𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴈𐴡𐴙𐴆𐴧𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴒𐴟𐴓𐴞 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴈𐴥𐴡𐴌𐴝𐴁 𐴔𐴝𐴕𐴥𐴟𐴙𐴐𐴢 𐴈𐴡𐴊𐴦𐴟𐴕𐴠 𐴀𐴟𐴑𐴤𐴞𐴘𐴝 𐴸 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 , 𐴋𐴝𐴁𐴓𐴙𐴟 𐴁𐴞 𐴁𐴡𐴓𐴡𐴑𐴡𐴃 , 𐴀𐴥𐴝𐴣𐴎𐴡𐴙𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴷 𐴁𐴝𐴎𐴠 𐴒𐴟𐴓𐴞 𐴔𐴝𐴌𐴞 , 𐴶 𐴱 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 / 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴢 ( 𐴁𐴝𐴉𐴢 ) 𐴇𐴝𐴔𐴞𐴊 𐴇𐴟𐴏𐴠𐴙𐴕 , 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴞𐴐𐴟𐴌 𐴀𐴠𐴑 𐴎𐴡𐴕𐴡𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴁𐴝𐴒𐴞 𐴒𐴟𐴌𐴥𐴟𐴉𐴡𐴌 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴔𐴝𐴌𐴝 𐴒𐴞𐴘𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴢 , 𐴉𐴟𐴖𐴝 𐴀𐴥𐴞𐴁𐴤𐴝 𐴸 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴉𐴟𐴑 𐴇𐴠𐴉𐴎𐴤𐴡 𐴈𐴥𐴝𐴕𐴝𐴌 𐴉𐴡𐴌𐴥𐴡𐴙𐴕𐴧𐴝 𐴉𐴟𐴖𐴝 , 𐴀𐴥𐴞𐴃𐴝𐴌𐴠 𐴈𐴡𐴕𐴥𐴡 𐴐𐴟𐴁𐴤𐴝𐴌 𐴀𐴟𐴖𐴡𐴌𐴠 𐴔𐴝𐴙𐴅𐴧𐴤𐴙𐴠 𐴁𐴡𐴓𐴞 𐴀𐴝𐴕𐴃𐴝𐴎 𐴒𐴡𐴌𐴥𐴝 𐴎𐴝𐴀𐴝𐴌 , 𐴴 𐴱 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴁𐴡𐴌𐴡 / 𐴔𐴟𐴇𐴝𐴔𐴧𐴡𐴊 𐴏𐴝𐴘𐴉𐴟𐴎 𐴎𐴡𐴔𐴝𐴕𐴠 𐴈𐴡𐴘𐴧𐴠𐴊𐴠 𐴱𐴱

𐴈𐴥𐴡𐴌𐴝𐴁 𐴔𐴝𐴙𐴕𐴐𐴤𐴡𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 , 𐴀𐴝𐴕𐴊𐴤𐴝𐴌𐴡𐴃 𐴑𐴠𐴀𐴠𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌𐴠 𐴒𐴟𐴓𐴞 𐴔𐴝𐴌𐴞 𐴊𐴤𐴝𐴘 𐴒𐴞𐴘𐴡𐴘 , 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴐𐴤𐴡𐴎𐴟𐴒𐴞𐴃𐴝 𐴊𐴤𐴡𐴌𐴝 𐴊𐴤𐴡𐴌𐴞 𐴒𐴡𐴌𐴥𐴞 , 𐴒𐴟𐴓𐴞 𐴈𐴥𐴝𐴘𐴧𐴝 𐴉𐴟𐴖𐴝 𐴀𐴥𐴞𐴁𐴝𐴌𐴠 𐴇𐴥𐴝𐴐𐴉𐴝𐴃𐴝𐴓𐴡𐴃 𐴀𐴝𐴕𐴥𐴠𐴌 𐴊𐴠 𐴉𐴡𐴣𐴃𐴤𐴡𐴃 𐴔𐴡𐴌𐴞 𐴒𐴞𐴘𐴡𐴘 , 𐴓𐴝𐴐𐴢 𐴔𐴟𐴀𐴝𐴘𐴕𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴝𐴑𐴏𐴡 𐴁𐴝𐴎𐴝𐴌 𐴏𐴥𐴡𐴊𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴒𐴞𐴘𐴠 𐴱𐴱

𐴀𐴥𐴞𐴁𐴤𐴝𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴐𐴤𐴡𐴁𐴝𐴁𐴤𐴞𐴑 𐴄𐴤𐴞𐴑 𐴌𐴝𐴑𐴤𐴞𐴁𐴤𐴡𐴓𐴧𐴝 , 𐴒𐴤𐴡𐴄𐴡𐴕𐴝𐴌 𐴎𐴝𐴒𐴝𐴃 𐴑𐴤𐴟𐴁 𐴁𐴠𐴐𐴤𐴞 𐴒𐴡𐴌𐴥𐴞 𐴉𐴟𐴓𐴞𐴐𐴢 𐴔𐴟𐴃𐴦𐴝𐴙𐴕 𐴒𐴡𐴌𐴥𐴝 𐴒𐴞𐴘𐴠 , 𐴑𐴤𐴟𐴕𐴞 𐴀𐴥𐴡𐴑𐴧𐴡𐴓𐴡𐴌𐴠 𐴃𐴟𐴖𐴝𐴘 𐴊𐴤𐴡𐴌𐴞𐴁𐴤𐴝𐴌 𐴑𐴝𐴌𐴖𐴝𐴘 𐴏𐴡𐴓𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

Sources : Ukhiyanews.com