𐴑𐴠𐴙𐴏𐴧𐴟𐴥 𐴁𐴞𐴊𐴠𐴐𐴤𐴞 𐴔𐴟𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴠 𐴀𐴠𐴈𐴥𐴡𐴕𐴡𐴌 𐴀𐴡𐴑𐴃𐴤𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 𐴕𐴡 𐴏𐴝𐴀𐴝𐴌 : 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴱𐴱

𐴆𐴞𐴕𐴝𐴌 𐴔𐴡𐴊𐴡𐴃 𐴓𐴡𐴘 𐴂𐴝𐴘𐴓𐴥𐴡𐴄 𐴂𐴡𐴌𐴡𐴅𐴤𐴠𐴑𐴄𐴡𐴌 𐴀𐴝𐴕𐴋𐴤𐴝𐴌𐴠 , 𐴐𐴤𐴟𐴌𐴟𐴃 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴖𐴝𐴉𐴠𐴏𐴢 𐴊𐴞𐴀𐴞𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴝 𐴎𐴝𐴀𐴝𐴌 , 𐴎𐴞𐴘𐴝𐴕𐴡𐴌 𐴀𐴟𐴖𐴡𐴌𐴠 𐴁𐴝𐴚𐴓𐴝𐴊𐴠𐴐𐴢 𐴀𐴥𐴡 𐴌𐴝𐴎𐴞 𐴀𐴥𐴡𐴘𐴧𐴠 𐴁𐴡𐴓𐴞 , 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴋𐴝𐴑𐴄𐴡𐴌/𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠 , 𐴔𐴡𐴕𐴃𐴡𐴌 𐴑𐴠𐴙𐴏𐴧𐴥𐴟 𐴁𐴞𐴊𐴠𐴐𐴤𐴞 𐴔𐴟𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴠 𐴀𐴠𐴈𐴥𐴡𐴕𐴡𐴌 𐴇𐴥𐴝𐴓𐴡𐴃𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴖𐴝𐴉𐴠𐴏𐴢 𐴕𐴡 𐴊𐴞𐴀𐴞𐴃𐴤𐴡 𐴈𐴡𐴀𐴡𐴌 , 𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴁𐴝𐴚𐴓𐴝𐴊𐴠𐴐𐴢 𐴊𐴟𐴖𐴝𐴏𐴥𐴝𐴓𐴝𐴃 𐴉𐴡𐴌𐴞 𐴒𐴞𐴘𐴡𐴘 , 𐴈𐴡𐴃𐴤𐴝 𐴀𐴞𐴀𐴞𐴕 𐴁𐴟𐴙𐴃 𐴁𐴝𐴌𐴠 𐴁𐴡𐴘𐴊𐴠𐴐𐴢 𐴔𐴦𐴝𐴔𐴠𐴓𐴝𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴃 / 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠 𐴱𐴱

𐴀𐴞𐴐𐴤𐴞𐴘𐴝𐴌 𐴁𐴝𐴁𐴡𐴃𐴠 𐴆𐴞𐴕𐴝𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴋𐴠𐴚 𐴏𐴞𐴅𐴝𐴕 , 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴋𐴤𐴝𐴑𐴝 𐴉𐴡𐴣𐴀𐴡𐴙𐴏𐴧𐴙𐴠 , 𐴀𐴥𐴞𐴃𐴠 𐴁𐴝𐴚𐴓𐴝𐴊𐴠𐴐𐴡𐴃 𐴑𐴞𐴘𐴥𐴡𐴓𐴧𐴝 𐴀𐴝𐴙𐴐𐴧𐴤𐴙𐴠𐴊𐴠 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 𐴘𐴝𐴌 , 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 ! 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴊𐴞𐴀𐴞𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞𐴁𐴝𐴌 𐴏𐴥𐴞𐴓𐴏𐴞𐴓𐴝𐴃 𐴏𐴥𐴡𐴀𐴡𐴌𐴠 𐴀𐴝𐴙𐴐𐴧𐴤𐴙𐴠𐴊𐴠 , 𐴀𐴥𐴠 𐴁𐴝𐴁𐴡𐴃𐴠 𐴆𐴞𐴕𐴝 𐴘𐴠 𐴁𐴠𐴐𐴤𐴞 𐴔𐴡𐴊𐴡𐴃 𐴒𐴡𐴌𐴥𐴠𐴌 𐴱𐴱

𐴔𐴡𐴕𐴃𐴡𐴌 𐴑𐴟𐴖𐴝𐴓 𐴈𐴥𐴡𐴌𐴝𐴁 𐴑𐴠𐴙𐴏𐴧𐴥𐴟 𐴊𐴠𐴐𐴡𐴌 𐴇𐴥𐴡𐴑𐴟𐴔𐴡𐴃𐴠 , 𐴀𐴠 𐴇𐴥𐴝𐴓𐴡𐴃𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴕𐴡 𐴉𐴡𐴣𐴀𐴡𐴏𐴝𐴘𐴃𐴡 𐴈𐴡𐴀𐴡𐴌 , 𐴇𐴥𐴡𐴑𐴟𐴔𐴡𐴃 𐴀𐴥𐴞𐴀𐴞𐴕𐴠 𐴈𐴡𐴘𐴃𐴤𐴡 𐴏𐴝𐴀𐴝𐴌 𐴊𐴧𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴃 𐴎𐴝𐴘𐴓𐴥𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴔𐴝𐴌𐴞 𐴉𐴥𐴠𐴓𐴝𐴘𐴁𐴤𐴡 , 𐴇𐴥𐴡𐴑𐴟𐴔𐴡𐴃 𐴀𐴥𐴞𐴀𐴞𐴕𐴠 𐴁𐴟𐴎𐴤𐴠𐴌𐴊𐴧𐴠 , 𐴎𐴠𐴃𐴤𐴡𐴑𐴧𐴝𐴑 𐴁𐴡𐴌𐴔𐴥𐴝𐴃 𐴏𐴥𐴡𐴀𐴞 𐴋𐴞𐴔𐴟𐴑𐴠𐴌𐴠𐴏𐴞 𐴕𐴥𐴡 𐴀𐴝𐴘𐴧𐴠 𐴃𐴡𐴃𐴤𐴡𐴑𐴧𐴝𐴓 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴌𐴔𐴥𐴝𐴃 𐴉𐴡𐴣𐴀𐴡𐴏𐴝𐴘 𐴊𐴡𐴀𐴡𐴕 𐴄𐴤𐴞𐴑 𐴕𐴡 𐴀𐴥𐴡𐴘𐴁𐴡 𐴱𐴱

𐴔𐴡𐴕𐴃𐴡𐴌 𐴀𐴝𐴣𐴀𐴝𐴌𐴝𐴌 𐴌𐴝𐴘 𐴀𐴥𐴡𐴙𐴓𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴥𐴞𐴃𐴝𐴌𐴝𐴌 𐴊𐴠𐴐𐴡𐴃 𐴎𐴡𐴀𐴡𐴕 𐴒𐴤𐴡𐴘 , 𐴃𐴝𐴌𐴝 𐴘𐴥𐴡 𐴎𐴝𐴘𐴃𐴡 𐴒𐴤𐴡𐴘 𐴏𐴝𐴀𐴝𐴌 , 𐴉𐴡𐴏𐴥𐴞𐴔𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴀𐴟𐴖𐴡𐴌𐴠 𐴐𐴤𐴡𐴔𐴝𐴓𐴟𐴏𐴝𐴕𐴝 𐴒𐴡𐴌𐴥𐴞 / 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠𐴊𐴠 ! 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴥𐴞𐴃𐴝𐴌𐴝 𐴌𐴠 𐴓𐴡𐴘 𐴎𐴝𐴘𐴃𐴤𐴡 𐴏𐴝𐴀𐴝𐴌 , 𐴀𐴥𐴞𐴃𐴝𐴌𐴝𐴌 𐴇𐴥𐴠𐴉𐴝𐴎𐴡𐴃 𐴀𐴝𐴌 𐴕𐴞𐴌𐴝𐴉𐴡𐴃𐴧𐴝𐴌 𐴒𐴠𐴌𐴥𐴝𐴕𐴄𐴞 𐴘𐴥𐴡 𐴊𐴞𐴀𐴞𐴁𐴡 𐴁𐴡𐴓𐴞 𐴈𐴡𐴀𐴡𐴌 , 𐴔𐴡𐴕𐴃𐴡𐴌 𐴉𐴡𐴏𐴥𐴞𐴔𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴠 𐴈𐴡𐴘𐴃𐴤𐴡 𐴏𐴝𐴀𐴝𐴌 𐴊𐴧𐴠 , 𐴃𐴟𐴣𐴖𐴝𐴣𐴌𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡 𐴌𐴠 𐴑𐴠𐴀𐴠𐴕𐴠 𐴁𐴞𐴐𐴧𐴤𐴐𐴢 𐴒𐴡𐴌𐴥𐴡𐴌 𐴱𐴱

Sources : Ukhiyanews.com