𐴁𐴟𐴄 𐴓𐴡𐴘 𐴄𐴤𐴝𐴘𐴓𐴠𐴕 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴠 𐴶 𐴲 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴙𐴤𐴠 𐴱𐴱

𐴈𐴡𐴀𐴠𐴑 𐴇𐴥𐴝𐴉𐴃𐴝𐴌 𐴁𐴤𐴟𐴃𐴡𐴌𐴠 𐴁𐴟𐴄 𐴓𐴡𐴘 𐴄𐴤𐴝𐴘𐴓𐴠𐴕 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌𐴑𐴝𐴕𐴡𐴃 𐴀𐴝𐴌 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴃 𐴁𐴡𐴌𐴔𐴥𐴝𐴌 𐴕𐴠𐴁𐴤𐴞𐴌 𐴉𐴥𐴡𐴗𐴏𐴠 𐴶 𐴲 𐴲 𐴎𐴡𐴕 𐴓𐴡𐴃𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴷 𐴶 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴞 𐴓𐴡𐴘 𐴀𐴝𐴘𐴧𐴠𐴌 𐴊𐴠 𐴁𐴟𐴄 𐴊𐴟𐴘𐴧𐴝𐴕 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴚𐴡𐴂𐴥𐴟 𐴋𐴦𐴡 𐴐𐴤𐴡𐴀𐴡𐴌𐴡𐴌 𐴇𐴥𐴝𐴙𐴚 𐴒𐴞𐴌𐴥𐴞 𐴋𐴞𐴘𐴝𐴌 𐴈𐴝𐴣𐴏𐴥𐴠 𐴁𐴡𐴌𐴔𐴥𐴝𐴌 𐴕𐴠𐴁𐴤𐴞𐴌 𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴙𐴤𐴠 𐴱𐴱

𐴕𐴦𐴡 𐴀𐴡𐴓𐴝 𐴁𐴡𐴌𐴔𐴥𐴝 𐴰 𐴱 𐴎𐴡𐴕 𐴐𐴤𐴡𐴣𐴀𐴡 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕𐴡𐴌 𐴓𐴝 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 , 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴀𐴝𐴌𐴑𐴝𐴕𐴡𐴌 𐴊𐴠 𐴘𐴥𐴝𐴀𐴝𐴕 𐴀𐴥𐴡 𐴎𐴝𐴕𐴝 𐴒𐴞𐴘𐴠 𐴔𐴠𐴓𐴠𐴄𐴠𐴌𐴞 𐴌𐴥𐴠 𐴇𐴥𐴠𐴔𐴝𐴘𐴡𐴃 𐴒𐴡𐴌𐴥𐴠𐴊𐴠 𐴄𐴠𐴓𐴞𐴒𐴠𐴌𐴝𐴔 𐴆𐴠𐴕𐴥𐴠𐴓 𐴑𐴠𐴙𐴏𐴧𐴥𐴟 𐴘𐴠 𐴓𐴠𐴙𐴑𐴧𐴤𐴙𐴠 𐴊𐴠 𐴇𐴥𐴝𐴙𐴚 𐴒𐴞𐴌𐴥𐴞 𐴐𐴤𐴡𐴀𐴡𐴌 𐴔𐴠𐴌𐴥𐴠𐴔𐴦𐴡 𐴃𐴝𐴚 𐴎𐴝𐴊𐴞𐴌 𐴉𐴡𐴏𐴥𐴞𐴔 𐴋𐴤𐴝𐴑𐴤𐴡𐴌 𐴊𐴡𐴙𐴅𐴧𐴙𐴝𐴌 𐴔𐴟𐴌𐴡𐴊 𐴵𐴳 𐴵 𐴓𐴡𐴔𐴁𐴤𐴡𐴌 𐴓𐴝𐴌𐴥𐴝𐴘𐴌 𐴕𐴠𐴁𐴤𐴞 𐴘𐴠 𐴉𐴝𐴀𐴝𐴌𐴝 𐴊𐴠𐴌 𐴊𐴠 𐴀𐴡𐴑𐴃𐴤𐴡𐴃 𐴏𐴥𐴟𐴋𐴠 𐴅𐴙𐴡 𐴀𐴝𐴌 𐴎𐴠𐴘𐴝 𐴀𐴡𐴗𐴚 𐴕𐴝𐴔𐴡𐴌 𐴁𐴟𐴄 𐴊𐴟𐴘𐴧𐴝𐴕𐴡𐴌𐴠 𐴐𐴟𐴁𐴤𐴝 𐴒𐴡𐴌𐴥𐴞 𐴋𐴝𐴑𐴞 𐴀𐴝𐴕𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴁𐴡𐴕 𐴒𐴡𐴙𐴅𐴧𐴤𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴇𐴥𐴝𐴙𐴚 𐴒𐴞𐴌𐴥𐴞 𐴋𐴞𐴘𐴝𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴓𐴡𐴘 𐴎𐴝𐴘 𐴁𐴦𐴝𐴊𐴠 𐴘𐴥𐴝𐴀𐴝𐴕 𐴃𐴟 𐴀𐴡𐴙𐴕𐴧𐴡 𐴀𐴠𐴑𐴧𐴤𐴝𐴕 𐴎𐴝𐴒𐴝𐴃 𐴓𐴡𐴘 𐴒𐴞𐴘𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴀𐴥𐴠𐴕𐴋𐴞𐴓𐴧𐴝 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴀𐴝𐴘𐴧𐴠𐴌 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊 𐴹 𐴎𐴡𐴕 𐴀𐴝𐴌 𐴔𐴝𐴘𐴧𐴝 𐴲 𐴱 𐴎𐴡𐴕 𐴔𐴟𐴄 𐴱 𐴲 𐴎𐴡𐴕 𐴌𐴝𐴏𐴥𐴞𐴊𐴡𐴚 𐴀𐴠𐴓𐴝𐴑𐴝𐴌 𐴋𐴤𐴟𐴚 𐴂𐴥𐴝𐴙𐴑 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴊𐴡𐴙𐴅𐴧𐴙𐴝𐴌 𐴔𐴟𐴌𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴥𐴟𐴀𐴟𐴕 𐴁𐴦𐴝𐴊𐴠 𐴘𐴥𐴡 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑𐴡𐴃 𐴌𐴝𐴏𐴥𐴞𐴊𐴡𐴚 𐴀𐴠𐴓𐴝𐴑𐴝𐴌 𐴀𐴝𐴚𐴟 𐴔𐴦𐴡 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴊𐴡𐴙𐴅𐴧𐴙𐴝𐴃 𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴸 𐴳 𐴎𐴡𐴕 𐴁𐴟𐴄 𐴐𐴤𐴡𐴣𐴀𐴡 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴀𐴥𐴞𐴃𐴝𐴌𐴝 𐴌𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴡𐴓𐴧𐴝 𐴀𐴝𐴙𐴑𐴧𐴙𐴝𐴁𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴌𐴠𐴑𐴝𐴙𐴚 𐴕𐴥𐴠𐴎𐴞𐴚 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴎𐴞𐴕𐴊𐴞𐴒𐴞 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴎𐴡𐴕 𐴉𐴡𐴃𐴞 𐴀𐴠𐴑 𐴐𐴤𐴡𐴃 𐴓𐴝𐴑𐴡𐴌 𐴁𐴠𐴐𐴤𐴞 𐴄𐴞𐴛𐴝 𐴊𐴞𐴀𐴞 𐴋𐴤𐴝𐴑𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃 𐴎𐴝𐴀𐴝𐴌 𐴒𐴤𐴡𐴘 𐴊𐴠 𐴁𐴡𐴓𐴞 𐴑𐴠𐴀𐴠𐴔𐴡𐴃𐴧𐴟 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

Sources : RFAburmese