𐴁𐴡𐴌𐴔𐴥𐴝 𐴘𐴠 𐴲 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 𐴱𐴱

𐴈𐴡𐴕𐴥𐴡 𐴑𐴞𐴏𐴞𐴔𐴧𐴝 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴊𐴠𐴐𐴡𐴃𐴧𐴟 𐴕𐴠𐴀𐴠𐴓𐴞 𐴎𐴝𐴘𐴁𐴝𐴌 𐴏𐴠𐴐𐴄𐴝 𐴒𐴡𐴌𐴠𐴀𐴠𐴌𐴊𐴧𐴠 , 𐴁𐴡𐴌𐴔𐴥𐴝𐴌 𐴊𐴠𐴐𐴡𐴙𐴃𐴧𐴝 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴌𐴟𐴇𐴝𐴙𐴚𐴒𐴙𐴝 𐴲 𐴱 𐴱 𐴎𐴡𐴕𐴡𐴌𐴠 , 𐴁𐴡𐴌𐴔𐴥𐴝𐴌 𐴀𐴠𐴑𐴧𐴤𐴝𐴕 𐴀𐴝𐴊𐴝𐴓𐴡𐴃𐴠 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴉𐴥𐴟𐴕𐴝𐴘 𐴊𐴞𐴘𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴲 𐴱 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴝𐴏𐴥𐴠 𐴱𐴱

𐴌𐴠𐴂𐴟𐴄 𐴔𐴡𐴎𐴞𐴕 𐴁𐴡𐴌𐴔𐴥𐴝𐴌 𐴊𐴡𐴀𐴡𐴙𐴕 𐴀𐴠𐴓𐴝𐴑𐴝𐴌 𐴀𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 , 𐴁𐴟𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴌 𐴀𐴠𐴑𐴧𐴤𐴝𐴕 𐴀𐴝𐴊𐴝𐴓𐴡𐴃𐴠 𐴅𐴝𐴕𐴖𐴝𐴌𐴞 𐴔𐴝𐴐𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴀𐴥𐴞𐴃𐴝𐴌𐴝 𐴌𐴠 𐴎𐴞𐴘𐴡𐴓 𐴉𐴥𐴟𐴕𐴝𐴘 𐴊𐴞𐴘𐴠𐴊𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴳 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴀𐴝𐴏𐴥𐴠𐴊𐴠 𐴉𐴟𐴖𐴝𐴙𐴕 𐴉𐴝𐴣𐴏𐴢 𐴎𐴡𐴕𐴡𐴌𐴠 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴊𐴡𐴌𐴠 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 , 𐴉𐴟𐴖𐴝𐴙𐴕 𐴁𐴝𐴑𐴞 𐴒𐴤𐴟𐴕𐴡𐴌𐴠 𐴃𐴞𐴕 𐴁𐴡𐴏𐴥𐴡𐴌𐴡𐴌 𐴊𐴡𐴌𐴠 𐴇𐴥𐴡𐴑𐴟𐴔 𐴒𐴡𐴌𐴥𐴞 𐴁𐴦𐴝𐴊𐴠 , 𐴁𐴠𐴒𐴧𐴤𐴟𐴕𐴡𐴌𐴠 𐴄𐴠𐴕𐴧𐴞𐴕 𐴏𐴠𐴕𐴄𐴝𐴌𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴱𐴱

𐴌𐴠𐴂𐴟𐴄 𐴔𐴡𐴎𐴞𐴕 , 𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴌 𐴔𐴟𐴓 𐴁𐴤𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴑𐴝𐴕𐴟𐴕𐴞 𐴏𐴥𐴝𐴁𐴟𐴃 𐴏𐴥𐴝𐴌𐴝 , 𐴒𐴡𐴃𐴡 𐴁𐴡𐴏𐴥𐴡𐴌 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴃 𐴀𐴠𐴑𐴧𐴤𐴝𐴕 𐴁𐴟𐴍𐴡𐴌 𐴖𐴡𐴌𐴃𐴧𐴟 𐴊𐴤𐴡𐴙𐴅𐴧𐴙𐴠𐴊𐴠 , 𐴑𐴞𐴕𐴃𐴟 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝𐴌𐴃𐴧𐴟 𐴊𐴠𐴐𐴡𐴙𐴃𐴧𐴝 𐴃𐴝 𐴇𐴥𐴡𐴑 𐴈𐴝𐴌𐴥𐴞 𐴓𐴡𐴘 𐴁𐴦𐴝𐴊𐴠 , 𐴈𐴡𐴀𐴡𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴥𐴝𐴌 𐴊𐴠𐴐𐴡𐴙𐴃𐴧𐴝 𐴕𐴡𐴀𐴡 , 𐴎𐴞𐴘𐴝𐴕𐴡𐴌 𐴕𐴡𐴃𐴞𐴅𐴝𐴃 𐴀𐴠 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴟𐴓𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴔𐴟𐴓 𐴇𐴥𐴡𐴑 𐴀𐴝𐴌 𐴔𐴟𐴓 𐴐𐴤𐴟𐴎𐴟𐴑 𐴐𐴤𐴟𐴁𐴞𐴊𐴝 𐴁𐴠𐴒𐴧𐴤𐴞𐴕𐴡𐴌𐴃𐴧𐴟 𐴔𐴝𐴀𐴝𐴌𐴟𐴔 𐴀𐴥𐴡𐴘 𐴒𐴞𐴘𐴡𐴘 𐴱𐴱

𐴐𐴤𐴟𐴊𐴠 𐴘𐴝𐴀𐴝𐴕 𐴕𐴡𐴀𐴡 , 𐴀𐴥𐴞𐴃𐴝𐴌𐴝 𐴌𐴠 𐴁𐴞𐴁𐴤𐴞𐴕𐴧𐴡 𐴐𐴤𐴡𐴔𐴡𐴃 𐴁𐴡𐴌𐴔𐴥𐴝 𐴘𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘𐴌𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴓𐴝𐴑 𐴓𐴝𐴑 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 , 𐴎𐴟𐴀𐴟𐴕𐴡𐴌𐴠 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴑𐴠𐴀𐴠𐴔 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴀𐴥𐴞𐴃𐴝𐴌𐴝 𐴌𐴠 𐴖𐴝𐴉𐴠𐴏𐴢 𐴕𐴞𐴎𐴝𐴘𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴈𐴡𐴀𐴡𐴘 𐴃𐴤𐴝𐴙𐴑𐴧𐴙𐴠 , 𐴔𐴡𐴕𐴃𐴡𐴌 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴟𐴌𐴝𐴘 𐴒𐴞𐴘𐴡𐴘 , 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴊𐴧𐴝 𐴖𐴝𐴉𐴠𐴏𐴢 𐴕𐴥𐴡 𐴕𐴞𐴎𐴝𐴀𐴝 𐴱𐴱

Sources : Ukhiyanews.com