𐴑𐴠𐴂𐴧𐴟𐴌𐴟𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘 𐴁𐴤𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴏𐴝𐴁 𐴊𐴞𐴘𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 , 𐴀𐴝𐴌𐴑𐴝𐴕𐴡𐴃 𐴑𐴠𐴂𐴧𐴟𐴌𐴟 𐴐𐴤𐴡𐴀𐴡𐴌𐴡𐴌 𐴑𐴤𐴙𐴡𐴑 𐴃𐴡𐴓𐴧𐴥𐴟𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘 , 𐴓𐴡𐴌𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴁𐴡𐴓𐴞 𐴔𐴝𐴌𐴠𐴆𐴡𐴌 𐴱 𐴳 𐴃𐴝𐴌𐴥𐴞𐴑 𐴐𐴤𐴠𐴐𐴢 𐴊𐴞𐴕 𐴁𐴡𐴓𐴞 𐴈𐴡𐴀𐴡𐴘 𐴊𐴞𐴀𐴞𐴓𐴠 𐴘𐴥𐴡 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴃𐴧𐴟 𐴓𐴡𐴌𐴞 𐴎𐴝𐴘𐴃𐴡 𐴔𐴡𐴕𐴠 𐴕𐴡 𐴈𐴡𐴀𐴡𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴓𐴧𐴝 𐴁𐴡𐴕𐴊𐴡𐴁𐴡𐴏𐴢 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴕𐴟𐴖𐴝 𐴎𐴝𐴒𐴝 𐴘𐴝𐴀𐴝𐴕 , 𐴐𐴤𐴡𐴀𐴡𐴌𐴡𐴃𐴧𐴟 𐴃𐴞𐴕 𐴔𐴝𐴙𐴓𐴡𐴌 𐴁𐴠𐴐𐴤𐴞 𐴊𐴟𐴌𐴥𐴠 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴈𐴝𐴔 𐴈𐴡𐴎𐴧𐴡 𐴓𐴡𐴘 𐴁𐴡𐴌𐴝𐴁𐴡𐴌 𐴐𐴤𐴟𐴁𐴞𐴊𐴝 𐴕𐴡 𐴀𐴥𐴡𐴘𐴁𐴡𐴊𐴠 𐴁𐴦𐴝𐴊𐴠 𐴘𐴥𐴡 , 𐴁𐴞𐴓𐴡𐴌 𐴔𐴝𐴎𐴤𐴠 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴁𐴝𐴌𐴞𐴐𐴤𐴝 𐴈𐴝𐴓𐴠 𐴊𐴟𐴑 𐴀𐴥𐴡𐴘𐴁𐴡 𐴁𐴡𐴓𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴊𐴠𐴐𐴁𐴞𐴊𐴠𐴐𐴤𐴞 𐴐𐴤𐴡𐴎𐴟𐴒𐴞𐴃𐴝 𐴀𐴟𐴎𐴞𐴌 / 𐴑𐴟 𐴑𐴟 𐴓𐴝𐴙𐴚𐴡𐴌 𐴏𐴥𐴡𐴊𐴧𐴝𐴌𐴞𐴃 , 𐴁𐴞𐴊𐴠𐴐𐴤𐴞 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴡𐴌 𐴋𐴦𐴝𐴘 𐴀𐴟𐴒𐴧𐴤𐴗𐴝 𐴔𐴝𐴌𐴠𐴆 𐴔𐴝𐴐𐴡𐴌 𐴹 𐴃𐴝𐴌𐴥𐴞𐴑𐴡𐴃 , 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴙𐴐𐴧𐴤𐴙𐴠𐴁𐴝𐴌 , 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴕𐴞𐴎𐴡𐴌 𐴔𐴡𐴏𐴞𐴁𐴡𐴃 𐴀𐴝𐴌 𐴊𐴟𐴑𐴧𐴤𐴡𐴌 𐴇𐴥𐴝𐴓𐴡𐴃 𐴁𐴟𐴎𐴤𐴝𐴘𐴁𐴝𐴌 𐴀𐴠𐴅𐴝𐴎𐴡𐴃 𐴕𐴥𐴡 𐴉𐴝𐴀𐴝 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴑𐴤𐴙𐴡𐴑 𐴃𐴡𐴓𐴧𐴥𐴟𐴕 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴡𐴕 𐴒𐴡𐴌𐴡𐴀𐴡𐴕𐴡𐴌 𐴁𐴝𐴁𐴡𐴃𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴂𐴡𐴌𐴟𐴒𐴠𐴌𐴝𐴔𐴡𐴌 𐴔𐴟𐴃𐴦𐴝𐴓𐴧𐴠𐴑 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴌𐴉𐴥𐴡𐴌 𐴈𐴡𐴃𐴤𐴝 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 / 𐴀𐴥𐴟 𐴓𐴥𐴝 𐴏𐴞𐴕 𐴓𐴡𐴘 𐴄𐴠𐴓𐴞𐴉𐴥𐴟𐴕𐴠 𐴎𐴟𐴑𐴝 𐴎𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 ( 𐴀𐴝𐴌 𐴀𐴠𐴉𐴢 𐴀𐴠 ) 𐴘𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴅𐴟𐴖𐴝𐴁𐴢 𐴕𐴥𐴡 𐴉𐴝𐴀𐴝 𐴱𐴱

𐴑𐴠𐴂𐴧𐴟𐴌𐴟 𐴐𐴤𐴡𐴀𐴡𐴌𐴡𐴌 𐴑𐴤𐴙𐴡𐴑 𐴃𐴡𐴓𐴧𐴥𐴟𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴞𐴕 𐴐𐴤𐴡𐴃𐴡𐴌 𐴖𐴡𐴌𐴠 𐴒𐴤𐴡𐴌𐴒𐴟𐴐𐴧𐴤𐴞 𐴀𐴝𐴏𐴥𐴠 , 𐴰 𐴰 𐴵 𐴱 𐴎𐴡𐴕𐴡𐴌 𐴖𐴡𐴌𐴠 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠 , 𐴎𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴌𐴠 𐴲 𐴱 𐴰 𐴲 𐴐𐴤𐴡𐴕 𐴓𐴡𐴃𐴞 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 , 𐴕𐴞𐴎𐴡𐴌 𐴒𐴤𐴡𐴌𐴡𐴃𐴧𐴟 𐴕𐴠𐴀𐴠𐴓𐴝𐴘 𐴌𐴞𐴉𐴟𐴎𐴞 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴱𐴱

Sources : RFAburmese