𐴔𐴡𐴗𐴚𐴋𐴤𐴟𐴌 𐴆𐴤𐴙𐴡𐴑 𐴂𐴡𐴕𐴋𐴟 𐴉𐴝𐴌𐴝𐴌 𐴋𐴤𐴝𐴑𐴠 𐴁𐴟𐴄 𐴓𐴡𐴘 𐴀𐴝𐴘𐴧𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴔𐴡𐴗𐴚𐴋𐴤𐴟𐴀𐴠𐴓𐴝𐴑𐴝𐴌 𐴆𐴤𐴙𐴡𐴑 𐴂𐴡𐴕𐴋𐴟 𐴉𐴝𐴌𐴝𐴌 𐴋𐴤𐴝𐴑𐴠 , 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴕𐴠𐴁𐴤𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 , 𐴓𐴝𐴌𐴥𐴝𐴘𐴌 𐴎𐴦𐴝𐴣𐴏𐴢 𐴓𐴡𐴘 𐴒𐴡𐴐𐴃𐴤𐴡 𐴒𐴡𐴌𐴠𐴀𐴠𐴌𐴊𐴧𐴠 𐴀𐴡𐴑𐴃𐴤𐴡𐴃 , 𐴒𐴡𐴃𐴡 𐴈𐴝𐴙𐴓𐴧𐴝 𐴁𐴞𐴀𐴞𐴕𐴧𐴝 𐴂𐴠𐴌𐴝𐴘 𐴐𐴤𐴝𐴀𐴝𐴌𐴡 𐴕𐴡 𐴁𐴝𐴎𐴠 , 𐴁𐴟𐴄 𐴓𐴡𐴘 𐴀𐴝𐴘𐴧𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴡𐴌 𐴀𐴥𐴞𐴑𐴧𐴝𐴃𐴧𐴟 𐴔𐴡𐴗𐴚𐴋𐴤𐴟 𐴀𐴠𐴓𐴝𐴑𐴝𐴌 𐴆𐴤𐴙𐴡𐴑 𐴂𐴡𐴕𐴋𐴟 𐴉𐴝𐴌𐴝𐴌 𐴀𐴟𐴎𐴟 𐴏𐴝𐴓𐴝𐴘 𐴀𐴝𐴘𐴧𐴠𐴌𐴊𐴧𐴠 𐴁𐴟𐴄 𐴀𐴠𐴑𐴧𐴤𐴝𐴕𐴡𐴌𐴠 𐴐𐴤𐴡𐴕𐴊𐴡 𐴒𐴡𐴌𐴥𐴞 , 𐴂𐴥𐴠𐴄𐴌𐴟𐴓 𐴒𐴡𐴌𐴠𐴀𐴠𐴌 𐴊𐴧𐴠 𐴕𐴠𐴁𐴤𐴞𐴌 𐴉𐴥𐴡𐴗𐴏𐴠 , 𐴃𐴝𐴌𐴝𐴌 𐴕𐴠𐴁𐴤𐴞𐴌 𐴀𐴟𐴎𐴟 𐴀𐴝𐴘𐴁𐴡𐴓𐴧𐴝 𐴀𐴞𐴐𐴤𐴝𐴌𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 , 𐴕𐴡 𐴔𐴝𐴕𐴞𐴀𐴞 𐴒𐴤𐴠𐴣𐴍𐴝𐴘 𐴒𐴡𐴌𐴥𐴞 𐴁𐴟𐴄 𐴏𐴝𐴓𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴠𐴃𐴡𐴓𐴧𐴝 𐴓𐴦𐴡𐴌𐴝𐴘 𐴊𐴤𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴆𐴤𐴙𐴡𐴑 𐴂𐴡𐴕𐴋𐴟 𐴉𐴝𐴌𐴝𐴌 𐴉𐴡𐴏𐴥𐴞𐴔𐴠 𐴀𐴟𐴃𐴧𐴡𐴌𐴠 𐴂𐴠𐴌𐴝𐴘 𐴀𐴠𐴑 𐴔𐴝𐴙𐴓 𐴃𐴡𐴁𐴦𐴡𐴃𐴡𐴃 𐴀𐴝𐴏𐴥𐴠𐴊𐴠 𐴀𐴝𐴑𐴧𐴙𐴝𐴁𐴡𐴌 𐴁𐴤𐴟𐴔𐴠 𐴉𐴝𐴌𐴝𐴃 𐴃𐴤𐴝𐴑𐴠𐴊𐴠 𐴁𐴟𐴄 𐴏𐴝𐴓𐴝𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴳 𐴎𐴡𐴕 𐴐𐴤𐴡𐴣𐴀𐴡 𐴁𐴝𐴚𐴓𐴝𐴊𐴠𐴐𐴢 𐴑𐴟𐴃𐴤𐴟𐴉𐴝𐴓𐴡𐴚 , 𐴁𐴝𐴓𐴟𐴈𐴥𐴝𐴓𐴞 𐴀𐴝𐴌 𐴕𐴥𐴞𐴓𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃 𐴃𐴤𐴝𐴑𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊 𐴱 𐴲 𐴎𐴡𐴕 𐴀𐴝𐴌 𐴔𐴝𐴘𐴧𐴝 𐴰 𐴱 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴴 𐴳 𐴎𐴡𐴕 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴉𐴟𐴏𐴥𐴝𐴌 𐴀𐴝𐴏𐴥𐴝𐴌 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴁𐴦𐴝𐴊𐴠 𐴎𐴝𐴕𐴝𐴀𐴝 𐴒𐴠𐴓𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴋𐴝𐴓𐴝𐴓𐴠 𐴎𐴡𐴕𐴉𐴡𐴃𐴞 𐴰 𐴷 𐴓𐴝𐴑 𐴄𐴞𐴛𐴝𐴌 𐴊𐴡𐴌𐴠 𐴓𐴡𐴘 𐴁𐴦𐴝𐴊𐴠 , 𐴁𐴡𐴌𐴔𐴥𐴝 𐴁𐴝𐴀𐴝𐴘 𐴔𐴡𐴓𐴠𐴆𐴤𐴙𐴝 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 , 𐴄𐴠𐴑𐴕𐴝𐴉𐴡𐴌 𐴒𐴤𐴝𐴣𐴍𐴡𐴃𐴧𐴟 𐴁𐴟𐴄 𐴓𐴡𐴘 𐴕𐴠𐴀𐴠𐴓𐴡𐴕𐴡𐴌 𐴁𐴦𐴝𐴊𐴠 , 𐴕𐴝𐴙𐴅𐴧𐴡𐴓 𐴋𐴞𐴘𐴝𐴃 𐴉𐴡𐴣𐴀𐴡𐴏𐴞 𐴘𐴡𐴌𐴠 𐴁𐴡𐴌𐴔𐴥𐴝𐴌 𐴀𐴥𐴞𐴕𐴃𐴟 𐴒𐴞𐴘𐴠𐴊𐴠 𐴁𐴟𐴍𐴡𐴃 𐴉𐴝𐴓𐴊𐴝𐴘 𐴁𐴦𐴝𐴊𐴠 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴀𐴝𐴑𐴝 𐴄𐴡𐴗𐴚 𐴉𐴝𐴌𐴝𐴃 𐴎𐴝𐴀𐴝𐴌𐴊𐴧𐴠 𐴘𐴝𐴀𐴝𐴕 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴑𐴝𐴕𐴟𐴕 𐴔𐴡𐴎𐴞𐴕 𐴑𐴠𐴙𐴏𐴢 𐴑𐴤𐴟𐴓𐴞 𐴁𐴦𐴝𐴊𐴠 𐴏𐴥𐴝𐴎𐴝 𐴊𐴞𐴀𐴞 𐴉𐴝𐴌𐴠𐴀𐴠 𐴉𐴥𐴝𐴀𐴝𐴕 𐴐𐴤𐴡𐴔𐴉𐴡𐴌𐴑𐴡 𐴀𐴞𐴔𐴞𐴒𐴞𐴌𐴞𐴐𐴤𐴠𐴕 𐴋𐴞𐴂𐴦𐴝𐴌𐴔𐴥𐴠𐴕𐴡𐴌𐴠 𐴒𐴡𐴏𐴥𐴝𐴘 𐴊𐴞𐴀𐴞 𐴁𐴦𐴝𐴊𐴠 , 𐴔𐴦𐴝𐴔𐴠𐴓𐴝 𐴓𐴡𐴘 𐴎𐴡𐴍𐴞𐴃𐴡 𐴀𐴝𐴏𐴥𐴠𐴊𐴠 𐴀𐴡𐴙𐴕𐴧𐴡 𐴀𐴝𐴐𐴤𐴝𐴔𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴤𐴡𐴌𐴞𐴁𐴤𐴝𐴌 𐴑𐴝𐴌𐴖𐴝𐴘 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

Sources : ၇ခိုင်နေ့စဥ်