𐴃𐴟𐴖𐴥𐴝𐴕𐴠 𐴔𐴝𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴄𐴝𐴙𐴔 𐴔𐴡𐴎𐴞𐴕 𐴔𐴡𐴊𐴡𐴊 𐴕𐴡 𐴉𐴝𐴀𐴝𐴌 , 𐴔𐴡𐴌𐴝 𐴀𐴝𐴌𐴀𐴥𐴡 𐴁𐴝𐴌𐴥𐴞𐴃 𐴉𐴝𐴌𐴠 𐴱𐴱

𐴃𐴟𐴖𐴥𐴝𐴕𐴡𐴌 𐴎𐴡𐴌𐴞𐴘𐴝 𐴓𐴟𐴏𐴧𐴝𐴕 𐴁𐴠𐴐𐴤𐴞 𐴀𐴥𐴡𐴘𐴓𐴠 𐴘𐴥𐴡 , 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓𐴠 𐴔𐴡𐴊𐴡𐴊 𐴓𐴡𐴘 𐴀𐴝𐴘𐴁𐴡𐴓𐴧𐴝 𐴀𐴠𐴅𐴝𐴎𐴡𐴃 𐴕𐴥𐴡 𐴉𐴝𐴀𐴝 , 𐴒𐴤𐴡𐴓𐴞 𐴘𐴡𐴌𐴠 𐴀𐴟𐴊𐴧𐴤𐴝𐴌 𐴒𐴡𐴌𐴥𐴞 𐴓𐴡𐴘𐴁𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴠𐴌 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 , 𐴔𐴟𐴑𐴝 𐴃𐴟𐴖𐴥𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁 𐴄𐴡𐴀𐴡𐴕𐴡𐴌 𐴈𐴝𐴣𐴏𐴥𐴠 , 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴔𐴡𐴌𐴞 𐴒𐴞𐴘𐴠 𐴒𐴤𐴡𐴘𐴊𐴠 𐴑𐴠𐴀𐴠𐴔 𐴀𐴥𐴞𐴀𐴞𐴕𐴡𐴃 , 𐴃𐴟𐴖𐴥𐴝𐴕 𐴉𐴥𐴟𐴌𐴝𐴘 𐴏𐴥𐴡 𐴊𐴞𐴕 𐴀𐴥𐴡𐴘 𐴒𐴞𐴘𐴠 𐴒𐴤𐴡𐴘𐴊𐴠 𐴀𐴥𐴟𐴊𐴧𐴝 , 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 𐴕𐴥𐴡 𐴉𐴝𐴌𐴠𐴀𐴠 𐴱𐴱

𐴄𐴝𐴙𐴔 𐴔𐴡𐴎𐴞𐴕 𐴔𐴡𐴊𐴡𐴊 𐴕𐴡 𐴉𐴝𐴘𐴓𐴠 , 𐴔𐴡𐴌𐴝𐴌 𐴐𐴤𐴡𐴙𐴚𐴑𐴙𐴝 𐴁𐴝𐴌𐴥𐴞𐴃 𐴉𐴝𐴌𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴒𐴤𐴡𐴓𐴠𐴊𐴠 𐴈𐴥𐴝𐴏𐴢 𐴌𐴝𐴏𐴧𐴝𐴌 𐴏𐴥𐴠 𐴆𐴤𐴙𐴡𐴚 𐴉𐴟𐴓𐴡𐴌 𐴈𐴝𐴣𐴏𐴥𐴠 𐴁𐴤𐴟𐴔𐴠 𐴒𐴤𐴗𐴥𐴝𐴚𐴡𐴌 𐴏𐴞 𐴄𐴝 𐴋𐴤𐴠𐴑 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴔𐴡𐴊𐴡𐴊 𐴕𐴥𐴡 𐴉𐴝𐴀𐴝 𐴁𐴡𐴓𐴞 , 𐴀𐴥𐴠 𐴉𐴝𐴌𐴝𐴃 𐴃𐴤𐴝𐴑𐴠𐴊𐴠 / 𐴑𐴟 𐴆𐴤𐴙𐴝𐴘 𐴏𐴗𐴠 𐴘𐴠 𐴈𐴡𐴘𐴧𐴠 𐴱𐴱

𐴈𐴥𐴝𐴕𐴝 𐴉𐴞𐴕𐴥𐴝 𐴓𐴡𐴘 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴊𐴟𐴑𐴧𐴤𐴡𐴃 , 𐴀𐴠𐴍𐴥𐴞𐴘𐴝𐴌 𐴔𐴝𐴙𐴕𐴐𐴠 𐴀𐴝𐴌 𐴀𐴠𐴑𐴊𐴞𐴕 𐴈𐴥𐴝𐴕𐴝 𐴕𐴡 𐴉𐴝𐴘𐴓𐴠 , 𐴖𐴝𐴙𐴆𐴧𐴙𐴝 𐴔𐴡𐴌𐴞 𐴎𐴝𐴘𐴁𐴡 𐴒𐴤𐴡𐴘 , 𐴃𐴟𐴖𐴥𐴝𐴕𐴡𐴌 𐴎𐴡𐴌𐴞𐴘𐴝 𐴁𐴤𐴝𐴚𐴞 𐴉𐴡𐴌𐴞 𐴒𐴞𐴘𐴡𐴘𐴊𐴠 𐴕𐴝𐴙𐴅𐴧𐴡𐴓 𐴒𐴝𐴏𐴥𐴡𐴌 𐴕𐴝𐴙𐴅𐴧𐴡𐴓 𐴁𐴤𐴝𐴚𐴞 𐴈𐴥𐴝𐴘 𐴒𐴟𐴎𐴝𐴌 𐴒𐴡𐴌𐴠𐴌𐴊𐴧𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 , 𐴘𐴝𐴀𐴝𐴌 𐴁𐴦𐴝𐴊𐴠 𐴉𐴝𐴌𐴝 𐴘𐴝𐴀𐴝𐴕𐴡𐴃 𐴵 𐴸 𐴵 𐴏𐴥𐴝𐴕 𐴒𐴤𐴡𐴌𐴡𐴌 𐴳 𐴲 𐴶 𐴱 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠 , 𐴒𐴤𐴡𐴌 𐴀𐴠𐴑𐴧𐴤𐴝𐴕 𐴕𐴡 𐴃𐴤𐴝𐴑𐴠 𐴉𐴝𐴀𐴝𐴕 𐴁𐴠𐴒𐴧𐴤𐴞𐴕 𐴁𐴤𐴝𐴚𐴞 𐴒𐴞𐴘𐴡𐴘 , 𐴀𐴠𐴈𐴥𐴡𐴕 𐴔𐴝𐴙𐴕𐴐𐴠 𐴁𐴤𐴝𐴚𐴝 𐴏𐴟𐴌𐴝 𐴎𐴤𐴡𐴓𐴞 𐴁𐴠𐴌𐴥𐴝 𐴀𐴡𐴖𐴎𐴝𐴘 𐴊𐴞𐴀𐴞 𐴃𐴡𐴀𐴡𐴙𐴃𐴧𐴝 𐴁𐴝𐴐𐴤𐴝 𐴔𐴝𐴌𐴞 𐴃𐴤𐴝𐴙𐴑𐴧𐴙𐴠𐴊𐴠 , 𐴎𐴤𐴡𐴌 𐴊𐴞𐴀𐴞𐴓𐴠 𐴒𐴤𐴡𐴔 𐴀𐴥𐴡 𐴎𐴝𐴘 𐴕𐴡 𐴉𐴝𐴌𐴥𐴠 𐴱𐴱

𐴀𐴥𐴠 𐴉𐴝𐴌𐴝𐴃 𐴈𐴥𐴝𐴘𐴁𐴝𐴌 𐴔𐴡𐴃𐴤𐴟𐴌𐴝 𐴉𐴝𐴕𐴥𐴞 𐴔𐴟𐴄𐴤𐴠 𐴘𐴡 𐴕𐴥𐴝𐴘 , 𐴁𐴠𐴒𐴧𐴤𐴞𐴕 𐴕𐴟𐴕𐴝 𐴉𐴝𐴕𐴥𐴞 𐴀𐴥𐴡𐴘 𐴒𐴞𐴘𐴡𐴘 , 𐴕𐴟𐴕 𐴉𐴝𐴕𐴥𐴞 𐴈𐴥𐴝𐴘 𐴁𐴡𐴐𐴤𐴡𐴃𐴞 𐴒𐴡𐴌𐴥𐴝 𐴉𐴡𐴌𐴠𐴌 𐴁𐴡𐴓𐴞 , 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 , 𐴃𐴟𐴖𐴥𐴝𐴕𐴡𐴌 𐴎𐴡𐴌𐴞𐴘𐴝 𐴰 𐴰 𐴴 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 , 𐴊𐴠𐴐𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴉𐴝𐴄𐴞 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴐𐴤𐴟𐴊𐴠 𐴰 𐴰 𐴱 𐴎𐴡𐴕 𐴔𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴔𐴠 𐴔𐴝𐴐𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴀𐴝𐴌 𐴀𐴥𐴡 𐴈𐴡𐴘𐴧𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴠 𐴕𐴞𐴎𐴠 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴃 𐴓𐴡𐴌𐴞 𐴕𐴡 𐴃𐴤𐴝𐴑𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴏𐴟𐴌𐴁𐴤𐴡𐴕 𐴁𐴝𐴕𐴝𐴀𐴝𐴌 𐴱𐴱

Sources : myanmar-now.org