𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴀𐴞 𐴁𐴝𐴌 𐴀𐴝𐴐𐴤𐴝 𐴁𐴝𐴚𐴓𐴝𐴊𐴠𐴐𐴤𐴞 𐴀𐴟𐴎𐴞𐴌𐴡𐴌 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴔𐴟𐴓𐴥𐴝 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃 𐴎𐴝𐴘 𐴉𐴝𐴌𐴞𐴁𐴤𐴡𐴊𐴠 𐴘𐴝𐴀𐴝𐴕𐴡𐴌 𐴀𐴝𐴐𐴤𐴝 𐴒𐴡𐴌𐴠𐴀𐴠𐴌 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴠 𐴑𐴠 / 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴀𐴠𐴂𐴌𐴞𐴓 𐴔𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴠 , 𐴀𐴠 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴒𐴠𐴓𐴊𐴠 𐴈𐴡𐴀𐴠𐴑 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴆𐴞𐴕𐴝𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴕𐴞𐴎𐴡𐴌 𐴔𐴟𐴓𐴥𐴝 𐴊𐴠𐴐𐴡𐴃 𐴎𐴝𐴘 𐴉𐴝𐴌𐴞𐴁𐴤𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴔𐴦𐴝𐴔𐴠𐴓𐴝𐴃 𐴆𐴞𐴕𐴝 𐴘𐴠 𐴏𐴥𐴡𐴀𐴞 𐴁𐴤𐴝𐴉𐴠 𐴁𐴡𐴌𐴝𐴁𐴡𐴌 𐴀𐴥𐴝𐴃𐴝𐴀𐴥𐴝𐴃𐴞 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 / 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴘𐴥𐴡 , 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴃𐴧𐴟 𐴊𐴟𐴘 𐴐𐴤𐴡𐴃𐴡𐴌 𐴁𐴠𐴐𐴤𐴞 𐴒𐴤𐴡𐴌𐴒𐴟𐴐𐴧𐴞 𐴰 𐴰 𐴷 𐴐𐴤𐴡𐴃𐴡𐴌 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴖𐴝𐴉𐴠𐴏𐴢 𐴒𐴡𐴏𐴥𐴞 𐴓𐴡𐴘𐴁𐴡 𐴁𐴡𐴓𐴞 𐴈𐴥𐴝𐴄𐴞 𐴒𐴡𐴙𐴅𐴧𐴤𐴙𐴠 𐴊𐴠 𐴘𐴝𐴀𐴝𐴕 , 𐴁𐴡𐴌𐴔𐴥𐴝𐴌 ( 𐴔𐴠𐴌𐴠𐴕𐴔𐴝 𐴀𐴝𐴓𐴧𐴥𐴝𐴚 ) 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴃 𐴀𐴠𐴂𐴌𐴞𐴓 𐴔𐴝𐴐𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴠 𐴉𐴡𐴣𐴀𐴡𐴏𐴝𐴘𐴧𐴠𐴊𐴠 𐴔𐴝𐴙𐴕𐴐𐴡𐴌 𐴏𐴠𐴌𐴥𐴝𐴚 𐴏𐴠𐴑 𐴒𐴡𐴌𐴞𐴀𐴞 𐴏𐴝𐴘𐴧𐴠𐴊𐴠 𐴔𐴡𐴎𐴞𐴕 𐴁𐴡𐴌𐴔𐴥𐴝𐴃 𐴃𐴤𐴝𐴙𐴑𐴧𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴏𐴥𐴝𐴁𐴟𐴃 𐴀𐴝𐴏𐴥𐴠𐴊𐴠 𐴉𐴝𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴰 𐴰 𐴰 𐴶 𐴵 𐴎𐴡𐴕 , 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴉𐴝𐴘𐴧𐴠𐴊𐴠 𐴰 𐴰 𐴰 𐴰 𐴳 𐴎𐴡𐴕 , 𐴒𐴤𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴌 𐴀𐴝𐴃𐴡𐴚𐴁𐴝𐴊𐴞 𐴏𐴠𐴌𐴥𐴝𐴚𐴡𐴃 𐴀𐴝𐴏𐴥𐴠𐴊𐴠 𐴰 𐴰 𐴹 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴰 𐴰 𐴰 𐴷 𐴸 𐴎𐴡𐴕 𐴉𐴝𐴘𐴧𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴊𐴟𐴘 𐴊𐴠𐴐𐴡𐴌 𐴏𐴟𐴑𐴃𐴞 𐴔𐴡𐴎𐴞𐴕 𐴖𐴡𐴌𐴠 𐴈𐴟𐴖𐴝 𐴒𐴞𐴘𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴀𐴠𐴑𐴀𐴡𐴔 𐴂𐴡𐴌𐴡𐴅𐴤𐴠𐴑𐴄 𐴀𐴥𐴞𐴏𐴝𐴉𐴠 𐴐𐴤𐴟𐴌𐴟𐴃 𐴰 𐴰 𐴷 𐴎𐴡𐴕 𐴖𐴝𐴉𐴠𐴏𐴢 𐴒𐴡𐴏𐴥𐴞 𐴓𐴡𐴘𐴁𐴡 𐴁𐴡𐴓𐴞 𐴌𐴝𐴎𐴞 𐴀𐴥𐴡𐴘 𐴁𐴦𐴝𐴊𐴠 , 𐴀𐴥𐴞𐴃𐴝𐴌𐴝𐴌 𐴒𐴤𐴡𐴌𐴒𐴟𐴐𐴧𐴞𐴃 𐴁𐴝𐴌𐴞𐴀𐴞 𐴁𐴦𐴠𐴐𐴢 𐴀𐴥𐴡𐴘𐴧𐴠𐴊𐴠 𐴰 𐴰 𐴴 𐴎𐴡𐴕𐴡𐴌𐴠 𐴘𐴥𐴡 𐴓𐴡𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴀𐴝𐴏𐴥𐴡𐴓 𐴎𐴝𐴒𐴝𐴃 𐴎𐴝𐴘 𐴉𐴝𐴌𐴞𐴓𐴥𐴠 , 𐴊𐴠𐴐𐴡𐴙𐴃𐴧𐴝𐴃𐴝 𐴉𐴝𐴘𐴓𐴠 𐴀𐴝𐴌 𐴀𐴡𐴙𐴕𐴧𐴡 𐴊𐴠𐴐𐴡𐴙𐴃𐴧𐴝 𐴑𐴡𐴗𐴔𐴡𐴌 𐴀𐴥𐴡𐴑𐴧𐴡𐴓𐴡𐴌 𐴋𐴡𐴀𐴡𐴙𐴓𐴧𐴝 , 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴉𐴝𐴌𐴞𐴓𐴥𐴠 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴡𐴊𐴠 , 𐴕𐴡𐴀𐴡𐴙𐴓𐴠 𐴕𐴡 𐴎𐴝𐴘𐴁𐴤𐴡 𐴁𐴡𐴓𐴞 𐴈𐴡𐴀𐴡𐴌 𐴱𐴱

Sources : RFAburmese