𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴋𐴝𐴄𐴝 𐴎𐴡𐴔𐴝 𐴒𐴡𐴌𐴥𐴝 𐴁𐴡𐴕 𐴒𐴡𐴌𐴥𐴞𐴁𐴡𐴓𐴧𐴝 𐴀𐴞𐴕𐴋𐴤𐴞𐴘𐴝 𐴉𐴡𐴌 𐴔𐴞𐴘𐴝𐴕𐴔𐴝𐴌 𐴃𐴡𐴕𐴎𐴞𐴔𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴞𐴕𐴋𐴤𐴞𐴘𐴝𐴃 𐴉𐴡𐴣𐴀𐴡𐴙𐴏𐴧𐴙𐴠 𐴊𐴠 𐴁𐴡𐴌𐴔𐴥𐴝𐴌 𐴓𐴝𐴌𐴥𐴝𐴘𐴌 𐴁𐴝𐴏𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 , 𐴀𐴞𐴕𐴋𐴤𐴞𐴘𐴝 𐴇𐴥𐴡𐴑𐴟𐴔𐴡𐴃𐴠 𐴎𐴞𐴁𐴡𐴕𐴞 𐴋𐴝𐴄𐴝 𐴎𐴡𐴔𐴝 𐴒𐴡𐴌𐴥𐴠𐴌 𐴊𐴠 𐴘𐴝𐴀𐴝𐴕 𐴁𐴡𐴕 𐴒𐴡𐴌𐴥𐴞𐴁𐴡𐴓𐴧𐴝 ” 𐴀𐴞𐴕𐴋𐴤𐴞𐴘𐴝 𐴉𐴡𐴌 𐴔𐴞𐴘𐴝𐴕𐴔𐴝𐴌 ” 𐴃𐴡𐴕𐴎𐴞𐴔𐴠 𐴒𐴠𐴓𐴊𐴠 𐴈𐴝𐴙𐴓𐴧𐴝 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴞𐴕𐴋𐴤𐴞𐴘𐴝 𐴇𐴥𐴡𐴑𐴟𐴔𐴡𐴃𐴠 𐴀𐴠𐴈𐴥𐴡𐴕 𐴎𐴡𐴔𐴝 𐴒𐴡𐴌𐴥𐴠𐴌 𐴊𐴧𐴠 , 𐴁𐴡𐴌𐴔𐴥𐴝𐴌 𐴓𐴝𐴌𐴥𐴝𐴘𐴌 𐴁𐴝𐴏𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴎𐴞𐴁𐴡𐴕𐴞 𐴋𐴝𐴄𐴝 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴞𐴁𐴡 𐴊𐴠 , 𐴘𐴝𐴀𐴝𐴕𐴡𐴌 𐴀𐴟𐴖𐴡𐴌𐴠 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕𐴞 𐴒𐴡𐴌𐴥𐴠𐴌 𐴁𐴡𐴓𐴞 , 𐴀𐴞𐴕𐴋𐴞𐴘𐴝 𐴉𐴡𐴌 𐴔𐴞𐴘𐴝𐴕𐴔𐴝𐴌 𐴃𐴡𐴕𐴎𐴞𐴔𐴡𐴌 𐴕𐴠𐴃𐴝 / 𐴏𐴝𐴓𐴥𐴝𐴙𐴚 𐴋𐴟𐴑𐴝𐴌𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 , 𐴀𐴠𐴈𐴥𐴡𐴕 𐴎𐴡𐴔𐴝 𐴒𐴡𐴌𐴥𐴠𐴌 𐴊𐴧𐴠 𐴎𐴞𐴁𐴡𐴕𐴞 𐴋𐴝𐴄𐴝 𐴇𐴥𐴠𐴉𐴝𐴎𐴡𐴃 𐴃𐴤𐴝𐴑𐴤𐴞𐴁𐴡 𐴁𐴡𐴓𐴞 , 𐴀𐴞𐴕𐴋𐴞𐴘𐴝 𐴇𐴥𐴡𐴑𐴟𐴔𐴡𐴃𐴡𐴌 𐴃𐴧𐴟 𐴁𐴞𐴐𐴧𐴤𐴝𐴐𐴢 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴓𐴝𐴌𐴥𐴝𐴘𐴌 𐴋𐴡𐴌𐴠 𐴁𐴡𐴌𐴔𐴥𐴝𐴃𐴧𐴟 𐴊𐴤𐴝𐴘 𐴕𐴠𐴀𐴠𐴓𐴞 𐴀𐴝𐴀𐴝𐴘 𐴒𐴞𐴘𐴠 𐴒𐴤𐴡𐴘𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴔𐴡𐴕𐴐𐴤𐴝 𐴏𐴥𐴝𐴌𐴝 𐴎𐴞𐴁𐴡𐴕𐴞 𐴋𐴝𐴄𐴝 𐴎𐴡𐴔𐴝 𐴒𐴡𐴌𐴥𐴠𐴌 𐴊𐴧𐴠 𐴘𐴝𐴀𐴝𐴕 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴁𐴦𐴝𐴊𐴠 𐴘𐴥𐴡 , 𐴀𐴞𐴕𐴋𐴞𐴘𐴝 𐴇𐴥𐴡𐴑𐴟𐴔𐴡𐴃𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴒𐴡𐴌𐴥𐴠𐴌 𐴊𐴧𐴠 𐴏𐴥𐴡𐴉𐴝𐴌𐴡𐴃𐴞 𐴃𐴦𐴝𐴓𐴧𐴟𐴑 𐴀𐴥𐴟𐴊𐴧𐴝 𐴁𐴡𐴕 𐴒𐴡𐴌𐴥𐴞𐴁𐴡𐴓𐴧𐴝 , 𐴀𐴞𐴕𐴋𐴤𐴞𐴘𐴝 𐴉𐴡𐴌 𐴔𐴞𐴘𐴝𐴕𐴔𐴝 𐴌𐴠 𐴈𐴡𐴘𐴧𐴠 , 𐴀𐴝𐴌𐴡𐴎 𐴕𐴝𐴔𐴝 𐴘𐴝𐴀𐴝𐴕 𐴀𐴞𐴕𐴋𐴤𐴞𐴘𐴝 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴝𐴘 𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴀𐴞𐴀𐴞𐴕 𐴁𐴝𐴊𐴠 𐴘𐴥𐴡 𐴁𐴡𐴌𐴔𐴥𐴝𐴌 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴔𐴦𐴝𐴔𐴠𐴓𐴝 , 𐴊𐴠𐴐𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 𐴀𐴠𐴕 𐴘𐴟 𐴅𐴞 𐴐𐴤𐴡𐴣𐴀𐴡 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 , 𐴁𐴠𐴐𐴤𐴡𐴌𐴑𐴝𐴌𐴞 𐴂𐴝𐴂𐴓𐴥𐴞𐴑 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 , 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴃𐴦𐴡𐴙𐴃𐴧𐴝 𐴃𐴤𐴝𐴑𐴤𐴞𐴁𐴝𐴌 𐴀𐴠𐴅𐴝𐴎𐴡𐴃𐴞 𐴑𐴦𐴝𐴋 𐴊𐴞𐴀𐴞 𐴁𐴡𐴓𐴧𐴝 𐴘𐴥𐴡 𐴀𐴝𐴌𐴡𐴎 𐴕𐴝𐴔𐴝𐴃 𐴈𐴡𐴘𐴧𐴠 𐴱𐴱

Sources : RFAburmese