𐴌𐴟𐴇𐴝𐴙𐴚𐴒𐴙𐴝 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓𐴡𐴌 𐴔𐴝𐴎𐴤𐴠 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞𐴃 𐴊𐴟𐴘 𐴎𐴡𐴕 𐴉𐴟𐴖𐴝 𐴒𐴟𐴓𐴞 𐴈𐴥𐴝𐴘𐴧𐴠 𐴱𐴱

𐴒𐴡𐴃𐴡 𐴁𐴟𐴙𐴃 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴀𐴟𐴑𐴤𐴞𐴘𐴝 𐴀𐴟𐴉𐴡𐴎𐴞𐴓𐴥𐴝𐴌 𐴸 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴉𐴡𐴏𐴥𐴞𐴔 𐴋𐴤𐴝𐴑𐴡𐴌 𐴀𐴠𐴑 𐴁𐴡𐴓𐴡𐴑𐴡𐴃 , 𐴀𐴝𐴓𐴞𐴊𐴤𐴝 𐴉𐴡𐴏𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴋𐴝𐴀𐴝𐴘𐴌 𐴔𐴝𐴎𐴤𐴠 𐴔𐴝𐴌𐴝 𐴔𐴝𐴌𐴞𐴃 𐴊𐴟𐴘 𐴎𐴡𐴕 𐴉𐴟𐴖𐴝𐴌 𐴒𐴦𐴝𐴃 𐴒𐴟𐴓𐴞 𐴉𐴡𐴌𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 / 𐴀𐴟𐴔𐴧𐴠 𐴇𐴝𐴉𐴏𐴝 𐴁𐴡𐴐𐴢 𐴱 𐴱 𐴁𐴡𐴏𐴥𐴡𐴌 𐴀𐴝𐴌 / 𐴀𐴝𐴁𐴟𐴓 𐴉𐴡𐴘𐴝𐴎 𐴁𐴡𐴐𐴢 𐴸 𐴁𐴡𐴏𐴥𐴡𐴌 , 𐴀𐴝𐴓𐴞𐴊𐴤𐴝 𐴉𐴡𐴏𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴋𐴝𐴀𐴝𐴘𐴌 𐴔𐴝𐴎𐴤𐴠 𐴀𐴝𐴃𐴤𐴞𐴑𐴧𐴙𐴝 𐴀𐴝𐴉𐴥𐴡𐴏𐴡𐴃 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞 𐴐𐴤𐴟𐴌𐴟 𐴀𐴥𐴡𐴘𐴧𐴠 , 𐴀𐴥𐴠 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞𐴃 𐴖𐴡𐴌𐴠 𐴈𐴟𐴖𐴝 𐴒𐴞𐴘𐴠𐴊𐴠 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴁𐴡𐴓𐴞 , 𐴀𐴟𐴑𐴤𐴞𐴘𐴝 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴀𐴡𐴉𐴥𐴞𐴏𐴝𐴌 ( 𐴀𐴡 𐴏𐴞 ) 𐴐𐴠𐴙𐴑 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 𐴈𐴡𐴘𐴧𐴠 𐴱𐴱

𐴒𐴤𐴝𐴙𐴓 𐴀𐴥𐴡𐴘𐴧𐴝 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴃𐴡𐴌𐴝𐴃𐴡𐴌𐴞 𐴀𐴠𐴔 𐴀𐴠𐴏𐴢 𐴀𐴠𐴉𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴎𐴠𐴍𐴠 𐴀𐴠𐴑𐴀𐴡𐴔 𐴏𐴞𐴑𐴞𐴐𐴧𐴝 𐴀𐴥𐴡𐴘 𐴉𐴝𐴌𐴠 𐴉𐴝𐴀𐴝𐴕 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴒𐴞𐴘𐴠 , 𐴁𐴦𐴝𐴊𐴠 𐴘𐴝𐴀𐴝𐴕𐴃𐴟 𐴄𐴤𐴞𐴑 𐴔𐴡𐴃𐴠 𐴀𐴟𐴉𐴡𐴎𐴟𐴑𐴃𐴡 𐴏𐴥𐴡𐴀𐴞 𐴁𐴤𐴝𐴉𐴠 𐴀𐴠𐴓𐴝𐴅 𐴀𐴥𐴡𐴘 𐴉𐴝𐴌𐴠 𐴉𐴝𐴀𐴝𐴕 , 𐴑𐴡𐴑𐴏𐴡 𐴁𐴝𐴎𐴝𐴌 𐴏𐴥𐴡𐴊𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴁𐴡𐴓𐴞 , 𐴀𐴡 𐴏𐴞 / 𐴐𐴠𐴙𐴑 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 𐴈𐴡𐴘𐴧𐴠 𐴱𐴱

𐴑𐴠𐴀𐴠𐴔 𐴑𐴡𐴁𐴎𐴝 𐴒𐴡𐴌𐴥𐴞 𐴊𐴝𐴊𐴝𐴒𐴞𐴌𐴞 𐴒𐴡𐴌𐴥𐴞𐴁𐴡𐴓𐴧𐴝 𐴊𐴟𐴖𐴝 𐴕𐴟𐴖𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴀𐴟𐴍𐴥𐴞 𐴀𐴝𐴙𐴐𐴧𐴤𐴙𐴠 , 𐴀𐴥𐴠 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴔𐴝𐴎𐴤𐴠 𐴁𐴟𐴙𐴃 𐴁𐴝𐴌𐴠 𐴀𐴠𐴑𐴀𐴡𐴔 𐴁𐴝𐴌 𐴔𐴝𐴌𐴝 𐴔𐴝𐴌𐴞 𐴐𐴤𐴟𐴌𐴟 𐴀𐴥𐴡𐴘𐴧𐴠 , 𐴈𐴥𐴡𐴁𐴡𐴌 𐴉𐴝𐴘 𐴔𐴡𐴕𐴃𐴡𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴉𐴟𐴓𐴞𐴐𐴢 𐴀𐴝𐴌 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴢 𐴈𐴡𐴀𐴠𐴑 𐴋𐴝𐴀𐴝𐴘 , 𐴃𐴡𐴌𐴝𐴃𐴡𐴌𐴞 𐴔𐴦𐴝𐴔𐴠𐴓 𐴀𐴥𐴡𐴘𐴧𐴠𐴊𐴠 𐴎𐴝𐴒𐴝𐴃 𐴉𐴡𐴣𐴀𐴡𐴙𐴏𐴧𐴙𐴠 𐴒𐴤𐴡𐴘 , 𐴔𐴡𐴕𐴃𐴡𐴌 𐴘𐴝𐴀𐴝𐴌 𐴀𐴝𐴒𐴠 𐴀𐴝𐴃𐴡𐴚𐴁𐴝𐴊𐴞 𐴒𐴟𐴌𐴥𐴟𐴂𐴢 𐴊𐴤𐴝𐴘 𐴒𐴞𐴘𐴡𐴘 𐴁𐴡𐴓𐴞 / 𐴀𐴡 𐴏𐴞 𐴘𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴇𐴥𐴝𐴓𐴡𐴃 𐴑𐴡𐴕𐴄𐴟𐴌𐴟𐴓𐴡𐴌 𐴁𐴤𐴟𐴃𐴡𐴌𐴠 𐴀𐴥𐴡𐴘𐴧𐴠 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴢𐴀𐴥𐴡𐴑𐴧𐴡𐴓 𐴒𐴤𐴡𐴄𐴡𐴕𐴝𐴌 𐴎𐴝𐴒𐴝𐴃 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴒𐴡𐴐𐴃𐴤𐴡 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴀𐴝𐴌 𐴀𐴝𐴃𐴡𐴚𐴁𐴝𐴊𐴞 𐴒𐴟𐴌𐴥𐴟𐴂𐴢 𐴀𐴥𐴟𐴀𐴟𐴕𐴡𐴌𐴠 𐴊𐴤𐴡𐴌𐴞𐴁𐴡𐴓𐴧𐴝 𐴑𐴝𐴌𐴖𐴝𐴘 𐴒𐴡𐴌𐴠𐴀𐴠𐴌 𐴁𐴡𐴓𐴞 / 𐴀𐴡 𐴏𐴞 𐴐𐴠𐴙𐴑 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 𐴈𐴡𐴘𐴧𐴠 𐴱𐴱

Sources : Dhakatribune