𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴇𐴥𐴡𐴌𐴡𐴕 , 𐴈𐴡𐴎𐴧𐴝 𐴈𐴝𐴍𐴝 𐴀𐴠𐴑 𐴎𐴡𐴕 𐴀𐴟𐴊𐴧𐴤𐴝𐴌 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴡𐴌 𐴉𐴝𐴀𐴝𐴌𐴞 𐴀𐴠𐴓𐴝𐴑𐴝𐴃 𐴇𐴥𐴡𐴌𐴡𐴕 𐴒𐴡𐴌𐴥𐴝𐴌 𐴏𐴥𐴡𐴚𐴑𐴡𐴄 𐴁𐴡𐴕 𐴕𐴡𐴀𐴡 𐴀𐴥𐴡𐴀𐴡 , 𐴕𐴡𐴀𐴡 𐴃𐴤𐴝𐴔𐴠 , 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴃𐴞𐴕 𐴁𐴡𐴕𐴊𐴤𐴟 𐴌𐴠 𐴇𐴥𐴡𐴌𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴑𐴤𐴟𐴕 𐴒𐴡𐴌𐴥𐴡𐴕𐴡𐴌 𐴉𐴡𐴌𐴠 , 𐴀𐴠 𐴁𐴝𐴌𐴡𐴃 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕𐴡𐴌𐴠 𐴇𐴥𐴡𐴌𐴡𐴕 𐴒𐴡𐴌𐴥𐴡𐴕𐴡𐴌 𐴉𐴡𐴌𐴠 𐴈𐴡𐴎𐴧𐴝𐴌 𐴘𐴝𐴀𐴝𐴕𐴃𐴟 𐴈𐴝𐴍𐴞 𐴇𐴥𐴝𐴃𐴡𐴌 𐴈𐴡𐴎𐴧𐴝 𐴀𐴝𐴓𐴡𐴒𐴢 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴘𐴝𐴀𐴝𐴌 𐴀𐴝𐴒𐴠 𐴘𐴥𐴡 𐴅𐴟𐴖𐴝𐴕 𐴉𐴟𐴖𐴝 𐴀𐴞𐴁𐴤𐴝 𐴐𐴤𐴡𐴣𐴀𐴡 , 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴇𐴥𐴡𐴌𐴡𐴕 𐴒𐴡𐴙𐴅𐴧𐴤𐴙𐴠 , 𐴇𐴥𐴝𐴃 𐴈𐴝𐴍𐴞 𐴉𐴥𐴠𐴓𐴝𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴝 𐴀𐴥𐴡𐴙𐴓𐴊𐴠 , 𐴄𐴠𐴑𐴕𐴝𐴉𐴢 𐴕𐴥𐴞𐴓𐴝𐴌 𐴀𐴝𐴓𐴞 𐴈𐴥𐴝𐴓𐴞 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 / 𐴐𐴤𐴡𐴔𐴐𐴟𐴓 𐴀𐴝𐴓𐴡𐴔𐴡𐴌 𐴉𐴟𐴖𐴝 , 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌 𐴁𐴝𐴔 𐴇𐴥𐴝𐴃𐴡𐴌 𐴈𐴡𐴎𐴧𐴝𐴌 𐴘𐴝𐴀𐴝𐴕𐴃𐴟 𐴈𐴝𐴍𐴞 𐴀𐴝𐴓𐴡𐴒𐴢 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴄𐴠𐴑𐴕𐴝𐴉𐴢 𐴔𐴡𐴋𐴠𐴓 𐴃𐴤𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 𐴀𐴡𐴉𐴥𐴞𐴏𐴝𐴌 𐴀𐴡 𐴏𐴞 / 𐴀𐴝𐴁𐴊𐴟𐴓 𐴇𐴝𐴓𐴞𐴔𐴠 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴀𐴥𐴝𐴣𐴏𐴝 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 , 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 𐴊𐴠 ! 𐴏𐴡𐴓𐴠𐴌 𐴊𐴧𐴠 𐴅𐴟𐴕 𐴔𐴝𐴐𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴉𐴝𐴀𐴝𐴌𐴡𐴃 𐴃𐴤𐴝𐴑𐴠𐴊𐴠 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴠 𐴕𐴥𐴞𐴓𐴝 𐴀𐴝𐴓𐴞 𐴈𐴥𐴝𐴓𐴞𐴌 𐴵 𐴲 𐴓𐴡𐴔𐴁𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴀𐴝𐴏𐴥𐴠𐴊𐴠 𐴊𐴟𐴖𐴝𐴕 𐴀𐴠𐴑𐴧𐴤𐴝𐴕𐴡𐴃𐴧𐴟 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴠 , 𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴇𐴥𐴡𐴌𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴡𐴘 , 𐴁𐴦𐴝𐴊𐴠 𐴀𐴥𐴞𐴃𐴝𐴌𐴝𐴌 𐴒𐴤𐴡𐴌𐴒𐴟𐴐𐴧𐴤𐴞𐴌𐴃𐴧𐴟 𐴌𐴠𐴇𐴥𐴝𐴘 ( 𐴉𐴥𐴞𐴌𐴡𐴀𐴡𐴃𐴞 ) 𐴄𐴞𐴛𐴝 𐴊𐴝𐴁𐴞 𐴒𐴡𐴌𐴥𐴠𐴌 𐴱𐴱

𐴀𐴡 𐴏𐴞 𐴀𐴝𐴁𐴊𐴟𐴓 𐴇𐴝𐴓𐴞𐴔𐴠 𐴀𐴝𐴌𐴀𐴥𐴡 𐴎𐴝𐴕𐴝𐴘𐴧𐴠𐴊𐴠 ! 𐴐𐴤𐴡𐴕𐴞 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 / 𐴅𐴝𐴇𐴝𐴕𐴒𐴞𐴌 𐴀𐴝𐴓𐴡𐴔 𐴁𐴝𐴉𐴢 𐴐𐴤𐴡𐴔𐴐𐴟𐴓 𐴀𐴝𐴓𐴡𐴔𐴡𐴌 𐴇𐴥𐴝𐴃 𐴈𐴝𐴍𐴞 𐴉𐴥𐴠𐴓𐴝𐴘 𐴁𐴦𐴝𐴊𐴠 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴝𐴘𐴧𐴠 , 𐴁𐴦𐴝𐴊𐴠 𐴊𐴠𐴐𐴡𐴙𐴃𐴧𐴝 𐴔𐴝𐴙𐴕𐴐𐴤𐴠 𐴃𐴝𐴌𐴥𐴠 𐴁𐴝𐴏𐴝𐴘 𐴓𐴡𐴘 𐴄𐴤𐴞𐴑 𐴔𐴡𐴃𐴠 𐴏𐴞𐴑𐴞𐴃𐴐𐴤𐴝 𐴀𐴥𐴡𐴘 𐴉𐴝𐴌𐴠 𐴉𐴝𐴀𐴝𐴕 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 , 𐴀𐴡 𐴏𐴞 𐴘𐴠 𐴀𐴝𐴌𐴀𐴥𐴡 𐴎𐴝𐴕𐴝𐴘𐴧𐴠𐴊𐴠 , 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴀𐴠𐴑 𐴎𐴡𐴕𐴡𐴌 𐴇𐴥𐴝𐴃 𐴈𐴝𐴍𐴞 𐴁𐴦𐴝𐴊𐴠 𐴀𐴠𐴌𐴞 𐴊𐴞𐴀𐴞𐴓𐴠 𐴘𐴥𐴡 𐴁𐴝𐴑𐴞 𐴏𐴝𐴙𐴌 𐴎𐴡𐴕𐴡𐴌𐴠 𐴀𐴠𐴌𐴞 𐴕𐴡𐴀𐴡 𐴊𐴠𐴀𐴠 , 𐴀𐴥𐴞𐴃𐴝𐴌𐴝𐴌𐴠 𐴀𐴟𐴊𐴧𐴤𐴝𐴌 𐴒𐴡𐴌𐴥𐴞𐴁𐴡𐴓𐴧𐴝 𐴉𐴟𐴓𐴞𐴐𐴠 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴱𐴱

Sources : Ukhiyanews.com