𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌𐴓𐴧𐴝 𐴅𐴝𐴌𐴔𐴡𐴕𐴡𐴌 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴡𐴃 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴟𐴊𐴧𐴤𐴡 𐴀𐴡𐴉𐴡𐴌𐴝𐴊 𐴒𐴡𐴌𐴠𐴀𐴠𐴌𐴊𐴧𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴠𐴌𐴟𐴊𐴧𐴤𐴠 ,𐴶 𐴱 𐴎𐴡𐴕 𐴁𐴡𐴌𐴔𐴥𐴝𐴌 𐴊𐴠𐴐𐴡𐴙𐴃𐴧𐴝 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌𐴓𐴧𐴝 𐴈𐴝𐴔 𐴒𐴡𐴌𐴠𐴀𐴠𐴌𐴊𐴧𐴠 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴥𐴟𐴂𐴢 𐴓𐴡𐴘 𐴔𐴞𐴓𐴞 , 𐴅𐴝𐴌𐴔𐴡𐴕𐴡𐴃 𐴀𐴝𐴏𐴥𐴠𐴊𐴠 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴡𐴃 , 𐴅𐴝𐴕𐴖𐴝𐴌𐴞 𐴔𐴝𐴐𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴁𐴡𐴓𐴞 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴱 𐴲 𐴰 𐴲 𐴐𐴤𐴡𐴕𐴡𐴃 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 , 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴒𐴡𐴌𐴠𐴀𐴠𐴌𐴊𐴧𐴠 𐴀𐴡𐴉𐴥𐴡𐴌𐴝𐴊 𐴀𐴥𐴞𐴀𐴞𐴕 𐴐𐴤𐴡𐴣𐴀𐴡 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌 𐴖𐴡𐴌𐴠 𐴒𐴡𐴙𐴅𐴧𐴤𐴙𐴠𐴊𐴠 𐴀𐴡𐴉𐴥𐴡𐴌𐴝𐴊 , 𐴁𐴠𐴒𐴧𐴤𐴞𐴕𐴡𐴌 𐴎𐴞𐴔𐴧𐴝𐴊𐴝𐴌 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴀𐴥𐴡𐴑𐴧𐴡𐴓 𐴁𐴡𐴓𐴞 𐴈𐴡𐴀𐴡𐴘 , 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴥𐴟𐴉𐴠 𐴕𐴠𐴀𐴠𐴓𐴝𐴘𐴧𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴥𐴟𐴉𐴡𐴌 𐴉𐴥𐴟𐴣𐴖𐴝𐴣𐴃𐴞 𐴔𐴞𐴓𐴞 𐴑𐴠𐴙𐴏𐴢 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴌𐴔𐴥𐴝𐴌 𐴊𐴠𐴐𐴡𐴙𐴃𐴧𐴝 𐴶 𐴱 𐴎𐴡𐴕 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠, 𐴷 𐴱 𐴰 𐴲 𐴐𐴤𐴡𐴕𐴡𐴃 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴈𐴥𐴝𐴘𐴧𐴝 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 , 𐴀𐴝𐴌 𐴱 𐴲 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴁𐴠𐴌𐴟𐴊𐴧𐴤𐴞 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴠𐴊𐴠 𐴑𐴠𐴙𐴏𐴧𐴥𐴟 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝𐴙𐴕 , 𐴀𐴠𐴓𐴥𐴡𐴔𐴊𐴝𐴌 , 𐴀𐴥𐴝𐴙𐴓𐴧𐴝 , 𐴉𐴝𐴌𐴝𐴌 𐴀𐴥𐴟𐴑𐴆𐴤𐴙𐴟 𐴌𐴥𐴠𐴔𐴥𐴟 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴀𐴝𐴏𐴥𐴠 𐴱𐴱

𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴥𐴟𐴉𐴡𐴌 𐴁𐴦𐴝𐴕𐴞 / 𐴏𐴠𐴒𐴠𐴄𐴠𐴌𐴞 𐴔𐴠𐴃𐴙𐴟 𐴀𐴠𐴏𐴔𐴥𐴞𐴃𐴤𐴠 𐴈𐴡𐴘𐴧𐴠𐴊𐴠 ! 𐴎𐴟𐴊𐴧𐴤𐴡 𐴀𐴡𐴉𐴥𐴡𐴌𐴝𐴊 𐴎𐴤𐴝𐴑𐴧𐴗𐴝 𐴈𐴝𐴍𐴝 𐴔𐴝𐴌𐴝 𐴒𐴡𐴌𐴥𐴠𐴊𐴠 𐴀𐴥𐴞𐴀𐴞𐴕𐴡𐴌𐴓𐴧𐴝 , 𐴊𐴠𐴐𐴁𐴞𐴊𐴠𐴐𐴞 𐴎𐴡𐴕𐴡 𐴐𐴤𐴡𐴔𐴝𐴎 𐴀𐴥𐴡𐴑𐴧𐴡𐴓 𐴕𐴡𐴔𐴝𐴙𐴕𐴊𐴝 𐴁𐴡𐴕𐴞𐴀𐴞 , 𐴎𐴝𐴃 𐴊𐴤𐴡𐴌𐴔𐴡 𐴉𐴡𐴌𐴥𐴡𐴑 𐴕𐴡 𐴒𐴡𐴌𐴥𐴞 𐴀𐴥𐴠 𐴎𐴝𐴒𐴝𐴌 𐴔𐴝𐴙𐴐𐴤𐴡𐴌 𐴉𐴡𐴑𐴧𐴤𐴡𐴌𐴃𐴧𐴟 𐴃𐴤𐴞𐴘𐴝𐴘 , 𐴊𐴠𐴐𐴁𐴞𐴊𐴠𐴐𐴤𐴞 𐴔𐴟𐴃𐴦𐴝𐴓𐴧𐴠𐴑𐴝 𐴀𐴝𐴊𐴝𐴓𐴡𐴃𐴡𐴃 𐴎𐴝𐴓𐴠𐴔 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴑𐴠𐴙𐴏𐴢 𐴑𐴤𐴟𐴓𐴞𐴁𐴝𐴌 𐴇𐴥𐴡𐴑 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴝𐴌 𐴐𐴤𐴡𐴣𐴀𐴡𐴃 𐴒𐴡𐴁𐴤𐴝 𐴀𐴥𐴞𐴏𐴝𐴉𐴠 , 𐴅𐴠𐴕𐴟𐴏𐴥𐴝𐴙𐴋𐴡𐴌𐴃𐴧𐴟 𐴁𐴝𐴏𐴞 𐴃𐴤𐴝𐴙𐴑𐴧𐴙𐴠𐴊𐴠 𐴔𐴝𐴙𐴕𐴐𐴤𐴡𐴌 𐴔𐴟𐴑𐴎𐴟𐴁𐴝𐴕𐴞 𐴏𐴥𐴟𐴖𐴝𐴓 𐴅𐴟𐴖𐴝𐴁 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴃𐴧𐴟 𐴊𐴤𐴝𐴘 𐴕𐴠𐴀𐴠𐴓𐴞 𐴒𐴞𐴘𐴡𐴘𐴊𐴠 𐴀𐴥𐴞𐴃𐴝𐴌𐴝𐴌 𐴔𐴟𐴑𐴎𐴟𐴁𐴝𐴕𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴝𐴌 𐴀𐴞𐴚𐴑𐴟𐴖𐴝𐴌𐴞𐴌 𐴌𐴠𐴂𐴟𐴄 𐴀𐴝𐴌 𐴀𐴡𐴙𐴕𐴧𐴡 𐴊𐴠𐴐𐴁𐴞𐴊𐴠𐴐𐴤𐴞 𐴎𐴡𐴕𐴡 𐴐𐴤𐴡𐴔𐴝𐴎𐴡𐴌 𐴌𐴠𐴂𐴟𐴄 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴞𐴕 𐴀𐴝𐴊𐴝𐴓𐴡𐴃𐴡𐴃 𐴊𐴡𐴌𐴈𐴥𐴝𐴏𐴡𐴌 𐴉𐴥𐴟𐴣𐴖𐴝𐴣𐴃𐴞 𐴒𐴝𐴣𐴃𐴤𐴞 𐴊𐴞𐴘𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴠𐴌𐴟𐴊𐴧𐴤𐴠 ( 𐴀𐴝𐴘 𐴏𐴞 𐴏𐴞 ) 𐴀𐴝𐴌 ( 𐴀𐴝𐴘 𐴏𐴞 𐴅𐴠 ) 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴡𐴃 𐴑𐴠𐴙𐴏𐴢 𐴏𐴡𐴓𐴠𐴀𐴠𐴌𐴊𐴧𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 , 𐴀𐴝𐴌𐴅𐴠𐴕𐴄𐴤𐴞𐴕𐴝 , 𐴃𐴟𐴌𐴑𐴞 𐴀𐴝𐴌 𐴀𐴡𐴏𐴄𐴡𐴌𐴡𐴓𐴞𐴘𐴝𐴌 𐴀𐴝𐴊𐴝𐴓𐴡𐴃𐴡𐴃 𐴔𐴝𐴎𐴤𐴠 𐴘𐴥𐴡 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴝𐴀𐴝 𐴎𐴝𐴀𐴝𐴌𐴊𐴧𐴠 𐴓𐴦𐴡𐴃 𐴉𐴝𐴀𐴝 𐴒𐴞𐴘𐴠 𐴱𐴱

Sources : burmese.dvb.no