𐴔𐴗𐴠𐴕 𐴋𐴞𐴐𐴄𐴤𐴞𐴑 , 𐴆𐴤𐴙𐴡𐴚 𐴏𐴟𐴕 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴏𐴠𐴕 𐴓𐴗𐴝𐴚 𐴈𐴥𐴝𐴓𐴡𐴌 𐴁𐴤𐴟𐴃𐴡𐴌𐴠 , 𐴊𐴠𐴐𐴡𐴙𐴃𐴧𐴝𐴃𐴝 𐴏𐴥𐴝𐴁𐴟𐴃 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 𐴸 𐴲 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴀𐴥𐴡𐴘𐴧𐴠 𐴱𐴱

𐴀𐴠𐴂𐴌𐴞𐴓 𐴔𐴝𐴐𐴡𐴌 𐴲 𐴃𐴝𐴌𐴥𐴞𐴑𐴡𐴃 , 𐴔𐴗𐴠𐴕 𐴋𐴞𐴐𐴄𐴤𐴞𐴑 𐴆𐴤𐴙𐴡𐴚 𐴏𐴟𐴕 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴏𐴠𐴕 𐴓𐴗𐴝𐴚 𐴈𐴥𐴝𐴓𐴡𐴌 𐴁𐴤𐴟𐴃𐴡𐴌𐴠 , 𐴊𐴠𐴐𐴡𐴙𐴃𐴧𐴝𐴃𐴝 𐴏𐴥𐴝𐴁𐴟𐴃 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 , 𐴸 𐴲 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴞 𐴓𐴡𐴘 𐴀𐴝𐴘𐴧𐴠𐴌𐴊𐴧𐴠 𐴁𐴟𐴄 𐴐𐴤𐴡𐴣𐴀𐴡 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴉𐴝𐴕𐴥𐴞𐴌 𐴉𐴥𐴡𐴗𐴏𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴘𐴝𐴀𐴝𐴕 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴉𐴝𐴕𐴥𐴞𐴌 𐴉𐴥𐴡𐴗𐴏𐴠 , 𐴏𐴠𐴕 𐴓𐴗𐴝𐴚 𐴈𐴥𐴝𐴓𐴡𐴌 𐴑𐴟𐴓𐴡𐴌 𐴖𐴡𐴃𐴧𐴟 𐴃𐴤𐴝𐴀𐴝𐴘 𐴈𐴥𐴝𐴓𐴡𐴃 𐴏𐴡𐴓𐴠𐴀𐴠𐴌𐴃𐴧𐴠 𐴁𐴟𐴄 𐴀𐴠𐴑𐴧𐴤𐴝𐴕𐴡𐴌𐴠 𐴐𐴤𐴡𐴕𐴊𐴡 𐴒𐴡𐴌𐴥𐴞 , 𐴋𐴝𐴑𐴞 𐴀𐴞𐴕𐴑𐴟𐴖𐴝𐴌𐴞 𐴏𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴠 , 𐴁𐴟𐴍𐴡𐴌 𐴉𐴥𐴡𐴓𐴈𐴝𐴌 𐴁𐴤𐴟𐴃𐴡𐴌𐴠 𐴸 𐴲 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 , 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 , 𐴁𐴡𐴐𐴢 𐴕𐴥𐴡 𐴉𐴟𐴌𐴝𐴊𐴠 𐴀𐴥𐴠𐴕𐴋𐴞𐴓𐴧𐴝 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴝𐴏𐴥𐴠 𐴶 𐴎𐴡𐴕 , 𐴲 𐴰 𐴱 𐴎𐴡𐴕 𐴁𐴠𐴍𐴝𐴀𐴝𐴙𐴕 𐴀𐴝𐴌 𐴰 𐴲 𐴎𐴡𐴕 𐴁𐴠𐴍𐴞𐴘𐴝𐴙𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴔𐴟𐴄 𐴸 𐴲 𐴱 𐴎𐴡𐴕 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴸 𐴲 𐴱 𐴎𐴡𐴕 𐴁𐴠𐴒𐴧𐴤𐴟𐴕 𐴀𐴝𐴌𐴑𐴝𐴕𐴡𐴃𐴧𐴟 𐴎𐴝𐴀𐴝𐴌𐴊𐴧𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴘 𐴁𐴡𐴓𐴞 𐴈𐴡𐴀𐴡𐴘 , 𐴃𐴝𐴊𐴝𐴌𐴟𐴑 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴐𐴤𐴝𐴎𐴝 𐴊𐴞𐴀𐴞𐴁𐴝𐴌 𐴑𐴝𐴌𐴖𐴝𐴘 𐴏𐴝𐴓𐴝𐴘 𐴁𐴤𐴡𐴓𐴧𐴝 , 𐴁𐴠𐴒𐴧𐴤𐴟𐴕𐴡𐴌𐴠 𐴔𐴦𐴡𐴓 𐴔𐴝𐴙𐴕 𐴐𐴤𐴡𐴀𐴡𐴌𐴡𐴃 𐴓𐴡𐴘 𐴒𐴞𐴘𐴡𐴘 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴡𐴌𐴠 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴡𐴀𐴡𐴕𐴡𐴌 𐴇𐴥𐴡𐴑 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘 𐴁𐴦𐴝𐴊𐴠 , 𐴊𐴠𐴐𐴡𐴙𐴃𐴧𐴝𐴃𐴝 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴑𐴡𐴗𐴔 𐴁𐴡𐴓𐴞 𐴈𐴡𐴀𐴡𐴘 , 𐴁𐴡𐴘𐴊𐴠𐴐𐴡𐴙𐴃𐴧𐴝 𐴔𐴝𐴙𐴕𐴐𐴡𐴌 𐴋𐴡𐴀𐴡𐴙𐴓𐴧𐴝 𐴇𐴥𐴝𐴔𐴞𐴐𐴝 𐴁𐴡𐴕 𐴒𐴡𐴌𐴥𐴞 𐴎𐴞𐴘𐴡𐴓𐴡𐴃 𐴊𐴞𐴘𐴝𐴃 𐴀𐴝𐴏𐴥𐴠 𐴱𐴱

Sources : AEN