𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴠𐴑 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴖𐴝𐴉𐴠𐴏𐴢 𐴕𐴞𐴎𐴝𐴘𐴁𐴤𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴠𐴀𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃𐴧𐴟 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴁𐴤𐴟𐴃𐴡𐴌𐴃𐴧𐴟 𐴀𐴠𐴑 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴖𐴡𐴌𐴠 𐴖𐴝𐴉𐴠𐴏𐴢 𐴕𐴞𐴎𐴝𐴀𐴝 𐴐𐴤𐴟𐴌𐴟 𐴒𐴡𐴌𐴥𐴞𐴁𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴠𐴀𐴠𐴌 𐴁𐴡𐴓𐴞 , 𐴉𐴥𐴠𐴌𐴖𐴝𐴌𐴞 𐴔𐴝𐴐𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 𐴕𐴠𐴀𐴞𐴓𐴧𐴠𐴊𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴢 ( 𐴔𐴠𐴌𐴠𐴕𐴔𐴝 𐴀𐴝𐴓𐴥𐴝𐴚 ) 𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴖𐴝𐴉𐴠𐴏𐴢 𐴓𐴡𐴘 𐴎𐴝𐴘𐴁𐴤𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 ( 𐴵 ) 𐴏𐴥𐴝𐴕 𐴐𐴡𐴌𐴥𐴡𐴃 𐴌𐴝𐴙𐴑𐴧𐴤𐴙𐴠 (𐴱 ) 𐴁𐴡𐴌𐴔𐴥𐴝𐴃 𐴃𐴤𐴝𐴑𐴧𐴞𐴀𐴞𐴓𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴖𐴝 𐴉𐴡𐴌𐴥𐴞𐴁𐴤𐴡 ( 𐴲 ) 𐴏𐴥𐴞𐴌𐴝 𐴀𐴥𐴡𐴘𐴧𐴠𐴊𐴠 𐴒𐴤𐴡𐴌𐴒𐴟𐴐𐴧𐴞𐴌𐴓𐴧𐴝 𐴏𐴥𐴡𐴀𐴞 𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴢 𐴀𐴝𐴊𐴝𐴓𐴡𐴃𐴡𐴌 𐴔𐴝𐴙𐴕𐴧𐴝 𐴈𐴝𐴁𐴡𐴏𐴢 𐴃𐴤𐴝𐴑𐴝 𐴉𐴡𐴌𐴞𐴁𐴤𐴡 ( 𐴳 ) 𐴁𐴝𐴚𐴓𐴝𐴊𐴠𐴐𐴡𐴃 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝𐴙𐴕𐴊𐴡𐴌 𐴁𐴝𐴁𐴡𐴃𐴠 , 𐴔𐴦𐴝𐴣 𐴁𐴝𐴂𐴢 𐴊𐴟𐴕𐴥𐴞 𐴎𐴡𐴕 𐴁𐴡𐴌𐴔𐴥𐴝𐴃 𐴃𐴤𐴝𐴑𐴧𐴞𐴀𐴞𐴓𐴊𐴠 𐴀𐴟𐴖𐴝 𐴉𐴡𐴌𐴥𐴞𐴁𐴤𐴡 ( 𐴴) 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴁𐴝𐴚𐴓𐴝𐴊𐴠𐴐𐴡𐴃 𐴀𐴥𐴡𐴘𐴧𐴠𐴊𐴠 𐴏𐴥𐴡𐴀𐴞 𐴁𐴡𐴓𐴞 𐴀𐴝𐴊𐴝𐴓𐴡𐴃𐴡𐴌 𐴔𐴝𐴙𐴕𐴧𐴝 𐴈𐴝𐴁𐴡𐴏𐴢 𐴃𐴤𐴝𐴑𐴝 𐴉𐴡𐴌𐴞𐴁𐴤𐴡 ( 𐴵 ) 𐴕𐴞𐴎𐴡𐴌 𐴀𐴝𐴃𐴧𐴝 𐴑𐴤𐴟𐴐𐴞 𐴘𐴠 𐴖𐴝𐴉𐴠𐴏𐴢 𐴀𐴝𐴘𐴧𐴠𐴌𐴊𐴧𐴠 𐴀𐴥𐴟𐴖𐴝 𐴉𐴡𐴌𐴞𐴁𐴤𐴡 𐴱𐴱

𐴌𐴞𐴉𐴟𐴎𐴞 𐴀𐴥𐴟𐴀𐴟𐴕𐴡𐴌𐴠 𐴖𐴝𐴉𐴠𐴏𐴢 𐴒𐴡𐴏𐴥𐴞 𐴓𐴡𐴘𐴁𐴝𐴌 𐴁𐴝𐴁𐴡𐴃𐴠 𐴸 𐴱 𐴰 𐴲 𐴐𐴤𐴡𐴕 𐴀𐴝𐴌 𐴹 𐴱 𐴰 𐴲 𐴐𐴤𐴡𐴕𐴡𐴃 𐴊𐴟𐴘 𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴙𐴅𐴧𐴤𐴞𐴓𐴊𐴠 𐴀𐴝𐴏𐴥𐴠 , 𐴀𐴥𐴠 𐴀𐴡𐴑𐴃𐴤𐴡𐴃 𐴀𐴠𐴑𐴀𐴡𐴔 𐴁𐴝𐴌 𐴖𐴝𐴉𐴠𐴏𐴢 𐴓𐴡𐴘𐴁𐴝𐴌 𐴏𐴟𐴑𐴃𐴞 𐴒𐴡𐴙𐴅𐴧𐴤𐴙𐴝 𐴰 𐴶 𐴲 𐴲 𐴎𐴡𐴕 𐴀𐴝𐴌 𐴊𐴟𐴘𐴀𐴡𐴔 𐴁𐴝𐴌 𐴖𐴝𐴉𐴠𐴏𐴢 𐴓𐴡𐴘 𐴁𐴝𐴌 𐴰 𐴵 𐴴 𐴳 𐴎𐴡𐴕 𐴏𐴟𐴑𐴃𐴞 𐴒𐴡𐴙𐴅𐴧𐴤𐴙𐴝 𐴀𐴝𐴐𐴧𐴤𐴞𐴀𐴞𐴓 𐴁𐴡𐴓𐴞 , 𐴓𐴠𐴙𐴑𐴧𐴤𐴙𐴠𐴊𐴠 𐴈𐴥𐴡𐴁𐴡𐴌𐴡𐴃 𐴀𐴝𐴏𐴥𐴠 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴊𐴟𐴕𐴥𐴞 𐴊𐴠𐴐𐴡𐴌 𐴀𐴝𐴉𐴥𐴡𐴏𐴡𐴃 𐴏𐴟𐴑𐴃𐴞 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 𐴀𐴠𐴑 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴀𐴥𐴟𐴊𐴧𐴝 𐴖𐴝𐴉𐴠𐴏𐴢 𐴓𐴡𐴘 𐴒𐴞𐴘𐴠𐴊𐴠 𐴕𐴥𐴝𐴘 𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴁𐴝𐴌𐴡𐴃 𐴖𐴝𐴉𐴠𐴏𐴢 𐴓𐴡𐴘 𐴎𐴝𐴀𐴝 , 𐴁𐴤𐴝𐴓𐴝 𐴒𐴡𐴌𐴥𐴞 𐴀𐴥𐴡𐴘 𐴉𐴝𐴌𐴞𐴁𐴤𐴡𐴓𐴧𐴝 , 𐴐𐴤𐴡𐴔𐴉𐴡𐴌𐴑𐴡 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴢 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴀𐴝𐴏𐴥𐴠𐴊𐴠/𐴀𐴝𐴓𐴞 𐴅𐴞𐴕𐴧𐴥𐴝 𐴘𐴠 𐴈𐴡𐴘𐴧𐴠𐴊𐴠 ! 𐴊𐴠𐴐𐴡𐴙𐴃𐴧𐴝𐴃𐴝 𐴊𐴞𐴀𐴞 𐴓𐴠𐴀𐴠, 𐴀𐴝𐴎𐴝𐴊𐴝𐴕𐴝 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴉𐴝𐴌𐴞𐴓𐴠𐴀𐴠 , 𐴉𐴝𐴑𐴧𐴝 𐴕𐴞𐴌𐴝𐴉𐴡𐴃𐴧𐴝 𐴉𐴝𐴘𐴓𐴠𐴀𐴠 𐴀𐴝𐴌 𐴕𐴞𐴎𐴡𐴌 𐴕𐴞𐴎𐴡𐴌 𐴁𐴤𐴞𐴍𐴝𐴃 𐴎𐴝𐴘 𐴉𐴝𐴌𐴞 𐴓𐴠𐴀𐴠 , 𐴃𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴖𐴝𐴉𐴠𐴏𐴢 𐴎𐴝𐴘𐴁𐴡𐴊𐴠 , 𐴕𐴡 𐴀𐴥𐴡𐴘 𐴓𐴠𐴀𐴠 𐴖𐴝𐴉𐴠𐴏𐴢 𐴕𐴡 𐴎𐴝𐴘 𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 , 𐴒𐴡𐴏𐴥𐴞 𐴓𐴡𐴘𐴁𐴡𐴊𐴠 𐴑𐴠𐴀𐴠𐴔 𐴀𐴝𐴌 𐴔𐴝𐴎𐴠 𐴔𐴝𐴅𐴧𐴤𐴙𐴝 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 , 𐴎𐴠𐴍𐴥𐴠 𐴀𐴥𐴞𐴃𐴝𐴌𐴝𐴌 𐴈𐴥𐴝𐴕𐴝 𐴉𐴞𐴕𐴝 𐴏𐴡𐴓𐴝 𐴉𐴥𐴝𐴌𐴥𐴝 𐴀𐴝𐴌 𐴏𐴠𐴇𐴥𐴠𐴃 𐴀𐴝𐴌 𐴀𐴠𐴓𐴥𐴡𐴔 𐴐𐴤𐴡𐴣𐴀𐴡 𐴔𐴟𐴓 𐴎𐴡𐴌𐴟𐴌𐴞 𐴏𐴞𐴏𐴢 𐴁𐴠𐴒𐴧𐴤𐴞𐴕𐴡𐴌 𐴁𐴠𐴁𐴡𐴏𐴃𐴝 𐴒𐴡𐴌𐴝𐴀𐴝 𐴒𐴞𐴘𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 𐴱𐴱

Sources : RFAburmese