𐴉𐴡𐴑𐴃𐴤𐴟𐴃 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴟𐴏𐴡𐴓𐴔𐴝𐴕 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴃 𐴓𐴝𐴌𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴌𐴝𐴎𐴊𐴤𐴝𐴕𐴞 𐴀𐴝𐴙𐴑𐴧𐴙𐴝𐴁𐴡𐴌 𐴈𐴡𐴀𐴠𐴑 𐴔𐴝𐴙𐴓 𐴉𐴟𐴒𐴠 𐴊𐴡𐴀𐴡𐴙𐴕𐴠 𐴀𐴝𐴏𐴥𐴠𐴊𐴠 , 𐴉𐴡𐴑𐴃𐴤𐴟 𐴄𐴡𐴀𐴡𐴕 𐴀𐴠𐴓𐴝𐴑𐴝𐴌 𐴔𐴟𐴏𐴡𐴓𐴔𐴝𐴕 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 , 𐴔𐴟𐴑𐴝 𐴏𐴝𐴘𐴑𐴡𐴓𐴟𐴕𐴡𐴌𐴃𐴧𐴟 𐴇𐴥𐴠𐴉𐴝𐴎𐴡𐴃 𐴃𐴤𐴝𐴑𐴞𐴀𐴞 𐴉𐴝𐴌𐴠𐴀𐴠 𐴉𐴝𐴀𐴝𐴕 , 𐴀𐴥𐴞𐴃𐴝𐴌𐴝𐴌 𐴑𐴠𐴀𐴠𐴔𐴡𐴃𐴧𐴟 𐴓𐴝𐴌𐴞𐴀𐴞, 𐴀𐴥𐴠 𐴉𐴡𐴑𐴃𐴟 𐴄𐴡𐴀𐴡𐴕 𐴀𐴠𐴓𐴝𐴑𐴝𐴌 𐴑𐴞𐴕𐴞 𐴁𐴤𐴞𐴕𐴄 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔𐴡𐴃 𐴓𐴡𐴘 𐴎𐴝𐴘 𐴌𐴝𐴙𐴑𐴧𐴤𐴙𐴠𐴠 𐴱𐴱

𐴔𐴟𐴑𐴝 𐴃𐴟𐴖𐴥𐴝𐴕𐴡𐴌 𐴓𐴟𐴏𐴧𐴝𐴕𐴞𐴃𐴧𐴟 𐴕𐴞𐴌𐴝𐴉𐴡𐴃 𐴃𐴤𐴝𐴑𐴞𐴀𐴞 𐴉𐴝𐴌𐴠𐴀𐴠 𐴉𐴝𐴀𐴝𐴕 𐴀𐴝𐴒𐴧𐴗𐴝𐴘 𐴈𐴝𐴔 𐴒𐴡𐴌𐴝𐴀𐴝 𐴒𐴞𐴘𐴠 , 𐴎𐴠 𐴔𐴟𐴑𐴝 𐴃𐴟𐴖𐴥𐴝𐴕𐴡𐴌 𐴎𐴡𐴌𐴞𐴘𐴝 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕 𐴀𐴝𐴌 𐴁𐴝𐴚𐴓𐴝𐴊𐴠𐴐𐴡𐴌 𐴊𐴡𐴀𐴡𐴙𐴕 𐴀𐴥𐴞𐴏𐴧𐴝𐴃 𐴔𐴝𐴎𐴤𐴠 𐴉𐴝𐴕𐴥𐴞 𐴁𐴦𐴠𐴐𐴢 𐴀𐴥𐴡𐴘𐴁𐴝𐴌 𐴐𐴤𐴡𐴔𐴁𐴡𐴁𐴡𐴕𐴝 𐴀𐴝𐴏𐴥𐴠 , 𐴏𐴞𐴕𐴄𐴤𐴠𐴄 𐴔𐴡𐴀𐴡 𐴀𐴝𐴌 𐴚𐴥𐴝𐴄 𐴆𐴤𐴙𐴡𐴚 , 𐴊𐴟𐴕𐴥𐴞 𐴀𐴝𐴘 𐴋𐴞 𐴂𐴞 𐴑𐴠𐴔𐴡𐴌 𐴔𐴟𐴏𐴡𐴓𐴔𐴝𐴕 𐴌𐴞𐴉𐴟𐴎𐴞 𐴁𐴠𐴒𐴧𐴤𐴟𐴕 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴀𐴝𐴌 𐴌𐴦𐴡𐴘 𐴁𐴝𐴌𐴠 𐴀𐴝𐴕𐴞𐴀𐴞 , 𐴑𐴞𐴕𐴞 𐴁𐴤𐴞𐴕𐴄 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔𐴡𐴃 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 , 𐴑𐴠𐴀𐴠𐴔𐴡𐴌 𐴕𐴠𐴃𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴀𐴥𐴠 𐴊𐴟𐴕𐴥𐴞 𐴑𐴠𐴀𐴠𐴔 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴁𐴝𐴕𐴝𐴘𐴧𐴠 𐴀𐴝𐴌 𐴒𐴤𐴡𐴌𐴀𐴥𐴡 𐴁𐴡𐴘𐴧𐴝𐴌𐴡𐴌 𐴊𐴤𐴡𐴌𐴡 𐴅𐴤𐴝𐴄𐴑𐴧𐴝 𐴌𐴟𐴑𐴤𐴞 𐴉𐴝𐴌𐴠𐴀𐴠𐴊𐴠 𐴀𐴥𐴠𐴊𐴧𐴟𐴌 𐴁𐴠𐴐𐴤𐴞 𐴔𐴡𐴎𐴁𐴟𐴃 𐴕𐴡𐴀𐴡 , 𐴁𐴡𐴘𐴧𐴝𐴌𐴡𐴌 𐴎𐴡𐴌𐴞𐴘𐴝 𐴎𐴟𐴖𐴝𐴌𐴡𐴌 𐴉𐴝𐴕𐴥𐴞 𐴘𐴥𐴡 𐴁𐴠𐴐𐴤𐴞 𐴁𐴝𐴌𐴥𐴞𐴃 𐴉𐴝𐴌𐴠𐴀𐴠 , 𐴀𐴥𐴠 𐴈𐴡𐴃𐴝𐴌𐴓𐴧𐴥𐴝 𐴀𐴥𐴞𐴃𐴝𐴌𐴝𐴌𐴠 𐴓𐴝𐴌𐴞𐴀𐴞 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴃 𐴀𐴝𐴙𐴕𐴧𐴙𐴠𐴊𐴠 , 𐴑𐴞𐴕𐴞 𐴁𐴤𐴞𐴕𐴄 𐴑𐴠𐴀𐴔 , 𐴐𐴤𐴡𐴌 𐴎𐴡𐴁𐴞𐴕𐴡𐴌𐴃𐴧𐴟 𐴁𐴤𐴝𐴌𐴡 𐴀𐴟𐴏𐴡𐴓 𐴎𐴝𐴒𐴝𐴃 , 𐴀𐴥𐴠𐴃𐴡𐴓𐴧𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴓𐴧𐴝 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝 𐴀𐴥𐴞𐴏𐴝𐴉𐴠 𐴁𐴟𐴎𐴤𐴝𐴀𐴝 𐴎𐴝𐴀𐴝 𐴱𐴱

𐴀𐴡 𐴊𐴟𐴕𐴥𐴞 𐴑𐴠𐴀𐴠𐴔𐴡𐴃𐴧𐴟 𐴀𐴝𐴙𐴕𐴧𐴥𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 , 𐴑𐴠𐴙𐴏𐴧𐴥𐴟 𐴔𐴡𐴏𐴥𐴡𐴙𐴃𐴡𐴃 , 𐴑𐴠𐴙𐴏𐴧𐴥𐴟 𐴀𐴞𐴐𐴑𐴟𐴓𐴡𐴃, 𐴀𐴝𐴌 𐴑𐴠𐴙𐴏𐴧𐴥𐴟 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴡𐴡𐴌 𐴒𐴤𐴡𐴌𐴡𐴃 𐴃𐴤𐴝𐴙𐴑𐴧𐴙𐴠 , 𐴎𐴠 𐴑𐴠𐴀𐴠𐴔𐴡𐴃 𐴔𐴠 𐴔𐴝𐴐𐴡𐴌 𐴷 𐴃𐴝𐴌𐴥𐴞𐴑𐴡𐴃 𐴀𐴦𐴡𐴙𐴕 𐴊𐴤𐴡𐴌𐴞 𐴀𐴡𐴉𐴥𐴞𐴐𐴢 𐴈𐴝𐴣𐴏𐴝𐴌𐴞 𐴐𐴤𐴡𐴣𐴀𐴡 𐴰 𐴰 𐴲 𐴐𐴤𐴡𐴃 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴒𐴞𐴀𐴞𐴓𐴒𐴤𐴡𐴘 𐴱𐴱

𐴀𐴥𐴠 𐴑𐴠𐴀𐴠𐴔𐴡𐴌 𐴀𐴡𐴙𐴕𐴧𐴡 𐴕𐴠𐴃𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴊𐴠 ! 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠 𐴑𐴠𐴀𐴠𐴔𐴡𐴃 𐴀𐴝𐴕𐴡𐴀𐴡𐴕𐴠 𐴃𐴤𐴝𐴑𐴝 𐴀𐴝𐴌 𐴈𐴥𐴝𐴕𐴝𐴌 𐴏𐴥𐴡𐴚𐴑𐴡𐴄 𐴁𐴝𐴌𐴞𐴀𐴞 𐴎𐴝𐴘𐴁𐴡 𐴒𐴤𐴡𐴘 , 𐴀𐴝𐴣𐴀𐴝𐴌𐴝𐴃𐴧𐴟 𐴐𐴤𐴟𐴊𐴠 𐴀𐴡𐴓𐴉𐴡 𐴊𐴞𐴕𐴡𐴌 𐴈𐴥𐴝𐴕𐴝 𐴎𐴡𐴔𐴝 𐴀𐴝𐴏𐴥𐴠𐴊𐴠 , 𐴃𐴟𐴖𐴥𐴝𐴕𐴡𐴌 𐴈𐴝𐴌𐴡𐴕𐴠 𐴈𐴡𐴕𐴥𐴡 𐴊𐴝𐴕 𐴈𐴥𐴡𐴌𐴝𐴃𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴈𐴥𐴝𐴕𐴝 𐴕𐴡 𐴊𐴞𐴀𐴞𐴓𐴠 𐴀𐴝𐴌𐴀𐴥𐴡 𐴋𐴡𐴣𐴀𐴡𐴌 𐴔𐴡𐴐𐴑𐴞𐴓𐴡𐴃 𐴉𐴡𐴌𐴞 𐴎𐴝𐴘𐴧𐴟𐴔 𐴁𐴤𐴡𐴘 𐴱𐴱

Sources : Narinjara.com