𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴃𐴠 𐴇𐴥𐴝𐴃𐴠 𐴀𐴥𐴝𐴣𐴃𐴞𐴘𐴝𐴌 𐴱𐴱

𐴀𐴠𐴈𐴥𐴡𐴕 𐴀𐴠 𐴁𐴠 𐴏𐴥𐴝𐴀𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴃𐴠 𐴇𐴥𐴝𐴃𐴠 𐴀𐴥𐴝𐴣𐴃𐴞𐴘𐴝𐴌 , 𐴀𐴠𐴑𐴧𐴟 𐴉𐴥𐴟𐴣𐴖𐴝𐴣𐴃𐴞 𐴈𐴡𐴀𐴠𐴑 𐴊𐴡𐴌𐴎𐴤𐴡𐴕 𐴀𐴝𐴃𐴡𐴚𐴁𐴝𐴊𐴞 𐴉𐴝𐴄𐴞 𐴀𐴟𐴙𐴄𐴧𐴤𐴙𐴠 , 𐴈𐴡𐴃𐴤𐴝𐴃 𐴈𐴡𐴃𐴤𐴝𐴃 𐴈𐴝𐴍𐴝 𐴈𐴝𐴍𐴞 , 𐴀𐴥𐴝𐴣𐴎𐴝𐴘 𐴉𐴥𐴠𐴓𐴝 , 𐴇𐴥𐴡𐴌𐴡𐴕 𐴒𐴡𐴌𐴥𐴝 , 𐴔𐴝𐴌𐴝 𐴔𐴝𐴌𐴞 , 𐴏𐴝𐴣𐴊𐴝 𐴁𐴝𐴎𐴞 , 𐴕𐴞𐴐𐴤𐴝 𐴀𐴝𐴌 𐴉𐴡𐴙𐴃𐴧𐴡 𐴊𐴞𐴕 𐴎𐴠𐴕𐴥𐴝𐴌 𐴒𐴤𐴡𐴄𐴡𐴕𐴝 , 𐴎𐴞𐴀𐴞𐴕𐴡𐴌 𐴉𐴥𐴡𐴓𐴡𐴃 𐴊𐴞𐴕 𐴊𐴞𐴕 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴉𐴟𐴓𐴞𐴐𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴷 𐴱 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴁𐴞𐴁𐴤𐴞𐴕𐴧𐴡 𐴔𐴦𐴝𐴔𐴠𐴓𐴝 𐴓𐴡𐴘 𐴰 𐴰 𐴰 𐴳 𐴃𐴞𐴕 𐴇𐴥𐴝𐴎𐴝𐴌𐴡𐴌 𐴀𐴟𐴖𐴡𐴌𐴠 𐴑𐴠𐴙𐴏𐴢 𐴁𐴝𐴕𐴝𐴘𐴧𐴝 𐴀𐴝𐴏𐴥𐴠 , 𐴈𐴡𐴔𐴡𐴃 𐴇𐴥𐴝𐴣𐴃 𐴇𐴥𐴝𐴎𐴝𐴌𐴡𐴌 𐴀𐴟𐴖𐴡𐴌𐴠 𐴀𐴝𐴐𐴤𐴝𐴔𐴞 𐴀𐴝𐴏𐴥𐴠 , 𐴈𐴡𐴔𐴡𐴃 𐴹 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴑𐴤𐴟𐴕 𐴀𐴥𐴡𐴘𐴧𐴠 , 𐴀𐴠 𐴇𐴥𐴞𐴏𐴝𐴁 𐴑𐴞𐴃𐴝𐴁𐴠 𐴓𐴡𐴘 𐴁𐴟𐴎𐴤𐴞 𐴏𐴡𐴀𐴡, 𐴀𐴟𐴑𐴤𐴞𐴘𐴝 𐴄𐴠𐴑𐴕𐴝𐴉𐴢 𐴳 𐴳 𐴐𐴤𐴝𐴕 𐴑𐴠𐴀𐴠𐴔𐴡𐴃 𐴈𐴡𐴊𐴤𐴞𐴒𐴧𐴤𐴞𐴕 𐴀𐴡𐴉𐴥𐴡𐴌𐴝𐴊 𐴁𐴝𐴌𐴥𐴞 𐴒𐴞𐴘𐴥𐴠 , 𐴀𐴠 𐴈𐴝𐴌𐴡𐴕𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴑𐴠𐴀𐴠𐴔𐴡𐴃 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴕𐴞𐴌𐴝𐴉𐴡𐴃𐴧𐴝 𐴕𐴥𐴝𐴘 , 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴥𐴟𐴔 𐴀𐴡𐴙𐴃𐴧𐴡𐴏𐴝𐴌 𐴁𐴠𐴐𐴤𐴞 𐴁𐴝𐴌𐴥𐴞 𐴒𐴞𐴘𐴡𐴘 𐴈𐴡𐴀𐴡𐴘 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔 𐴏𐴥𐴝𐴌𐴞 𐴊𐴤𐴝𐴌 𐴒𐴤𐴡𐴘 𐴱𐴱

𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠𐴊𐴠 , 𐴈𐴝𐴌𐴥𐴠 𐴈𐴡𐴃𐴤𐴡𐴑𐴧𐴡𐴕𐴡𐴃 𐴊𐴞𐴕𐴡𐴃 𐴔𐴝𐴌𐴠𐴌 𐴕𐴠 𐴌𐴝𐴙𐴃𐴡𐴃 𐴔𐴝𐴌𐴠𐴌 𐴈𐴡𐴕𐴥𐴡 𐴉𐴝𐴄𐴧𐴝 𐴕𐴥𐴝𐴘 , 𐴊𐴟𐴕𐴘𐴝𐴘 𐴊𐴝𐴌𐴞 𐴁𐴤𐴝𐴓𐴝 𐴕𐴡 𐴓𐴝𐴒𐴠𐴌 , 𐴀𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴓𐴥𐴡 𐴊𐴠 , 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴈𐴡𐴃𐴡 𐴋𐴦𐴡𐴙𐴓𐴧𐴝 𐴀𐴥𐴡𐴘 𐴒𐴞𐴘𐴡𐴘 , 𐴀𐴝𐴃𐴡𐴚𐴁𐴝𐴊𐴞 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓𐴠 𐴃𐴝𐴌𐴥𐴝 𐴃𐴝𐴌𐴥𐴝 𐴀𐴝𐴉𐴥𐴡𐴏𐴡𐴃 𐴔𐴝𐴌𐴝 𐴔𐴝𐴌𐴞 𐴒𐴡𐴌𐴥𐴞 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴀𐴝𐴣𐴀𐴝𐴌𐴝𐴌 𐴃𐴧𐴟 𐴴 𐴲 𐴒𐴤𐴡𐴕𐴄𐴝 𐴒𐴟𐴓𐴞𐴌 𐴋𐴡𐴌𐴡𐴃 𐴁𐴡𐴐𐴤𐴡𐴃𐴞 𐴒𐴡𐴌𐴥𐴝 𐴉𐴡𐴌𐴠𐴌 , 𐴈𐴥𐴡𐴌𐴝𐴁 𐴔𐴝𐴙𐴕𐴐𐴤𐴡𐴌 𐴒𐴟𐴌𐴥𐴟𐴉𐴢 𐴈𐴡𐴊𐴤𐴟𐴒𐴧𐴟𐴕 𐴀𐴝𐴏𐴥𐴠 𐴀𐴥𐴡𐴃 𐴕𐴥𐴝𐴘 𐴱𐴱

𐴐𐴤𐴡𐴕 𐴷 𐴱 𐴰 𐴲 𐴐𐴤𐴡𐴕𐴡𐴌 𐴀𐴝𐴒𐴠 𐴀𐴝𐴌 𐴁𐴦𐴝𐴊𐴠 𐴀𐴡𐴉𐴥𐴌𐴝𐴊𐴡𐴌 𐴇𐴥𐴞𐴏𐴝𐴁𐴢 𐴔𐴞𐴓𐴝𐴘 𐴏𐴝𐴀𐴝 𐴒𐴞𐴘𐴠 , 𐴁𐴝𐴙𐴅𐴧𐴤𐴙𐴠 𐴊𐴠 𐴀𐴡𐴉𐴥𐴡𐴌𐴝𐴊 𐴀𐴥𐴞𐴀𐴞𐴕𐴡𐴌 𐴐𐴤𐴡𐴃𐴑𐴝𐴌𐴝 𐴰 𐴶 𐴄𐴤𐴝𐴕𐴡𐴌 𐴎𐴞𐴔𐴧𐴝𐴊𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴓𐴞 𐴈𐴡𐴀𐴡𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 , 𐴀𐴝𐴣𐴀𐴝𐴌𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴞𐴐𐴑𐴟𐴓 𐴔𐴡𐴊𐴡𐴌𐴡𐴏𐴥𐴝𐴃 𐴎𐴝𐴀𐴝𐴌 𐴊𐴠 𐴈𐴡𐴕𐴥𐴡 𐴕𐴞𐴌𐴝𐴉𐴡𐴃𐴧𐴝 𐴕𐴥𐴝𐴘 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴐𐴤𐴡𐴔𐴡𐴏𐴃𐴡 𐴁𐴠𐴒𐴧𐴤𐴞𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴌 𐴇𐴥𐴝𐴃𐴡𐴃 , 𐴏𐴥𐴝𐴔𐴧𐴠 𐴀𐴝𐴣𐴀𐴝𐴌𐴝 𐴒𐴤𐴡𐴌𐴡𐴌 𐴁𐴝𐴀𐴞𐴌𐴠 𐴕𐴠𐴀𐴠𐴓𐴞 𐴉𐴝𐴙𐴅𐴧𐴟𐴔 𐴊𐴠 𐴁𐴟𐴎𐴤𐴝 𐴕𐴡 𐴎𐴝𐴀𐴝𐴌 , 𐴀𐴝𐴣𐴀𐴝𐴌𐴝𐴌 𐴀𐴝𐴁𐴡𐴏𐴃𐴤𐴝 𐴘𐴥𐴡 𐴈𐴡𐴕𐴥𐴡 𐴉𐴡𐴓𐴡𐴏𐴃𐴞𐴕𐴡𐴌 𐴋𐴦𐴡𐴙𐴓𐴧𐴝 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘𐴕𐴠 𐴈𐴡𐴕𐴡𐴀𐴡 ⸮ 𐴁𐴡𐴓𐴞 𐴈𐴡𐴀𐴡𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴱𐴱

Sources : Ukhiyanews.com