𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴄𐴤𐴞𐴑 𐴔𐴡𐴃𐴠 𐴔𐴡𐴊𐴡𐴃 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴓𐴧𐴝 𐴰 𐴷 𐴸 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴋𐴦𐴡𐴓𐴝𐴌 𐴓𐴝𐴒𐴞𐴁𐴤𐴡 𐴁𐴡𐴓𐴞 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴈𐴥𐴝𐴕𐴝 𐴑𐴤𐴟𐴌𐴝𐴉𐴡𐴌 𐴔𐴡𐴊𐴡𐴃 𐴈𐴡𐴔𐴝𐴘 𐴉𐴥𐴠𐴓𐴝 𐴉𐴡𐴌𐴠𐴀𐴠𐴌𐴊𐴧𐴠 , 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴄𐴤𐴞𐴑 𐴔𐴡𐴃𐴠 𐴔𐴡𐴊𐴡𐴃 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴓𐴧𐴝 , 𐴀𐴝𐴔𐴞𐴌𐴞𐴑𐴞 𐴋𐴦𐴡𐴓𐴝𐴌 𐴶 𐴷 𐴸 𐴔𐴡𐴓𐴞𐴘𐴟𐴕 𐴓𐴝𐴒𐴞𐴁𐴤𐴡 𐴁𐴡𐴓𐴞 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑 𐴋𐴞𐴂𐴝𐴌𐴔𐴥𐴠𐴕𐴡𐴌 𐴕𐴡𐴔𐴝𐴙𐴕𐴊𐴝 𐴀𐴡𐴉𐴥𐴞𐴏𐴠 𐴔𐴝𐴌𐴠𐴆 𐴔𐴝𐴐𐴡𐴌 𐴷 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴠 𐴱𐴱

𐴒𐴡𐴃𐴡 𐴁𐴡𐴏𐴥𐴡𐴌𐴡𐴃 𐴔𐴝𐴎𐴠 𐴘𐴥𐴡 𐴐𐴤𐴟𐴊𐴠 𐴳 𐴵 𐴵 𐴔𐴡𐴓𐴞𐴘𐴟𐴕 𐴏𐴝𐴣𐴊𐴝 𐴀𐴟𐴙𐴄𐴧𐴤𐴙𐴠𐴊𐴠 𐴀𐴥𐴠𐴃𐴡𐴓𐴧𐴝,𐴓𐴝𐴒𐴠𐴊𐴠 𐴀𐴥𐴠𐴊𐴟𐴀𐴟𐴕 𐴔𐴟𐴄 𐴉𐴡𐴌𐴞𐴔𐴝𐴕 𐴕𐴡 𐴀𐴟𐴍𐴥𐴡𐴀𐴡𐴕𐴠 , 𐴌𐴞𐴉𐴟𐴎𐴞𐴌𐴠 𐴄𐴤𐴞𐴑 𐴁𐴤𐴝𐴉𐴠 𐴔𐴡𐴊𐴡𐴃 𐴒𐴡𐴌𐴥𐴞 𐴉𐴝𐴌𐴝𐴀𐴝 𐴕𐴡𐴀𐴡 𐴎𐴝𐴀𐴝 , 𐴀𐴠 𐴁𐴤𐴝𐴉𐴠 𐴄𐴞𐴛𐴝 𐴈𐴡𐴔 𐴀𐴟𐴍𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴊𐴟𐴕𐴘𐴝𐴁𐴞 𐴈𐴥𐴝𐴙𐴊𐴧𐴡 𐴌𐴡𐴐𐴤𐴡𐴃𐴡𐴌 𐴂𐴡𐴌𐴟𐴒𐴠𐴌𐴝𐴔 𐴒𐴡𐴌𐴥𐴠 𐴊𐴠 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴃𐴡𐴕𐴎𐴞𐴔𐴠 , 𐴔𐴝𐴌𐴠𐴆 𐴔𐴝𐴐𐴢 𐴀𐴥𐴡𐴘𐴃𐴠 𐴐𐴤𐴟𐴌𐴟 𐴒𐴡𐴌𐴥𐴞 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴠𐴀𐴠𐴌𐴊𐴧𐴠 𐴈𐴥𐴝𐴕𐴝𐴌 𐴌𐴝𐴘𐴐𐴤𐴡𐴕𐴡𐴌 𐴔𐴡𐴊𐴡𐴃 𐴀𐴝𐴒𐴡𐴌𐴃𐴧𐴟 𐴁𐴤𐴝𐴌𐴡 𐴈𐴡𐴔𐴝𐴘 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴘𐴝𐴀𐴝𐴌 𐴋𐴡𐴀𐴡𐴙𐴓𐴧𐴝 𐴈𐴥𐴝𐴕𐴝𐴌 𐴌𐴝𐴘𐴐𐴤𐴡𐴕𐴡𐴌 𐴔𐴡𐴊𐴡𐴃 𐴈𐴡𐴔𐴝𐴘 𐴉𐴥𐴠𐴓𐴝𐴘 𐴓𐴠𐴀𐴠 , 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴊𐴞𐴕𐴞𐴑 𐴎𐴞𐴕𐴊𐴞𐴒𐴞 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴃 𐴉𐴡𐴌𐴞 𐴎𐴝𐴘𐴁𐴡𐴒𐴤𐴡𐴘 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴁𐴝𐴚𐴓𐴝𐴊𐴠𐴐𐴢 𐴀𐴡𐴉𐴥𐴞𐴏𐴡𐴌 𐴔𐴟𐴃𐴦𐴝𐴓𐴧𐴠𐴑 𐴕𐴡𐴔𐴝𐴙𐴕𐴊𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴠𐴃𐴡𐴓𐴧𐴝 𐴀𐴦𐴡 𐴊𐴠𐴐𐴁𐴞𐴊𐴠𐴐𐴤𐴞 𐴊𐴝𐴕 𐴒𐴡𐴌𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 ! 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴀𐴠𐴈𐴥𐴡𐴕 𐴔𐴟𐴑𐴤𐴝 𐴔𐴟𐴑𐴤𐴞 𐴒𐴡𐴌𐴥𐴝 𐴉𐴡𐴌𐴠𐴀𐴠𐴌𐴊𐴧𐴠 𐴏𐴥𐴡𐴚𐴑𐴡𐴄 , 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴈𐴥𐴡𐴌𐴝𐴂𐴢 𐴕𐴡 𐴀𐴥𐴡𐴀𐴡 𐴉𐴝𐴀𐴝𐴕 , 𐴁𐴠𐴒𐴧𐴤𐴟𐴕𐴠 𐴁𐴡𐴓𐴝𐴁𐴡𐴓𐴞 𐴒𐴡𐴌𐴥𐴞 𐴔𐴡𐴊𐴡𐴃𐴡𐴌 𐴔𐴟𐴄 𐴉𐴡𐴌𐴞𐴔𐴝𐴕 𐴉𐴟𐴌𐴝 𐴒𐴡𐴌𐴥𐴞𐴁𐴡𐴓𐴧𐴝 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴕𐴠𐴀𐴠𐴓𐴞 𐴈𐴝𐴔𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴥𐴡 𐴕𐴥𐴝𐴘 , 𐴊𐴠𐴀𐴠𐴌𐴊𐴧𐴠 𐴌𐴝𐴘𐴐𐴤𐴡𐴕 𐴀𐴥𐴞𐴀𐴞𐴕 𐴓𐴡𐴘 𐴒𐴟𐴎𐴝𐴌𐴝 𐴒𐴡𐴌𐴥𐴝 𐴉𐴡𐴌𐴠𐴀𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴈𐴥𐴝𐴀𐴝 𐴉𐴞𐴘𐴝 𐴁𐴤𐴝𐴓𐴝 𐴀𐴥𐴡𐴀𐴡 𐴉𐴝𐴀𐴝𐴕 𐴀𐴝𐴌 𐴐𐴤𐴟𐴕𐴊𐴡𐴌 𐴎𐴞𐴕𐴊𐴞𐴒𐴞 𐴁𐴝𐴕𐴝𐴘 𐴉𐴝𐴌𐴠 𐴉𐴝𐴀𐴝𐴕 𐴊𐴡𐴙𐴅𐴧𐴙𐴝𐴌 𐴏𐴡𐴉𐴥𐴡𐴌 𐴒𐴡𐴌𐴠𐴀𐴠𐴌 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴒𐴡𐴃𐴡 𐴁𐴡𐴏𐴥𐴡𐴌 𐴊𐴡𐴙𐴅𐴧𐴙𐴝𐴌 𐴏𐴡𐴉𐴥𐴡𐴌𐴡𐴃 𐴰 𐴰 𐴲 𐴎𐴡𐴕 𐴓𐴡𐴃𐴞 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴓𐴠𐴙𐴑𐴧𐴤𐴙𐴠 𐴱𐴱

Sources : RFAburmese