𐴔𐴡𐴓𐴠𐴆𐴤𐴙𐴝 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴡 𐴈𐴡𐴀𐴡𐴘 𐴊𐴠𐴌 𐴐𐴧𐴤𐴡𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴃𐴞𐴕 𐴊𐴞𐴕 𐴊𐴤𐴡𐴌𐴞 𐴐𐴤𐴝𐴘𐴒𐴡𐴌𐴡𐴃 𐴒𐴤𐴟𐴌𐴝𐴘𐴧𐴠 𐴱𐴱

𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴄𐴡𐴓𐴥𐴝𐴌 𐴀𐴠𐴑𐴧𐴤𐴝𐴕 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴄𐴠𐴑𐴕𐴝𐴉𐴡𐴌 𐴏𐴡𐴌𐴡𐴃 𐴄𐴝𐴕𐴞 𐴀𐴝𐴙𐴕𐴧𐴥𐴙𐴠 , 𐴄𐴡𐴓𐴥𐴝 𐴘𐴥𐴝𐴀𐴝𐴕𐴡𐴃 𐴊𐴠𐴌 𐴐𐴧𐴤𐴡𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴝𐴌 𐴉𐴟𐴖𐴝𐴙𐴕 𐴀𐴝𐴏𐴥𐴠 , 𐴄𐴡𐴓𐴥𐴝𐴌 𐴘𐴥𐴝𐴀𐴝𐴕𐴌𐴠 𐴐𐴤𐴝𐴘𐴒𐴡𐴌𐴡𐴃 𐴃𐴞𐴕 𐴊𐴞𐴕 𐴒𐴤𐴟𐴌𐴝𐴀𐴡𐴕𐴡𐴌 𐴁𐴦𐴝𐴊𐴠 , 𐴁𐴞𐴐𐴤𐴞𐴃 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴄𐴠𐴑𐴕𐴝𐴉𐴢 𐴔𐴦𐴠𐴌𐴞𐴕 𐴋𐴠𐴌𐴦𐴝𐴙𐴁𐴡𐴌 𐴏𐴡𐴌𐴡𐴌 𐴔𐴟𐴙𐴐𐴑𐴤𐴝𐴓𐴞 𐴉𐴝𐴌𐴝𐴌 𐴒𐴤𐴝𐴣𐴍𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴱𐴱

𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴉𐴝𐴐𐴤𐴞𐴕𐴊𐴝𐴌 𐴁𐴤𐴡𐴌𐴝 𐴄𐴡𐴓𐴥𐴝𐴌 𐴀𐴠𐴑𐴧𐴤𐴝𐴕 𐴊𐴡𐴙𐴅𐴧𐴙𐴝𐴃 𐴁𐴤𐴝𐴐𐴠𐴌 𐴊𐴧𐴠 𐴊𐴠𐴑𐴤𐴞𐴘𐴡𐴌𐴠 , 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴄𐴝𐴕𐴞 𐴑𐴟𐴓𐴡𐴌 𐴈𐴝𐴣𐴏𐴝𐴃 𐴀𐴝𐴙𐴕𐴧𐴥𐴙𐴠 𐴊𐴠 𐴈𐴥𐴝𐴄𐴞 𐴁𐴡𐴓𐴞 , 𐴄𐴠𐴑𐴕𐴝𐴉𐴢 𐴏𐴥𐴡𐴊𐴡𐴌 𐴘𐴟𐴕𐴞𐴀𐴡𐴕𐴡𐴌 𐴵 𐴓𐴡𐴔𐴁𐴤𐴡𐴌 𐴖𐴝𐴋𐴡𐴌 𐴘𐴟 𐴂𐴞 / 𐴎𐴡𐴇𐴞𐴌 𐴀𐴝𐴇𐴔𐴡𐴊𐴠 𐴈𐴡𐴘𐴧𐴠 , 𐴎𐴠 𐴄𐴡𐴓𐴥𐴝𐴌𐴡𐴃 𐴊𐴠𐴌 𐴐𐴧𐴡𐴃 𐴓𐴡𐴃𐴞 𐴉𐴝𐴐𐴤𐴞𐴕𐴊𐴝𐴌 𐴀𐴝𐴏𐴥𐴠 , 𐴄𐴠𐴑𐴕𐴝𐴉𐴡𐴌 𐴔𐴟𐴙𐴐𐴑𐴤𐴝𐴓𐴞 𐴉𐴝𐴌𐴝𐴌 𐴔𐴦𐴠𐴌𐴞𐴕 𐴋𐴠𐴌𐴦𐴝𐴙𐴁𐴡𐴌 𐴘𐴥𐴡𐴣𐴀𐴡𐴃 𐴌𐴝𐴏𐴧𐴝𐴌 𐴖𐴡𐴌𐴠 𐴁𐴡𐴀𐴡𐴘 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴈𐴝𐴣𐴊𐴠𐴌 𐴱𐴱

𐴀𐴝𐴌 𐴈𐴡𐴊𐴦𐴟𐴕𐴠 𐴄𐴡𐴔 𐴄𐴡𐴔 𐴓𐴡𐴘 𐴑𐴠𐴀𐴠𐴔𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴈𐴡𐴃𐴤𐴝 𐴘𐴥𐴡 𐴈𐴡𐴀𐴡𐴌 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝𐴌 𐴇𐴥𐴝𐴓 𐴇𐴥𐴝𐴓𐴡𐴃 𐴉𐴟𐴏𐴥𐴝𐴌 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 / 𐴇𐴥𐴝𐴔𐴞𐴊 𐴇𐴥𐴟𐴏𐴡𐴕𐴠 𐴈𐴡𐴘𐴓𐴥𐴡 𐴊𐴠 ! 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴉𐴡𐴙𐴃𐴧𐴡 𐴊𐴞𐴕 𐴑𐴤𐴟𐴕𐴝 𐴑𐴤𐴟𐴕𐴞 , 𐴀𐴥𐴠𐴃𐴡𐴓𐴧𐴝 𐴑𐴠𐴀𐴠𐴔𐴡𐴌 𐴃𐴧𐴟 𐴁𐴝𐴀𐴝𐴙𐴌 𐴀𐴥𐴡𐴘 𐴀𐴟𐴕𐴧𐴡𐴃𐴡𐴔𐴝𐴕 𐴎𐴞𐴕𐴊𐴞𐴒𐴞𐴌 𐴀𐴝𐴐𐴤𐴝 𐴓𐴡𐴘 , 𐴐𐴤𐴝𐴘𐴒𐴡𐴌𐴡𐴌 𐴉𐴡𐴣𐴃𐴠 𐴀𐴥𐴡𐴘𐴓𐴠 𐴘𐴥𐴡 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴝 𐴏𐴝𐴀𐴝𐴘𐴓𐴝𐴔 𐴊𐴠 , 𐴄𐴡𐴓𐴥𐴝𐴌𐴡𐴃 𐴀𐴝𐴣𐴀𐴝𐴌𐴝 𐴂𐴠𐴌𐴝𐴘 𐴊𐴠𐴌 𐴐𐴧𐴤𐴡𐴃 𐴎𐴡𐴕 𐴀𐴝𐴏𐴥𐴞 𐴉𐴥𐴟𐴣𐴖𐴥𐴝𐴣𐴃𐴞 𐴀𐴝𐴣𐴀𐴝𐴌 𐴒𐴤𐴡𐴌𐴒𐴟𐴐𐴧𐴞 𐴶 𐴎𐴡𐴕 𐴀𐴝𐴏𐴥𐴞 𐴱𐴱

𐴀𐴥𐴞𐴃𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠 𐴊𐴠 ! 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴝𐴌 𐴏𐴠𐴐𐴃𐴝 𐴓𐴡𐴘 𐴑𐴠𐴀𐴠𐴔𐴡𐴌 𐴃𐴧𐴟 𐴁𐴝𐴀𐴝𐴙𐴌 𐴀𐴥𐴡𐴘 𐴋𐴝𐴓𐴝𐴓𐴡𐴌 𐴃𐴟𐴌𐴥𐴟 𐴘𐴠 , 𐴄𐴠𐴑𐴕𐴝𐴉𐴡𐴌 𐴉𐴝𐴀𐴝𐴌𐴡𐴌 𐴁𐴤𐴟𐴃𐴡𐴌𐴠 𐴉𐴝𐴣𐴏𐴢 𐴊𐴞𐴕 𐴀𐴝𐴐𐴧𐴤𐴞𐴓𐴥𐴝𐴔 , 𐴘𐴥𐴝𐴀𐴝𐴕𐴃𐴟 𐴐𐴤𐴡𐴣𐴍𐴡 𐴕𐴦𐴡 𐴀𐴠𐴑𐴧𐴤𐴝𐴕 𐴓𐴡𐴘 𐴐𐴤𐴝𐴘𐴒𐴡𐴌𐴡𐴃 𐴎𐴝𐴘 𐴄𐴡𐴓𐴥𐴝𐴌𐴡𐴃 𐴀𐴟𐴄𐴧𐴤𐴞 , 𐴁𐴦𐴝𐴊𐴠 𐴔𐴝𐴎𐴤𐴞 𐴘𐴠 𐴀𐴝𐴣𐴀𐴝𐴌𐴝 𐴌𐴠 𐴀𐴞𐴕𐴋𐴟𐴕𐴞𐴆𐴤𐴙𐴝 𐴓𐴡𐴘 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴀𐴡𐴘 𐴐𐴤𐴝𐴘𐴒𐴡𐴌𐴡𐴃 𐴃𐴞𐴕 𐴊𐴞𐴕 𐴒𐴤𐴟𐴌𐴝𐴃 𐴃𐴤𐴝𐴙𐴑𐴧𐴤𐴙𐴠 , 𐴁𐴦𐴝𐴊𐴠 𐴑𐴟𐴓𐴡𐴌 𐴈𐴝𐴣𐴏𐴥𐴠 𐴒𐴡𐴌𐴥𐴞 𐴀𐴝𐴕𐴥𐴞 𐴔𐴝𐴎𐴤𐴞 𐴀𐴥𐴡𐴑𐴧𐴡𐴓 𐴊𐴤𐴝𐴘 𐴒𐴞𐴘𐴡𐴘 , 𐴁𐴦𐴝𐴊𐴠 𐴊𐴟𐴘𐴧𐴝𐴕 𐴕𐴦𐴡 𐴘𐴠 𐴀𐴝𐴣𐴀𐴝𐴌𐴝𐴌 𐴄𐴡𐴓𐴥𐴝𐴌 𐴒𐴤𐴝𐴕 𐴄𐴝𐴕𐴞 𐴑𐴟𐴓 𐴏𐴥𐴟𐴣𐴖𐴝𐴛 𐴊𐴞𐴘𐴠 𐴱𐴱

Sources : Ukhiyanews.com