𐴀𐴝𐴙𐴑𐴧𐴙𐴝𐴁𐴡𐴃 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴘𐴊𐴠𐴐𐴤𐴞 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓 𐴀𐴝𐴌 𐴏𐴥𐴡𐴉𐴝𐴌𐴡𐴃 𐴈𐴥𐴝𐴕𐴝 𐴏𐴦𐴡𐴛𐴊𐴝𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴑𐴤𐴠𐴂𐴧𐴝 𐴌𐴟𐴇𐴝𐴙𐴚𐴒𐴙𐴝 𐴁𐴦𐴝𐴊𐴠 𐴀𐴝𐴌 𐴈𐴡𐴕𐴥𐴞𐴑𐴧𐴤𐴙𐴝 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴃𐴡 𐴕𐴥𐴡 𐴊𐴠𐴀𐴠 𐴱𐴱

𐴀𐴝𐴌𐴑𐴝𐴕𐴡𐴃 , 𐴀𐴝𐴙𐴑𐴧𐴙𐴝𐴁𐴡𐴃 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴘𐴊𐴠𐴐𐴤𐴞 𐴏𐴥𐴡𐴉𐴞𐴌 𐴀𐴝𐴌 𐴏𐴥𐴡𐴉𐴝𐴌𐴡𐴃 𐴈𐴥𐴝𐴕𐴝 𐴏𐴦𐴡𐴛𐴊𐴝𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴡𐴌𐴠 , 𐴒𐴡𐴃𐴡 𐴈𐴝𐴙𐴓𐴧𐴝 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴱 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴂𐴠𐴌𐴦𐴝𐴘 𐴰 𐴳 : 𐴹 𐴁𐴝𐴎𐴠 𐴋𐴞𐴐𐴄𐴤𐴞𐴑 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴉𐴥𐴞𐴏𐴡𐴃 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 , 𐴐𐴤𐴟𐴊𐴠 𐴀𐴥𐴞𐴃𐴝𐴌𐴥𐴝𐴌 𐴑𐴤𐴠𐴂𐴧𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴘𐴥𐴠 𐴊𐴡𐴓𐴝 𐴒𐴡𐴌𐴥𐴝𐴘𐴧𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 , 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞𐴁𐴤𐴝𐴌 𐴐𐴤𐴡𐴣𐴀𐴡𐴃, 𐴁𐴝𐴕𐴝𐴀𐴡𐴄𐴞 𐴔𐴞𐴏𐴥𐴝 𐴈𐴡𐴃𐴤𐴝 𐴈𐴡𐴘𐴁𐴤𐴡𐴓𐴧𐴝 𐴁𐴝𐴕𐴝𐴘 𐴉𐴝𐴓𐴞 𐴌𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴑𐴤𐴠𐴂𐴧𐴝 𐴀𐴥𐴟𐴀𐴟𐴕 𐴀𐴝𐴌 𐴑𐴤𐴠𐴂𐴧𐴝 𐴀𐴥𐴟𐴀𐴟𐴕𐴡𐴌 𐴀𐴥𐴝𐴃𐴡𐴃 𐴀𐴝𐴏𐴥𐴠𐴊𐴠 , 𐴑𐴠𐴀𐴠𐴔 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴋𐴝𐴑𐴞 𐴀𐴝𐴕𐴥𐴞 𐴊𐴡𐴓𐴝 𐴒𐴡𐴌𐴥𐴝𐴘 𐴁𐴦𐴝𐴊𐴠 , 𐴊𐴦𐴟𐴛𐴅𐴧𐴙𐴝 𐴂𐴠𐴌𐴦𐴝𐴘 𐴰 𐴳 : 𐴲 𐴁𐴝𐴎𐴠 𐴏𐴝𐴑𐴧𐴞𐴉𐴝𐴌𐴝𐴌 𐴑𐴠𐴀𐴠𐴔𐴡𐴃 𐴔𐴝𐴎𐴤𐴠 𐴕𐴞𐴎𐴝𐴘 𐴊𐴠𐴈𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴝𐴙𐴑𐴧𐴙𐴝𐴁𐴡𐴃 𐴓𐴡𐴘 𐴒𐴞𐴘𐴠𐴊𐴠 𐴏𐴥𐴡𐴉𐴞𐴌 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 ” 𐴄𐴤𐴝𐴘𐴓𐴠𐴕 , 𐴓𐴝𐴀𐴟 , 𐴕𐴞𐴂𐴥𐴡 𐴏𐴞𐴌𐴞𐴓𐴡𐴚𐴑𐴤𐴝 , 𐴁𐴝𐴚𐴓𐴝𐴊𐴠𐴐𐴢 , 𐴏𐴡𐴀𐴟𐴊𐴞𐴀𐴝𐴌𐴡𐴁 , 𐴁𐴡𐴌𐴝𐴎𐴞𐴓 ” 𐴀𐴠 𐴇𐴥𐴝𐴣𐴃 𐴊𐴠𐴐𐴡𐴌 𐴏𐴥𐴡𐴉𐴞𐴌 𐴀𐴝𐴌 𐴏𐴥𐴡𐴉𐴝𐴌𐴡𐴃 𐴈𐴥𐴝𐴕𐴝 𐴏𐴦𐴡𐴛𐴊𐴝𐴌 𐴉𐴥𐴡𐴗𐴏𐴢 𐴀𐴝𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓 , 𐴀𐴝𐴌 𐴀𐴞𐴃𐴝𐴌𐴝𐴌 𐴉𐴥𐴟𐴣𐴖𐴝𐴣𐴃𐴞 𐴔𐴠𐴓𐴠𐴄𐴠𐴌𐴞 , 𐴉𐴟𐴓𐴞𐴐𐴢 , 𐴓𐴟𐴕𐴄𐴤𐴞𐴚 , 𐴐𐴤𐴝𐴊𐴝 𐴉𐴟𐴐𐴤𐴝𐴑 𐴓𐴡𐴘 𐴏𐴞𐴛𐴝𐴍𐴞 𐴀𐴝𐴌 𐴏𐴥𐴝 𐴌𐴥𐴝 𐴂𐴥𐴝 , 𐴀𐴠 𐴋𐴝𐴀𐴝𐴘 𐴁𐴠𐴒𐴧𐴤𐴟𐴕 𐴀𐴥𐴞𐴃𐴝𐴌𐴝𐴌 𐴉𐴥𐴟𐴣𐴖𐴝𐴣𐴃𐴞 𐴀𐴝𐴏𐴥𐴠 , 𐴃𐴡𐴀𐴡𐴘 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴌𐴑𐴝𐴕𐴡𐴃 𐴎𐴤𐴝𐴑𐴧𐴗𐴝 𐴈𐴝𐴍𐴝 𐴔𐴝𐴌𐴝 , 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴝 , 𐴒𐴤𐴡𐴌 𐴁𐴝𐴌𐴞 𐴉𐴟𐴌𐴝 𐴊𐴞𐴘𐴝 𐴀𐴝𐴌 𐴏𐴝𐴑𐴧𐴞 𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴉𐴟𐴑𐴡𐴃𐴧𐴟 𐴀𐴝𐴏𐴥𐴠𐴊𐴠 𐴔𐴡𐴏𐴥𐴡𐴙𐴃𐴡𐴃 𐴒𐴤𐴡𐴓𐴞 𐴀𐴡𐴙𐴃𐴧𐴡𐴏𐴝𐴌 , 𐴀𐴞𐴀𐴞𐴕 𐴑𐴠𐴙𐴏𐴧𐴥𐴟 𐴕𐴥𐴡 𐴒𐴡𐴌𐴥𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴐𐴡𐴑𐴤𐴡𐴓 𐴁𐴝𐴕𐴝𐴘 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴦𐴟𐴕𐴡𐴌 𐴊𐴟𐴖𐴝𐴌𐴝 𐴈𐴟𐴀𐴝 𐴁𐴝𐴘𐴧𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴉𐴝𐴙𐴓𐴧𐴝 𐴒𐴟𐴓𐴝𐴔 𐴑𐴤𐴠𐴂𐴧𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 … 𐴀𐴡𐴚𐴔𐴝𐴚𐴓𐴝 𐴌𐴥𐴠𐴑𐴧𐴤𐴗𐴥𐴝𐴌 / 𐴀𐴥𐴟 𐴐𐴗𐴠 𐴓𐴥𐴝 , 𐴁𐴡𐴋𐴟𐴂𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴀𐴥𐴟 𐴐𐴗𐴠 𐴔𐴡𐴚 , 𐴀𐴠𐴈𐴥𐴡𐴕 𐴆𐴤𐴙𐴡𐴚 𐴓𐴥𐴝 𐴏𐴡𐴔𐴥𐴝 𐴉𐴝𐴌𐴝𐴃 𐴃𐴤𐴝𐴑𐴠𐴊𐴠 / 𐴀𐴥𐴟 𐴑𐴞𐴚 𐴔𐴡𐴚 𐴓𐴥𐴝 , 𐴀𐴞𐴃𐴝𐴌𐴥𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴈𐴡𐴕𐴥𐴡 𐴈𐴡𐴃𐴤𐴝 𐴕𐴥𐴡 𐴈𐴡𐴀𐴡 , 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴠 𐴎𐴠𐴈𐴥𐴡𐴕 , 𐴇𐴥𐴡𐴑𐴟𐴔𐴡𐴃𐴠 𐴃𐴟𐴣𐴖𐴥𐴝𐴌𐴝 𐴌𐴠 ( 𐴕𐴝𐴙𐴚𐴠𐴕 𐴏𐴥𐴝 𐴏𐴞 𐴏𐴥𐴝𐴘𐴌𐴥𐴠 𐴑𐴝𐴀𐴝𐴋 ) 𐴊𐴞𐴘𐴠𐴕𐴥𐴠 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 𐴔𐴡𐴕𐴃𐴡𐴌 / 𐴀𐴥𐴟 𐴐𐴗𐴠 𐴓𐴥𐴝 𐴘𐴠 𐴈𐴡𐴘𐴧𐴠𐴊𐴠 𐴀𐴝𐴣𐴀𐴝𐴌𐴝 𐴌𐴠 𐴊𐴞𐴘𐴠 𐴁𐴝𐴑𐴞 𐴀𐴝𐴏𐴥𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴀𐴡𐴓𐴉𐴡 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴊𐴞𐴀𐴞𐴁𐴡 , 𐴔𐴡𐴕𐴃𐴡𐴌 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴡𐴌𐴠 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴠 𐴎𐴠𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴓𐴥𐴟𐴔𐴡𐴌 𐴁𐴝𐴁𐴡𐴃𐴠 𐴑𐴤𐴟𐴓𐴝 𐴐𐴞𐴣𐴍𐴥𐴞 𐴊𐴞𐴀𐴞 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱

Sources : A E N