𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴏𐴥𐴡𐴖𐴧𐴝𐴕 𐴑𐴤𐴟𐴕𐴡𐴌 𐴀𐴝𐴐𐴤𐴝𐴔𐴞 𐴒𐴠𐴌𐴠𐴉𐴃𐴝𐴌 𐴱𐴱

𐴑𐴡𐴑𐴏𐴡 𐴁𐴝𐴎𐴝𐴌 , 𐴀𐴟𐴑𐴤𐴞𐴘𐴝𐴌 𐴁𐴝𐴓𐴟 𐴈𐴥𐴝𐴓𐴞 𐴑𐴠𐴀𐴠𐴔𐴡𐴃 𐴏𐴥𐴡𐴖𐴧𐴝𐴕 𐴑𐴤𐴟𐴕𐴞 𐴔𐴦𐴝𐴔𐴠𐴓𐴝𐴌 𐴉𐴡𐴓𐴝𐴘 𐴌𐴡𐴘𐴧𐴠𐴊𐴠 𐴀𐴝𐴐𐴤𐴝𐴔𐴞 / 𐴐𐴤𐴡𐴁𐴧𐴞𐴌 𐴀𐴝𐴇𐴔𐴡𐴊 ( 𐴋𐴝𐴑 𐴕𐴝𐴔 𐴓𐴝𐴓𐴥𐴟 ) 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴀𐴞𐴃𐴝𐴌𐴥𐴠 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴠𐴓𐴞𐴘𐴠𐴕 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴄𐴞𐴀𐴞𐴔𐴠 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴓𐴝𐴓𐴥𐴟 𐴈𐴡𐴀𐴡𐴊𐴠 𐴀𐴥𐴞𐴁𐴝 , 𐴀𐴟𐴑𐴤𐴞𐴘𐴝𐴌 𐴁𐴡𐴓𐴡𐴑 𐴀𐴞 𐴀𐴞𐴌 𐴲 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 / 𐴀𐴝𐴁𐴊𐴟𐴓 𐴔𐴡𐴃𐴓𐴡𐴁𐴡𐴌 𐴉𐴟𐴖𐴝 , 𐴒𐴡𐴃𐴡 𐴈𐴝𐴓𐴞𐴘𐴝 𐴅𐴟𐴕 𐴔𐴝𐴐𐴡𐴌 𐴱 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴂𐴠𐴌𐴝𐴘 𐴐𐴤𐴝𐴀𐴝𐴌𐴡 𐴉𐴝𐴣𐴏𐴢 𐴁𐴝𐴎𐴠 𐴀𐴟𐴑𐴤𐴞𐴘𐴝𐴌 𐴶 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴀𐴠𐴔 𐴹 𐴱 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑𐴡𐴌 𐴔𐴟𐴀𐴟𐴕𐴃𐴟 , 𐴀𐴥𐴞𐴃𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴞𐴃𐴠 𐴁𐴡𐴌𐴔𐴥𐴝𐴌 𐴀𐴝𐴃𐴡𐴚𐴁𐴝𐴊𐴞 𐴒𐴟𐴌𐴟𐴉𐴡𐴌 𐴔𐴞𐴔𐴁𐴤𐴡𐴌 𐴱𐴱

𐴅𐴟𐴕 𐴔𐴝𐴐𐴡𐴌 𐴲 𐴱 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 , 𐴸 𐴓𐴡𐴔𐴁𐴤𐴡𐴌 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴐𐴤𐴝𐴀𐴞𐴅𐴧𐴡𐴑𐴝𐴌𐴞 / 𐴔𐴟𐴇𐴝𐴔𐴧𐴡𐴊 𐴉𐴝𐴌𐴟𐴑 𐴀𐴝𐴇𐴔𐴡𐴊𐴠 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 , 𐴉𐴝𐴌𐴟𐴑 𐴀𐴝𐴇𐴔𐴡𐴊𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴔𐴡𐴘𐴕𐴝 𐴒𐴤𐴟𐴕𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴶 𐴱 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑𐴡𐴌 𐴔𐴟𐴀𐴟𐴕𐴃𐴟 , 𐴏𐴥𐴡𐴖𐴧𐴝𐴕 𐴑𐴤𐴟𐴕𐴞 𐴔𐴦𐴝𐴔𐴠𐴓𐴝𐴌 𐴉𐴡𐴓𐴝𐴃𐴡𐴑 𐴀𐴠𐴑 𐴎𐴡𐴕 𐴀𐴝𐴐𐴤𐴝𐴔𐴞 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴘𐴁𐴝𐴌 𐴓𐴡𐴒𐴠 𐴓𐴡𐴒𐴠 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴞𐴁𐴝𐴌 𐴑𐴝𐴌𐴖𐴝𐴘 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴥𐴠 𐴀𐴡𐴑𐴃𐴤𐴡𐴃 𐴀𐴝𐴐𐴤𐴝𐴔𐴞 𐴓𐴝𐴓𐴥𐴟 𐴉𐴡𐴓𐴝𐴘 𐴎𐴝𐴘𐴁𐴝𐴌 𐴏𐴠𐴐𐴃𐴝 𐴑𐴟𐴐𐴤𐴡𐴓 𐴒𐴡𐴙𐴓𐴧𐴙𐴠 𐴘𐴥𐴡 , 𐴑𐴝𐴔𐴞𐴘𐴝𐴁 𐴕𐴡𐴀𐴡 𐴀𐴥𐴡𐴀𐴡 , 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴌𐴞 𐴒𐴞𐴘𐴡𐴘 , 𐴊𐴤𐴡𐴌𐴡𐴕𐴡𐴌 𐴁𐴦𐴝𐴊𐴠 𐴀𐴥𐴞𐴃𐴝𐴌 𐴀𐴥𐴝𐴃𐴡𐴃 𐴖𐴝𐴑𐴞 𐴄𐴡𐴑𐴞𐴌 𐴏𐴥𐴠𐴄 𐴀𐴟𐴒𐴧𐴤𐴗𐴝 𐴉𐴝𐴀𐴝 𐴒𐴞𐴘𐴠 , 𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴎𐴝𐴕𐴝𐴘𐴧𐴠𐴊𐴠 , 𐴓𐴝𐴓𐴥𐴟 𐴁𐴞𐴁𐴤𐴞𐴕𐴧𐴡 𐴑𐴤𐴟𐴕𐴞 𐴔𐴦𐴝𐴔𐴠𐴓𐴝 𐴓𐴡𐴘 𐴎𐴡𐴍𐴞𐴃𐴡 𐴀𐴝𐴏𐴥𐴠 𐴁𐴡𐴓𐴞 𐴀𐴥𐴞𐴃𐴠 𐴐𐴤𐴞𐴑𐴝𐴌 𐴒𐴡𐴙𐴅𐴧𐴤𐴙𐴠 , 𐴀𐴥𐴞𐴃𐴝𐴌 𐴁𐴠𐴌𐴟𐴊𐴧𐴤𐴠 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴃 𐴏𐴥𐴡𐴖𐴧𐴝𐴕 𐴑𐴤𐴟𐴕𐴞 𐴔𐴦𐴝𐴔𐴠𐴓𐴝 𐴀𐴝𐴌 𐴀𐴥𐴝𐴣𐴃𐴞𐴘𐴝𐴌 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴀𐴡𐴙𐴕𐴧𐴡 𐴔𐴦𐴝𐴔𐴠𐴓𐴝𐴌 𐴑𐴠𐴙𐴏𐴢 𐴉𐴥𐴝𐴙𐴓 𐴒𐴡𐴙𐴅𐴧𐴤𐴙𐴝 𐴀𐴝𐴏𐴥𐴠 , 𐴒𐴠𐴌𐴠𐴉𐴃𐴝𐴌 𐴒𐴡𐴌𐴥𐴡𐴕𐴡𐴌 𐴉𐴡𐴌𐴠 𐴀𐴥𐴞𐴃𐴝𐴌𐴠 𐴔𐴟𐴃𐴦𐴝𐴓𐴧𐴠𐴑𐴝 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴞𐴘𐴝 𐴒𐴞𐴘𐴠 𐴁𐴡𐴓𐴞 , 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 𐴱𐴱

Sources : Ukhiyanews.com