𐴦𐴠𐴓𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 , 𐴀𐴥𐴞𐴀𐴞𐴕 𐴌𐴟𐴑𐴤𐴞𐴁𐴤𐴡𐴓𐴧𐴝 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴕𐴡𐴎𐴡𐴌𐴊𐴝𐴌𐴞 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴀𐴠𐴅𐴝𐴎𐴡𐴃 𐴏𐴥𐴝𐴌𐴝 , 𐴑𐴠𐴀𐴠𐴔𐴡𐴌 𐴕𐴞𐴌𐴝𐴉𐴡𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴏𐴡𐴑𐴞𐴊𐴝𐴌 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌𐴠 𐴏𐴟𐴑 𐴉𐴥𐴝𐴣𐴑𐴞 𐴊𐴞𐴀𐴞 , 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴕𐴦𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴈𐴡𐴕𐴥𐴡 𐴑𐴟𐴐𐴤𐴡𐴓𐴞 𐴕𐴦𐴠𐴓𐴞 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴞𐴁𐴤𐴞𐴕𐴧𐴡 𐴀𐴠𐴓𐴝𐴑𐴝𐴃 𐴏𐴥𐴡𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴐𐴤𐴠𐴑𐴝𐴘𐴡𐴃 𐴕𐴦𐴠𐴙𐴓𐴧𐴥𐴙𐴠 , 𐴀𐴥𐴞𐴘𐴝𐴕𐴡𐴌 𐴃𐴧𐴟 𐴁𐴝𐴏𐴞 𐴁𐴤𐴡𐴓𐴧𐴝 𐴀𐴝𐴣𐴀𐴝𐴌𐴝 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴕𐴡𐴎𐴡𐴌𐴊𐴝𐴌𐴞 𐴒𐴡𐴌𐴥𐴞𐴌 𐴀𐴝𐴌 𐴈𐴥𐴝𐴏𐴢 𐴈𐴥𐴝𐴏𐴢 𐴑𐴝𐴌𐴖𐴝𐴘 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝 𐴐𐴤𐴟𐴌𐴞 𐴒𐴡𐴙𐴅𐴧𐴤𐴞 , 𐴁𐴟𐴙𐴃 𐴁𐴝𐴌𐴠 𐴀𐴟𐴑𐴤𐴞𐴘𐴝𐴌 𐴁𐴞𐴁𐴤𐴞𐴕𐴧𐴡 𐴎𐴝𐴒𐴝𐴃 𐴒𐴝𐴌𐴥𐴞 𐴏𐴠𐴑 𐴒𐴡𐴌𐴥𐴞 𐴀𐴥𐴠 𐴰 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡 𐴌𐴥𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴥𐴝 𐴒𐴞𐴘𐴠𐴊𐴠 , 𐴀𐴝𐴌 𐴀𐴥𐴞𐴃𐴝𐴌𐴝 𐴁𐴠𐴒𐴧𐴤𐴟𐴕 𐴀𐴟𐴑𐴤𐴞𐴘𐴝 𐴳 𐴱 𐴀𐴡 𐴹 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴡 𐴏𐴞 / 𐴐𐴡𐴔𐴞𐴔𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴕𐴦𐴠𐴓𐴡𐴕𐴡𐴌 𐴁𐴝𐴁𐴡𐴃𐴠 𐴋𐴦𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴁𐴤𐴝𐴀𐴝𐴕𐴝 𐴀𐴥𐴡𐴑𐴧𐴡𐴓 𐴊𐴞𐴘𐴠 , 𐴑𐴞𐴘𐴥𐴠 𐴀𐴠𐴒𐴝𐴕𐴝𐴌 𐴒𐴤𐴡𐴌𐴡𐴃 𐴁𐴠𐴌𐴝𐴘𐴃𐴤𐴡 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴀𐴡𐴌 , 𐴀𐴝𐴌 𐴑𐴞𐴘𐴥𐴠 𐴈𐴝𐴔𐴠 𐴁𐴝𐴀𐴞𐴌 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴀𐴡𐴌 𐴀𐴝𐴌 𐴑𐴞𐴘𐴥𐴠 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌 𐴎𐴡𐴌𐴟𐴌𐴞 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴑𐴞𐴕𐴞𐴁𐴤𐴡𐴓𐴧𐴝 𐴁𐴝𐴀𐴞𐴌 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴀𐴡𐴌 , 𐴀𐴠 𐴏𐴥𐴟𐴖𐴝𐴓𐴝 𐴏𐴥𐴝𐴀𐴝𐴓𐴞𐴌 𐴁𐴦𐴝𐴊𐴠 𐴀𐴥𐴞𐴃𐴝𐴌𐴝 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴀𐴡𐴉𐴥𐴡𐴌𐴝𐴊𐴡𐴃 𐴁𐴝𐴎𐴤𐴝𐴘𐴧𐴝 𐴀𐴝𐴏𐴥𐴠 𐴕𐴥𐴠 𐴕𐴥𐴝𐴘 , 𐴁𐴠𐴐𐴤𐴞 𐴃𐴡𐴊𐴝𐴌𐴟𐴑 𐴒𐴡𐴌𐴥𐴝 𐴎𐴝𐴀𐴝𐴌 , 𐴃𐴡𐴊𐴝𐴌𐴟𐴑 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴀𐴥𐴞𐴃𐴝𐴌𐴝 𐴌𐴥𐴠 𐴑𐴠𐴀𐴠𐴔 𐴀𐴡𐴉𐴥𐴞𐴏𐴝𐴌𐴡𐴌 𐴇𐴥𐴝𐴃𐴡𐴃 𐴒𐴡𐴏𐴥𐴝𐴘 𐴊𐴞𐴘𐴝 𐴎𐴝𐴘𐴁𐴡 𐴁𐴡𐴓𐴞 / 𐴀𐴡𐴏𐴞 𐴐𐴡𐴔𐴞𐴔𐴠 𐴈𐴡𐴘𐴧𐴠 𐴱𐴱

Sources : Ukhiyanews.com