𐴏𐴝𐴘𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌𐴡𐴃 𐴰 𐴳 𐴎𐴡𐴕𐴡𐴌 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴂𐴥𐴠𐴒𐴟𐴀𐴟 𐴋𐴞𐴐𐴄𐴤𐴞𐴑 𐴏𐴝𐴘𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴒𐴗𐴠𐴀𐴠 𐴆𐴤𐴙𐴡𐴚 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴌𐴠𐴕𐴒𐴟𐴕- 𐴉𐴟𐴌𐴟𐴔 𐴒𐴝𐴌𐴥𐴞𐴌 𐴌𐴝𐴎 𐴉𐴡𐴣𐴃𐴤𐴡𐴃 , 𐴉𐴥𐴠𐴌𐴖𐴝𐴌𐴞 𐴔𐴝𐴐𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 𐴊𐴦𐴟𐴛𐴅𐴧𐴙𐴝 𐴲 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴏𐴝𐴘𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴸 𐴲 𐴎𐴡𐴕 𐴔𐴡𐴌𐴡𐴊 𐴴 𐴎𐴡𐴕 𐴔𐴝𐴘𐴧𐴝 , 𐴀𐴥𐴞𐴃𐴝𐴌𐴝 𐴀𐴝𐴌𐴑𐴝𐴕𐴡𐴃𐴧𐴟 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴝 𐴌𐴠𐴕𐴒𐴟𐴕 𐴀𐴝𐴘𐴧𐴠𐴌𐴊𐴧𐴠 𐴉𐴡𐴣𐴃𐴤𐴡𐴃 , 𐴌𐴠𐴕𐴒𐴟𐴕- 𐴉𐴟𐴌𐴟𐴔 𐴒𐴝𐴌𐴥𐴞𐴌 𐴌𐴝𐴎 𐴉𐴡𐴣𐴃𐴤𐴡𐴌 𐴏𐴠𐴑 𐴂𐴦𐴟𐴏𐴄𐴡𐴃 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴏𐴥𐴟𐴕 𐴏𐴠 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴁𐴦𐴝𐴊𐴠 𐴈𐴡𐴕 𐴊𐴤𐴝𐴌𐴝 𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴤𐴡 𐴕𐴡 𐴎𐴝𐴕𐴥𐴞 𐴁𐴡𐴓𐴞 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 , 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴕𐴞𐴎𐴡𐴌 𐴕𐴝𐴒𐴤𐴞 𐴈𐴝𐴍𐴝 𐴊𐴠𐴐𐴢 𐴃𐴞𐴘𐴝𐴒𐴢 𐴒𐴡𐴌𐴥𐴞 , 𐴕𐴟𐴖𐴝 𐴎𐴝𐴒𐴝𐴌 𐴃𐴝𐴓𐴝𐴐𐴡𐴃 , 𐴊𐴤𐴡𐴌𐴝 𐴉𐴡𐴌𐴠𐴀𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴠𐴈𐴥𐴡𐴕𐴡𐴌 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 ( 𐴳 ) 𐴶 , ( 𐴲 ) 𐴶 𐴔𐴡𐴎𐴞𐴕 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴁𐴦𐴝𐴊𐴠 , 𐴊𐴟𐴘 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴓𐴡𐴃𐴞 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴌𐴠𐴀𐴠𐴌 𐴁𐴡𐴓𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴊𐴡𐴊 𐴒𐴡𐴌𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴥𐴠𐴌𐴖𐴝𐴌𐴞 𐴔𐴝𐴐𐴡𐴌 𐴷 𐴱 𐴀𐴝𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 , 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑 , 𐴀𐴝𐴙𐴑𐴧𐴙𐴝𐴁𐴢 𐴀𐴝𐴌 𐴔𐴗𐴠𐴕 𐴋𐴞𐴐𐴄𐴤𐴞𐴑 , 𐴔𐴥𐴟 𐴋𐴟𐴕 𐴐𐴤𐴡𐴀𐴡𐴌 , 𐴊𐴟𐴕𐴥𐴞 𐴎𐴝𐴒𐴝 𐴔𐴞𐴓𐴝𐴘 𐴶 𐴹 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌 𐴀𐴠𐴉𐴢 𐴀𐴠 , 𐴘𐴠 𐴎𐴡𐴔𐴝 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴔𐴡𐴎𐴞𐴕 , 𐴱 𐴲 𐴰 𐴲 𐴐𐴤𐴡𐴕 𐴋𐴞𐴏𐴡𐴔𐴁𐴡𐴌 𐴔𐴝𐴐𐴢 𐴀𐴥𐴡𐴘𐴃𐴠 𐴳 𐴲 𐴰 𐴲 𐴐𐴤𐴡𐴕 𐴉𐴥𐴠𐴌𐴖𐴝𐴌𐴞 𐴔𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 , 𐴀𐴝𐴌𐴑𐴝𐴕 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔 , 𐴊𐴟𐴕𐴥𐴞 𐴎𐴝𐴒𐴝𐴃𐴧𐴤𐴟 𐴕𐴠𐴀𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴉𐴡𐴣𐴃𐴤𐴡𐴃 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕 𐴔𐴞𐴓𐴝𐴘 𐴴 𐴸 𐴹 𐴱 𐴎𐴡𐴕 𐴀𐴥𐴡𐴘𐴧𐴠 , 𐴀𐴥𐴠𐴃𐴧𐴟 𐴸 𐴷 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴠 , 𐴊𐴟𐴘 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 𐴱𐴱

Sources : RFAburmese