𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴉𐴟𐴓𐴞𐴐𐴢 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞𐴌 𐴔𐴝𐴎𐴤𐴠 𐴒𐴟𐴓𐴝 𐴒𐴟𐴓𐴞 , 𐴳 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 , 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴠𐴓𐴞𐴘𐴠𐴕 ( 𐴀𐴠 𐴁𐴞 𐴂𐴞 𐴀𐴠𐴕 ) 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞𐴌 𐴔𐴝𐴎𐴤𐴠 𐴒𐴟𐴓𐴝 𐴒𐴟𐴓𐴞𐴌 𐴒𐴤𐴡𐴄𐴡𐴕𐴝 𐴒𐴤𐴡𐴙𐴄𐴧𐴙𐴠 , 𐴳 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 , 𐴀𐴝𐴒𐴤𐴏𐴄 𐴔𐴝𐴐𐴡𐴌 𐴳 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴁𐴞𐴀𐴞𐴕𐴧𐴝, 𐴀𐴟𐴉𐴡𐴎𐴞𐴓𐴥𐴝𐴌 𐴌𐴝𐴎𐴝 𐴉𐴝𐴓𐴡𐴚 𐴀𐴞 𐴀𐴟 𐴂𐴞𐴌 𐴷 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴀𐴥𐴡𐴘𐴧𐴠𐴊𐴠 𐴱𐴱

𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 , 𐴶 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴏𐴞/ 𐴶 𐴁𐴡𐴓𐴡𐴑𐴡𐴃 𐴃𐴤𐴝𐴑𐴤𐴠𐴊𐴠 𐴔𐴟𐴇𐴝𐴔𐴧𐴡𐴊 𐴏𐴟𐴓𐴝𐴘𐴔𐴝𐴕𐴡𐴌 𐴉𐴟𐴖𐴝 / 𐴀𐴝𐴁𐴟𐴓 𐴇𐴝𐴐𐴞𐴔 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴷 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴅𐴞 / 𐴷 𐴁𐴡𐴓𐴡𐴑𐴡𐴃 𐴃𐴤𐴝𐴑𐴠𐴤𐴠𐴊𐴠 𐴀𐴝𐴁𐴊𐴟𐴐𐴢 𐴐𐴤𐴡𐴌𐴞𐴉𐴡𐴌 𐴉𐴟𐴖𐴝 / 𐴔𐴟𐴇𐴝𐴔𐴧𐴡𐴊 𐴌𐴟𐴇𐴟𐴓 𐴀𐴝𐴔𐴞𐴕 𐴁𐴡𐴐𐴢 𐴳 𐴲 𐴁𐴡𐴏𐴥𐴡𐴌 , 𐴀𐴝𐴌 𐴵 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴏𐴞/ 𐴱 𐴁𐴡𐴓𐴡𐴑𐴡𐴃 𐴃𐴤𐴝𐴑𐴤𐴠𐴊𐴠 𐴀𐴝𐴁𐴊𐴟𐴓 𐴔𐴝𐴅𐴠𐴊𐴡𐴌 𐴉𐴟𐴖𐴝 / 𐴑𐴡𐴔𐴌𐴟𐴓 𐴇𐴥𐴝𐴏𐴡𐴕 𐴁𐴡𐴐𐴢 𐴲 𐴲 𐴁𐴡𐴏𐴥𐴡𐴌 𐴱𐴱

𐴀𐴠 𐴂𐴞 𐴁𐴞 𐴀𐴠𐴕 𐴴 𐴱 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 𐴁𐴡𐴌𐴡 , 𐴋𐴞 𐴀𐴝𐴘 𐴅𐴞 / 𐴏𐴡𐴘𐴧𐴡𐴊 𐴇𐴝𐴌𐴟𐴕 𐴌𐴡𐴐𐴤𐴞𐴊𐴠 𐴈𐴡𐴘𐴧𐴠𐴊𐴠 , 𐴀𐴝𐴌𐴑𐴝𐴕𐴡𐴌 𐴀𐴝𐴃𐴡𐴚𐴁𐴝𐴊𐴞𐴌 𐴋𐴝𐴀𐴝𐴘 𐴘𐴠 𐴎𐴝𐴒𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴊𐴠 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 𐴉𐴟𐴓𐴐𐴠 𐴑𐴝𐴌𐴖𐴝𐴘 𐴏𐴝𐴓𐴝𐴘𐴧𐴠 , 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴠 𐴄𐴤𐴝𐴀𐴝𐴌 𐴉𐴝𐴘 𐴁𐴦𐴝𐴊𐴠 , 𐴉𐴟𐴓𐴞𐴐𐴡𐴌 𐴒𐴝𐴀𐴝 𐴀𐴟𐴎𐴟 𐴒𐴟𐴓𐴞 𐴏𐴝𐴓𐴝𐴘𐴧𐴠 , 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴕𐴞𐴎𐴡𐴌𐴠 𐴁𐴝𐴏𐴝𐴘𐴁𐴤𐴝𐴌 𐴏𐴠𐴐𐴃𐴝𐴃 , 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴉𐴝𐴓𐴄𐴝 𐴒𐴟𐴓𐴞 𐴏𐴝𐴓𐴝𐴘𐴧𐴥𐴠 , 𐴃𐴡𐴈𐴥𐴡𐴕 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓 𐴉𐴡𐴓𐴝𐴘 𐴎𐴝𐴘𐴁𐴝𐴌 𐴑𐴟𐴐𐴤𐴡𐴓 𐴒𐴡𐴌𐴥𐴠𐴌 𐴊𐴧𐴠 𐴐𐴤𐴡𐴔𐴡𐴃 𐴳 𐴎𐴡𐴕 𐴀𐴝𐴃𐴡𐴚𐴁𐴝𐴊𐴞 𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴌𐴞 𐴒𐴞𐴘𐴡𐴘 𐴱𐴱

𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴀𐴥𐴠 𐴀𐴡𐴑𐴃𐴤𐴡𐴃 𐴒𐴤𐴡𐴄𐴡𐴕𐴝 𐴀𐴥𐴡𐴘𐴧𐴠𐴊𐴠 𐴎𐴝𐴒𐴝 𐴌𐴥𐴠 𐴎𐴠𐴈𐴥𐴡𐴕 𐴃𐴝𐴓𐴝𐴐𐴤𐴞 𐴒𐴡𐴙𐴅𐴧𐴤𐴙𐴠 , 𐴃𐴡𐴀𐴡𐴘 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝𐴌 𐴃𐴧𐴟 , 𐴖𐴝𐴀𐴝𐴕 𐴐𐴤𐴟𐴄𐴝𐴌 𐴀𐴥𐴝𐴣𐴃𐴞𐴘𐴝𐴌 𐴀𐴟𐴒𐴧𐴤𐴗𐴝 , 𐴶 𐴌𐴝𐴀𐴡𐴕𐴋 𐴒𐴟𐴓𐴞 , 𐴃𐴞𐴕𐴧𐴥𐴗𐴝 𐴈𐴝𐴃𐴧𐴟𐴆 𐴀𐴝𐴌 𐴀𐴟𐴒𐴧𐴤𐴙𐴝 𐴑𐴞𐴓𐴞𐴕𐴥𐴞𐴚 𐴌𐴡𐴋 𐴉𐴝𐴀𐴝 𐴒𐴞𐴘𐴠 , 𐴀𐴝𐴐𐴤𐴔𐴞 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴑𐴠𐴙𐴏𐴢 𐴑𐴤𐴟𐴓𐴞 𐴉𐴝𐴀𐴝 𐴒𐴞𐴘𐴠𐴊𐴠 𐴀𐴥𐴝𐴣𐴃𐴞𐴘𐴝𐴌 𐴐𐴤𐴡𐴣𐴀𐴡 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴞𐴘𐴠 𐴱𐴱

Sources : Ukhiyanews.com