𐴀𐴝𐴙𐴑𐴧𐴙𐴝𐴁𐴡𐴃 𐴉𐴟𐴓𐴞𐴐𐴢 𐴊𐴟𐴘 𐴎𐴡𐴕𐴠 𐴂𐴝𐴂𐴓𐴥𐴞𐴑𐴡𐴌 𐴇𐴥𐴝𐴣𐴏𐴢 𐴁𐴡𐴊𐴡𐴓𐴞 ، 𐴌𐴝𐴏𐴧𐴝 𐴁𐴝𐴀𐴝𐴘 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴓𐴟𐴄 𐴔𐴝𐴌 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴌 𐴀𐴝𐴙𐴑𐴧𐴙𐴝𐴁𐴡𐴃 𐴶 𐴳 𐴓𐴡𐴔𐴁𐴤𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃𐴧𐴟 ، 𐴏𐴝𐴔𐴌𐴝𐴌 𐴉𐴥𐴞𐴑𐴄𐴞𐴌𐴞𐴃 𐴀𐴝𐴀𐴝𐴘 𐴀𐴝𐴋𐴧𐴝 𐴔𐴝𐴌𐴞 𐴃𐴤𐴝𐴙𐴑𐴧𐴙𐴤𐴠𐴊𐴠 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌 𐴃𐴧𐴟 ، 𐴉𐴟𐴓𐴞𐴐𐴢 𐴊𐴟𐴘 𐴎𐴡𐴕𐴠 𐴂𐴝𐴂𐴓𐴥𐴞𐴑𐴡𐴌 𐴇𐴥𐴝𐴣𐴏𐴢 𐴁𐴡𐴊𐴡𐴓𐴞 ، 𐴌𐴝𐴏𐴧𐴝 𐴁𐴝𐴀𐴝𐴘 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴦𐴡𐴣𐴏𐴥𐴞 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴞 𐴄𐴞𐴛𐴝 𐴉𐴡𐴘𐴐𐴤𐴝 𐴓𐴡𐴘 𐴉𐴥𐴠𐴓𐴝𐴀𐴝𐴌 𐴱𐴱

𐴀𐴝𐴙𐴑𐴧𐴙𐴝𐴁𐴡𐴌 𐴑𐴤𐴡𐴗𐴚 𐴋𐴤𐴟 𐴑𐴤𐴝 𐴉𐴝𐴌𐴝 ، 𐴑𐴤𐴡𐴗𐴚 𐴋𐴤𐴟 𐴑𐴤𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 ، 𐴁𐴡𐴋𐴟𐴂𐴥𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 ، 𐴀𐴥𐴟𐴕𐴋𐴦𐴡 𐴅𐴤𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔 ، 𐴀𐴥𐴟𐴕𐴋𐴦𐴡 𐴆𐴙𐴠 𐴀𐴝𐴌𐴀𐴥𐴡 𐴀𐴥𐴠𐴕𐴋𐴞𐴓𐴧𐴝 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟 ، 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠𐴌 𐴊𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 ، 𐴀𐴟𐴖𐴡𐴌𐴠 𐴈𐴟𐴀𐴝 𐴒𐴞𐴘𐴠𐴊𐴠 𐴉𐴟𐴓𐴞𐴐𐴢 𐴊𐴟𐴕𐴥𐴞 𐴎𐴡𐴕𐴠 𐴓𐴟𐴄 𐴔𐴝𐴌 𐴀𐴝𐴌 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴠𐴌 𐴊𐴠 𐴀𐴥𐴞𐴀𐴞𐴕 𐴀𐴥𐴡𐴀𐴡𐴌 𐴊𐴧𐴠 𐴱𐴱

𐴀𐴟𐴖𐴡𐴌𐴠 𐴈𐴟𐴀𐴝 𐴒𐴞𐴘𐴠𐴊𐴠 𐴉𐴟𐴓𐴞𐴐𐴢 𐴊𐴟𐴕𐴥𐴞 𐴎𐴡𐴕 ، 𐴴 𐴵 𐴳 𐴓𐴡𐴔𐴁𐴤𐴡𐴌 𐴄𐴤𐴠𐴌𐴥𐴝𐴚𐴡𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴃𐴡𐴀𐴡𐴙𐴃𐴧𐴝 𐴁𐴝𐴕𐴝𐴘 𐴃𐴤𐴝𐴑𐴤𐴠𐴌 𐴊𐴠 𐴒𐴤𐴝𐴣𐴄𐴞 𐴀𐴝𐴌 𐴋𐴞𐴐𐴄𐴤𐴞𐴑 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴃𐴡𐴀𐴡𐴙𐴃𐴧𐴝 𐴁𐴝𐴕𐴝𐴘 𐴃𐴤𐴝𐴑𐴠𐴌 𐴊𐴠 𐴒𐴤𐴝𐴣𐴄𐴞 ، 𐴀𐴠 𐴊𐴟𐴕𐴥𐴞 𐴒𐴤𐴝𐴣𐴄𐴞𐴌 𐴔𐴝𐴎𐴤𐴠𐴌𐴝𐴏𐴧𐴝𐴌 𐴀𐴟𐴖𐴡𐴌𐴠 𐴊𐴦𐴟𐴛𐴅𐴧𐴙𐴝 𐴲 𐴱 𐴁𐴝𐴎𐴠 𐴓𐴡𐴃𐴞 𐴀𐴥𐴝𐴣𐴎𐴡𐴙𐴕𐴧𐴝 𐴉𐴝𐴣𐴏𐴢 𐴁𐴝𐴎𐴠 𐴉𐴡𐴙𐴅𐴧𐴡𐴕𐴃𐴡 ، 𐴃𐴤𐴞𐴘𐴝𐴘 𐴄𐴡𐴓𐴝𐴅𐴞 ، 𐴏𐴝𐴙𐴑𐴧𐴝𐴤 𐴀𐴝𐴌 𐴔𐴡𐴄𐴡𐴌 𐴏𐴝𐴙𐴌𐴑𐴤𐴠𐴓 𐴓𐴡𐴘 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠𐴌 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴃𐴤𐴞𐴘𐴝 𐴒𐴡𐴌𐴥𐴝𐴘 𐴰 𐴰 𐴰 𐴰 𐴱 𐴃𐴟 𐴰 𐴰 𐴰 𐴰 𐴲 𐴓𐴡𐴃𐴞 𐴄𐴞𐴛𐴝 𐴓𐴡𐴀𐴡𐴌 ، 𐴊𐴞𐴀𐴞 𐴕𐴡 𐴉𐴝𐴌𐴥𐴞𐴓𐴠 𐴑𐴡𐴗𐴔𐴞 𐴉𐴥𐴡𐴏𐴝𐴊 𐴀𐴟𐴍𐴥𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴡𐴃𐴤𐴝 𐴀𐴥𐴡𐴑𐴧𐴡𐴓 𐴈𐴡𐴀𐴡𐴘 𐴈𐴡𐴀𐴡𐴘 𐴁𐴠𐴐𐴤𐴞 𐴔𐴠𐴌𐴠 𐴱𐴱

𐴉𐴟𐴓𐴞𐴐𐴢 𐴊𐴟𐴕𐴥𐴞 𐴎𐴡𐴕𐴠 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴠𐴌 𐴊𐴠 𐴊𐴟𐴘 𐴔𐴝𐴐𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠 ، 𐴐𐴤𐴟𐴌𐴟𐴃 𐴔𐴝𐴎𐴤𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴊𐴠𐴐𐴤𐴡𐴙𐴃𐴧𐴝 𐴔𐴡𐴒𐴢 𐴁𐴡𐴓𐴞 𐴄𐴤𐴝𐴀𐴝𐴙𐴅𐴧𐴙𐴠 ، 𐴒𐴠𐴓𐴊𐴠 𐴇𐴥𐴝𐴉𐴃𐴝 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴄𐴤𐴝𐴀𐴝𐴌 𐴉𐴝𐴘𐴓𐴡 𐴊𐴠 ، 𐴀𐴥𐴠 𐴊𐴟𐴕𐴥𐴞 𐴎𐴡𐴕 𐴉𐴠𐴄𐴞 𐴔𐴡𐴒𐴢 𐴕𐴡𐴀𐴡 ، 𐴶 𐴳 𐴓𐴡𐴔𐴁𐴤𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃𐴧𐴟 𐴏𐴝𐴔𐴌𐴝 𐴉𐴥𐴞𐴑𐴄𐴞𐴌𐴞𐴃 𐴀𐴝𐴀𐴝𐴘 𐴃𐴤𐴝𐴙𐴑𐴧𐴙𐴤𐴠 𐴊𐴠 𐴉𐴟𐴓𐴞𐴐𐴢 𐴱𐴱

Sources : AEN