𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴝𐴁𐴞 𐴕𐴞𐴎𐴡𐴌 𐴉𐴝𐴌𐴝𐴃 𐴎𐴡𐴀𐴡𐴕 , 𐴁𐴡𐴌𐴔𐴥𐴝𐴌 𐴁𐴞𐴁𐴤𐴞𐴕𐴧𐴡 𐴈𐴡𐴃𐴤𐴝 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴝𐴌 𐴁𐴝𐴁𐴡𐴃𐴠 , 𐴆𐴞𐴕𐴝𐴌𐴠 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴁𐴝𐴚𐴓𐴝𐴊𐴠𐴐𐴠 𐴑𐴤𐴟𐴂𐴢 𐴁𐴠𐴐𐴤𐴞 𐴏𐴠𐴐𐴃𐴝 𐴒𐴡𐴌𐴥𐴠𐴌 , 𐴁𐴡𐴌𐴔𐴥𐴝 , 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴆𐴞𐴕𐴝 𐴃𐴞𐴕𐴑𐴤𐴟𐴙𐴄𐴧𐴝 𐴁𐴡𐴘𐴍𐴥𐴡𐴑 𐴀𐴠𐴒𐴡𐴎𐴤𐴝 𐴀𐴥𐴟𐴖𐴝𐴃 𐴀𐴝𐴏𐴥𐴠 , 𐴶 𐴷 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴖𐴝𐴉𐴠𐴏𐴢 𐴕𐴞𐴁𐴝𐴌 𐴁𐴝𐴁𐴡𐴃𐴠 𐴁𐴡𐴀𐴡𐴃 𐴊𐴠𐴌𐴞 𐴀𐴥𐴡𐴘𐴃𐴠 𐴈𐴡𐴃𐴤𐴝 𐴏𐴡𐴓𐴝𐴃 𐴀𐴝𐴏𐴥𐴠 𐴱𐴱

𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴝𐴁𐴞 𐴀𐴥𐴡𐴙𐴓𐴊𐴠 𐴕𐴞𐴎𐴡𐴌 𐴉𐴝𐴌𐴝 𐴕𐴞𐴎𐴡𐴌 𐴁𐴤𐴞𐴍𐴝𐴃 𐴎𐴝𐴘 𐴉𐴝𐴌𐴝 𐴉𐴡𐴌𐴞𐴁𐴤𐴡 , 𐴁𐴡𐴌𐴔𐴥𐴝𐴌 𐴈𐴡𐴃𐴤𐴝 𐴀𐴥𐴡𐴙𐴓𐴊𐴠 𐴇𐴥𐴡𐴑𐴟𐴔𐴡𐴃𐴠 𐴁𐴝𐴙𐴕𐴊𐴤𐴠 𐴊𐴠 𐴒𐴤𐴡𐴌 𐴀𐴥𐴞𐴀𐴞𐴕𐴡𐴃 𐴎𐴝𐴀𐴝 𐴉𐴡𐴌𐴞𐴁𐴤𐴡 , 𐴀𐴠 𐴄𐴝𐴕𐴝 𐴄𐴝𐴕𐴞𐴃 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴰 𐴹 𐴱 𐴑𐴟𐴄𐴤𐴞 𐴋𐴦𐴡𐴓𐴝𐴌 𐴁𐴝𐴚𐴓𐴝𐴊𐴠𐴐𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴓𐴧𐴝𐴘 𐴈𐴥𐴡𐴏𐴧𐴝 𐴒𐴡𐴌𐴥𐴝 𐴉𐴡𐴌𐴠𐴌 𐴱𐴱

𐴔𐴠 𐴔𐴝𐴐𐴡𐴌 𐴹 𐴲 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 / 𐴀𐴠 𐴑𐴠 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 , 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 ! 𐴁𐴡𐴌𐴔𐴥𐴝𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴋𐴝𐴀𐴝𐴘 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴀𐴝𐴘 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 , 𐴀𐴠𐴈𐴥𐴡𐴕 𐴑𐴞𐴘𐴠 𐴑𐴞𐴘𐴠 𐴎𐴝𐴘𐴃𐴡 𐴏𐴝𐴀𐴝𐴌 , 𐴀𐴝𐴌 𐴁𐴝𐴎𐴟 𐴑𐴞𐴘𐴠 𐴑𐴠𐴙𐴏𐴧𐴥𐴟 𐴊𐴝𐴁𐴞 𐴃𐴟𐴓𐴥𐴞 𐴊𐴤𐴡𐴙𐴅𐴧𐴙𐴠 𐴱𐴱

𐴀𐴥𐴞𐴃𐴝𐴌𐴝𐴌 𐴊𐴝𐴁𐴞 𐴀𐴥𐴡𐴙𐴓𐴊𐴠 ! 𐴕𐴞𐴎𐴡𐴌 𐴉𐴝𐴌𐴝 𐴕𐴞𐴎𐴡𐴌 𐴁𐴤𐴞𐴍𐴝𐴃 𐴎𐴡𐴀𐴡𐴕 , 𐴁𐴡𐴌𐴔𐴥𐴝𐴌 𐴈𐴡𐴃𐴤𐴝 𐴀𐴥𐴡𐴙𐴓𐴊𐴠 , 𐴇𐴥𐴡𐴑𐴟𐴔𐴡𐴃𐴠 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴊𐴠 𐴒𐴤𐴡𐴌 𐴀𐴥𐴞𐴀𐴞𐴕𐴡𐴃 𐴃𐴤𐴝𐴑𐴝 𐴉𐴡𐴌𐴞𐴁𐴤𐴡 , 𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 𐴁𐴝𐴚𐴓𐴝𐴊𐴠𐴐𐴠 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴰 𐴹 𐴱 𐴑𐴟𐴄𐴤𐴞 𐴋𐴦𐴡𐴓𐴝𐴌 𐴈𐴥𐴡𐴌𐴡𐴏𐴢 𐴒𐴡𐴌𐴠𐴌 , 𐴀𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴀𐴥𐴞𐴃𐴝𐴌𐴝𐴌 𐴓𐴧𐴝 𐴁𐴝𐴚𐴓𐴝𐴊𐴠𐴐𐴠 𐴁𐴡𐴀𐴡𐴃 𐴁𐴠𐴐𐴤𐴞 𐴔𐴟𐴓𐴥𐴝 𐴁𐴟𐴕𐴘𐴝𐴊𐴞 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴃𐴡𐴘𐴧𐴝𐴌 𐴒𐴡𐴙𐴅𐴧𐴤𐴙𐴠 , 𐴁𐴝𐴚𐴓𐴝𐴊𐴠𐴐𐴠 𐴌𐴟𐴉𐴟𐴎𐴞 𐴀𐴥𐴡𐴑𐴧𐴡𐴓 𐴖𐴝𐴉𐴠𐴏𐴢 𐴎𐴡𐴀𐴡𐴕𐴧𐴥𐴝𐴕 𐴏𐴝𐴀𐴝𐴌 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴆𐴞𐴕𐴝 𐴘𐴠 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴔𐴝𐴎𐴤𐴠 𐴋𐴝𐴓𐴝𐴓 𐴀𐴥𐴞𐴏𐴝𐴉𐴠 𐴔𐴝𐴙𐴎𐴧𐴤𐴝𐴓𐴞 𐴀𐴝𐴊𐴝𐴘 𐴒𐴡𐴌𐴠𐴌 , 𐴆𐴞𐴕𐴝𐴌 𐴕𐴝𐴀𐴠𐴁 ( 𐴊𐴟𐴘𐴀𐴡𐴔 ) 𐴀𐴟𐴎𐴞𐴌 / 𐴏𐴝𐴕 𐴖𐴞𐴋𐴡𐴚 𐴀𐴝𐴙𐴐𐴧𐴤𐴞𐴀𐴞𐴓 𐴊𐴠 𐴀𐴥𐴠𐴈𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴁𐴠𐴐𐴤𐴞 𐴈𐴡𐴃𐴤𐴝 𐴈𐴟𐴖𐴝 𐴈𐴡𐴀𐴡𐴘 𐴀𐴥𐴡𐴀𐴡𐴙𐴓 𐴱𐴱

Sources : Ukhiyanews.com