𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴝𐴌𐴔𐴥𐴞 𐴔𐴟𐴃𐴝𐴙𐴕 𐴒𐴡𐴌𐴥𐴞𐴁𐴡𐴓𐴧𐴝 𐴁𐴤𐴝𐴉𐴠𐴌 𐴱𐴱

𐴑𐴡𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃𐴡𐴌𐴠 𐴑𐴡𐴕𐴄𐴡𐴌𐴟𐴓 𐴒𐴡𐴌𐴥𐴞𐴁𐴡𐴓𐴧𐴝 , 𐴇𐴥𐴡𐴑𐴟𐴔𐴡𐴃𐴠 𐴀𐴝𐴌𐴔𐴥𐴞 𐴔𐴟𐴃𐴝𐴙𐴕 𐴒𐴡𐴌𐴥𐴞𐴁𐴡𐴓𐴧𐴝 𐴁𐴤𐴝𐴉𐴠𐴌 𐴁𐴡𐴓𐴞 , 𐴒𐴤𐴡𐴌 𐴀𐴟𐴎𐴞𐴌 𐴀𐴝𐴏𐴡𐴊𐴟𐴎 𐴎𐴡𐴔𐴝𐴕𐴠 𐴈𐴡𐴘𐴧𐴠 , 𐴔𐴡𐴚𐴒𐴡𐴓 𐴁𐴝𐴌𐴠 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴀𐴡𐴉𐴥𐴞𐴏𐴡𐴃 𐴊𐴡𐴓𐴝 𐴀𐴥𐴡𐴘𐴃𐴡 𐴒𐴞𐴘𐴠𐴊𐴠 , 𐴁𐴝𐴚𐴓𐴝𐴊𐴠𐴐𐴡𐴌 𐴓𐴧𐴝 𐴉𐴝𐴄𐴤𐴝𐴘𐴧𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴁𐴝𐴊𐴞𐴌 𐴕𐴡𐴔𐴝𐴙𐴕𐴊𐴝 / 𐴒𐴠𐴖𐴞𐴕 𐴓𐴠𐴖𐴞𐴏𐴢 𐴓𐴡𐴘 𐴈𐴡𐴃𐴤𐴝 𐴈𐴟𐴀𐴝 𐴈𐴡𐴀𐴡𐴘 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴘𐴍𐴥𐴡𐴑𐴡𐴃 , 𐴈𐴡𐴃𐴤𐴝 𐴀𐴞𐴀𐴞𐴕 𐴒𐴤𐴡𐴌 𐴀𐴟𐴎𐴞𐴌𐴠 𐴀𐴥𐴞𐴁𐴝𐴌𐴠 𐴈𐴡𐴘𐴧𐴠𐴊𐴠 𐴱𐴱

𐴁𐴡𐴘𐴍𐴥𐴡𐴑𐴡𐴌 𐴐𐴤𐴠𐴐𐴠 𐴒𐴤𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴁𐴝𐴊𐴞𐴌 𐴕𐴡𐴔𐴝𐴙𐴕𐴊𐴝𐴌 𐴉𐴥𐴟𐴣𐴖𐴝𐴣𐴃𐴞 𐴉𐴥𐴟𐴣𐴖𐴝𐴛𐴅𐴧𐴙𐴝 𐴘𐴥𐴡 𐴀𐴠𐴑 𐴎𐴡𐴕 𐴀𐴝𐴙𐴐𐴧𐴞𐴀𐴞𐴓 , 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴔𐴝𐴌𐴝 𐴔𐴝𐴌𐴞 𐴋𐴝𐴚𐴒𐴝 𐴋𐴝𐴚𐴒𐴞 𐴁𐴝𐴌𐴥𐴞 𐴒𐴞𐴘𐴠𐴊𐴠 𐴀𐴥𐴞𐴀𐴞𐴕𐴡𐴌𐴠 𐴔𐴟𐴓 𐴁𐴝𐴕𐴝𐴘 𐴃𐴝𐴌𐴥𐴝 𐴈𐴡𐴃𐴤𐴝 𐴈𐴡𐴘𐴧𐴠 , / 𐴒𐴟𐴖𐴠𐴕 𐴅𐴟𐴖𐴠𐴏𐴠 𐴈𐴡𐴘𐴓𐴥𐴡𐴊𐴠 , 𐴑𐴠𐴀𐴠𐴔𐴡𐴃 𐴀𐴝𐴣𐴀𐴝𐴌𐴝𐴌 𐴀𐴝𐴌𐴔𐴥𐴞 𐴀𐴝𐴌 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴟𐴓𐴞𐴐𐴢 𐴀𐴝𐴏𐴥𐴠 𐴕𐴡𐴀𐴡𐴕𐴥𐴠⸮ 𐴀𐴠𐴃𐴡 𐴉𐴥𐴡𐴎𐴧𐴝𐴃 𐴑𐴠𐴀𐴠𐴕𐴠 𐴁𐴝𐴌𐴥𐴠𐴌 ⸮ 𐴀𐴝𐴌𐴔𐴥𐴞𐴌 ( 𐴀𐴠𐴏𐴢 𐴀𐴡 𐴂𐴞 ) 𐴘𐴠 𐴀𐴥𐴞𐴀𐴞𐴕𐴡𐴌 𐴖𐴡𐴌𐴠 𐴕𐴡𐴎𐴡𐴌𐴊𐴝𐴌𐴞 𐴕𐴡 𐴒𐴡𐴌𐴥𐴠𐴌 𐴕𐴞𐴑𐴤𐴞 ⸮ 𐴁𐴠𐴒𐴧𐴤𐴞𐴕 𐴑𐴤𐴟𐴓𐴝 𐴔𐴠𐴓𐴝 𐴁𐴤𐴝𐴉𐴠 𐴈𐴡𐴃𐴤𐴝 𐴈𐴟𐴀𐴝 𐴈𐴡𐴀𐴡𐴘 𐴀𐴥𐴡𐴘𐴧𐴠 𐴱𐴱

𐴀𐴝𐴏𐴡𐴊𐴟𐴎 𐴎𐴡𐴔𐴝𐴕𐴠 𐴈𐴡𐴘𐴓𐴥𐴡 𐴊𐴠 , 𐴀𐴠𐴑𐴧𐴤𐴝𐴕 𐴐𐴤𐴡𐴣𐴍𐴡 𐴎𐴝𐴒𐴝𐴃 𐴀𐴠𐴑 𐴔𐴡𐴓𐴞𐴘𐴟𐴕 𐴊𐴟𐴘 𐴓𐴝𐴑 𐴔𐴝𐴕𐴥𐴟𐴙𐴐𐴢 𐴒𐴤𐴞𐴐𐴝 𐴒𐴤𐴞𐴐𐴧𐴝 𐴒𐴡𐴌𐴥𐴞 𐴃𐴤𐴝𐴑𐴠𐴌 , 𐴀𐴥𐴠𐴍𐴠 𐴕𐴝𐴕𐴝𐴕 𐴊𐴤𐴡𐴌𐴡𐴕𐴡𐴌 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴎𐴝𐴘 𐴎𐴟𐴓𐴟𐴔 𐴀𐴥𐴡𐴘𐴁𐴡 , 𐴀𐴥𐴞𐴀𐴞𐴕𐴡𐴌𐴃𐴧𐴟 𐴉𐴥𐴡𐴎𐴧𐴝𐴃 𐴀𐴥𐴡𐴑𐴧𐴡𐴓 𐴁𐴝𐴌𐴥𐴠𐴌 , 𐴀𐴥𐴠𐴀𐴞 𐴉𐴥𐴡𐴎𐴧𐴝𐴃𐴡𐴃 𐴔𐴝𐴌𐴝 𐴔𐴝𐴌𐴞𐴃 𐴐𐴤𐴟𐴊𐴟 𐴃𐴝𐴌𐴥𐴝 𐴔𐴡𐴌𐴠𐴌 𐴊𐴧𐴠 𐴕𐴡𐴀𐴡 , 𐴀𐴝𐴣𐴀𐴝𐴌𐴝𐴌 𐴑𐴤𐴟𐴁 𐴈𐴝𐴁𐴞𐴓 𐴀𐴝𐴌𐴔𐴥𐴞𐴌 𐴀𐴡𐴉𐴥𐴞𐴏𐴝𐴌 𐴀𐴥𐴡 𐴀𐴠𐴑 𐴎𐴡𐴕 𐴔𐴝𐴌𐴝 𐴒𐴞𐴘𐴠 , 𐴇𐴥𐴝𐴁𐴝𐴌 𐴓𐴝𐴙𐴕𐴡𐴌 𐴀𐴡𐴉𐴥𐴞𐴏𐴝𐴌 𐴀𐴥𐴡 𐴀𐴠𐴑 𐴔𐴝𐴌𐴝 𐴒𐴞𐴘𐴠 𐴱𐴱

𐴀𐴠 𐴁𐴝𐴁𐴡𐴃𐴠 𐴀𐴟𐴎𐴞𐴌𐴠 𐴈𐴡𐴘𐴓𐴥𐴡 𐴊𐴠 , 𐴀𐴝𐴣𐴀𐴝𐴌𐴝𐴌 𐴀𐴝𐴌𐴔𐴥𐴞 𐴇𐴥𐴝𐴔𐴞𐴐𐴤𐴝 𐴃𐴡𐴘𐴧𐴝𐴌 𐴃𐴤𐴝𐴑𐴠 , 𐴎𐴡𐴌𐴟𐴌𐴡𐴃 𐴀𐴥𐴡𐴘𐴓𐴠 𐴑𐴠𐴀𐴠𐴔𐴡𐴃 𐴀𐴝𐴣𐴀𐴝𐴌𐴝 𐴀𐴝𐴌𐴔𐴥𐴞 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴘𐴟𐴔 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴕𐴡𐴔𐴝𐴙𐴕𐴊𐴝𐴌𐴠 𐴎𐴝𐴕𐴝𐴘 𐴊𐴞𐴘𐴧𐴞 𐴱𐴱

Sources : Ukhiyanews.com