𐴔𐴡𐴚𐴋𐴤𐴟𐴃 𐴁𐴝𐴒𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 𐴈𐴡𐴀𐴡𐴘 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴊𐴞𐴀𐴞 𐴔𐴟𐴏𐴥𐴡𐴓𐴔𐴝𐴕 𐴀𐴥𐴟𐴑𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕 𐴁𐴡𐴕 𐴒𐴡𐴙𐴅𐴧𐴙𐴤𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴑𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕𐴡𐴌𐴠 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴀𐴝𐴌𐴏𐴝 𐴉𐴦𐴝𐴄𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 𐴁𐴡𐴓𐴞 𐴐𐴤𐴡𐴕𐴊𐴡 𐴒𐴡𐴌𐴥𐴞 𐴁𐴡𐴕 𐴒𐴡𐴙𐴅𐴧𐴙𐴤𐴠 𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 𐴱𐴱

𐴁𐴡𐴕 𐴒𐴡𐴙𐴅𐴧𐴙𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴞𐴁𐴤𐴝 𐴀𐴥𐴡𐴙𐴓𐴊𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴀𐴟𐴃𐴧𐴡𐴌𐴠 𐴑𐴤𐴞𐴘𐴝𐴌𐴞 𐴉𐴝𐴌𐴝𐴚𐴡𐴌 𐴀𐴥𐴟𐴑𐴆𐴤𐴟𐴑 𐴌𐴥𐴠𐴔𐴥𐴟 / 𐴀𐴝𐴕 𐴖𐴝𐴌 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌 𐴱𐴱

𐴀𐴥𐴞𐴃𐴝𐴌𐴥𐴠 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴌 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴁𐴞𐴀𐴞𐴕𐴧𐴝 ، 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴝𐴕𐴋𐴤𐴝𐴌𐴠 𐴀𐴝𐴏𐴥𐴠𐴊𐴠 𐴕𐴥𐴝𐴙𐴚 𐴆𐴤𐴙𐴡𐴚 𐴒𐴤𐴝𐴣𐴄𐴞𐴌 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴐𐴠 𐴄𐴠𐴓𐴥𐴞 𐴉𐴥𐴟𐴕 𐴒𐴡𐴌𐴥𐴞 𐴒𐴤𐴝𐴣𐴄𐴞𐴃 𐴔𐴝𐴃𐴝𐴘 𐴓𐴡𐴘 𐴒𐴞𐴘𐴠 ، 𐴁𐴦𐴝𐴊𐴠 𐴀𐴝𐴌𐴏𐴝 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 𐴈𐴡𐴀𐴡𐴘 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴊𐴞𐴀𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴠 𐴁𐴡𐴓𐴞 𐴀𐴥𐴞𐴁𐴤𐴝𐴌 𐴁𐴠𐴐𐴤𐴞 𐴈𐴝𐴣𐴏𐴥𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴕𐴝𐴌𐴞𐴕 𐴎𐴝𐴌𐴝 𐴌𐴥𐴠 𐴈𐴡𐴘𐴧𐴠 𐴱𐴱

𐴀𐴥𐴟𐴑𐴆𐴧𐴟𐴑 𐴌𐴥𐴠𐴔𐴥𐴟 𐴀𐴥𐴞𐴁𐴤𐴝 𐴀𐴝𐴌𐴏𐴝 𐴉𐴦𐴝𐴄𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 ، 𐴀𐴥𐴞𐴃𐴝𐴌𐴝 𐴌𐴠 𐴈𐴥𐴝𐴕𐴝 𐴉𐴝𐴕𐴥𐴞 𐴈𐴥𐴝𐴁𐴝 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴔𐴡𐴊𐴡𐴊 𐴀𐴥𐴡 𐴒𐴡𐴌𐴥𐴠 ، 𐴀𐴠𐴕𐴋𐴞𐴓𐴧𐴝 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴊𐴞𐴀𐴞 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴁𐴡𐴓𐴠 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴃𐴝𐴌𐴠 𐴀𐴠𐴈𐴥𐴡𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴀𐴝𐴏𐴥𐴠𐴊𐴠 𐴔𐴠𐴓𐴠𐴄𐴠𐴌𐴞𐴌 𐴔𐴟𐴃𐴦𐴝𐴓𐴧𐴠𐴑 𐴇𐴥𐴠𐴉𐴝𐴎𐴡𐴃𐴞 𐴉𐴥𐴡𐴗𐴏𐴢 ( 𐴏𐴥𐴝 𐴌𐴥𐴝 𐴂𐴥𐴝 ) 𐴉𐴥𐴡𐴗𐴏𐴡𐴌 𐴀𐴡𐴉𐴥𐴞𐴏𐴡𐴃 𐴕𐴞𐴎𐴝𐴘 𐴏𐴥𐴝𐴙𐴑 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴃 𐴀𐴝𐴙𐴏𐴑𐴝𐴙𐴓 𐴀𐴝𐴌𐴏𐴥𐴝 𐴉𐴝𐴄𐴞 𐴘𐴠 𐴄𐴤𐴠𐴚 𐴎𐴡𐴔𐴝𐴘 𐴁𐴦𐴝𐴊𐴠 𐴔𐴝𐴕𐴥𐴟𐴙𐴐𐴢 𐴇𐴥𐴝𐴘𐴎𐴤𐴝𐴑 𐴒𐴡𐴌𐴥𐴞 𐴄𐴞𐴛𐴝 𐴓𐴟𐴖𐴝 𐴀𐴝𐴌 𐴋𐴝𐴣𐴈𐴝𐴃𐴞 𐴒𐴡𐴌𐴥𐴝 𐴁𐴠𐴐𐴤𐴞 𐴀𐴥𐴡𐴘𐴧𐴠 𐴁𐴡𐴓𐴞 ، 𐴁𐴝𐴕𐴡𐴄𐴞 𐴈𐴥𐴡𐴁𐴡𐴌 𐴈𐴡𐴊𐴦𐴞𐴕 𐴁𐴝𐴕𐴝𐴘 ( 𐴀𐴠 𐴀𐴠 ) 𐴔𐴡𐴒𐴢 𐴁𐴝𐴒𐴞 𐴘𐴠 ، 𐴀𐴠𐴓𐴝𐴑𐴝 𐴏𐴥𐴝𐴉𐴢 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴀𐴝𐴒𐴝 𐴒𐴟𐴌𐴝 𐴊𐴡𐴕𐴐𐴤𐴠𐴌 ، 𐴈𐴥𐴝𐴏𐴢 𐴒𐴡𐴌𐴥𐴞 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴁𐴠𐴐𐴤𐴞 𐴱𐴱

Sources : Burmese.narinjara.com