𐴐𐴗𐴠 𐴂𐴠𐴌𐴠𐴏𐴝 𐴐𐴤𐴡𐴀𐴡𐴌𐴡𐴃 𐴷 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴌𐴠𐴕𐴒𐴟𐴕 𐴋𐴞𐴐𐴄𐴤𐴞𐴑 , 𐴐𐴗𐴠 𐴂𐴠𐴌𐴠𐴏𐴝 𐴐𐴤𐴡𐴀𐴡𐴌𐴡𐴃 𐴕𐴥𐴝𐴚 𐴂𐴥𐴠𐴕 ( 𐴱 ) 𐴓𐴡𐴔𐴁𐴤𐴡𐴌 𐴌𐴝𐴏𐴧𐴝𐴃 ( 𐴵 𐴴 ) 𐴓𐴡𐴔𐴁𐴤𐴡𐴌 𐴒𐴤𐴡𐴌𐴡𐴃 , 𐴅𐴝𐴕𐴖𐴝𐴌𐴞 𐴔𐴝𐴐𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴷 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴹 𐴱 𐴎𐴡𐴕 𐴁𐴠𐴍𐴝𐴀𐴝𐴙𐴕 , 𐴉𐴝𐴣𐴏𐴢 𐴎𐴡𐴕 𐴁𐴠𐴍𐴞𐴀𐴝𐴙𐴕 , 𐴸 𐴱 𐴁𐴡𐴏𐴡𐴌𐴡𐴌 𐴕𐴞𐴏𐴠 𐴔𐴡𐴌𐴡𐴃 𐴉𐴟𐴖𐴝 𐴀𐴠𐴑 𐴎𐴡𐴕 𐴀𐴝𐴌 𐴸 𐴱 𐴁𐴡𐴏𐴡𐴌𐴡𐴌 𐴕𐴞𐴏𐴠 𐴔𐴝𐴘𐴧𐴝 𐴉𐴟𐴖𐴝 𐴊𐴟𐴘 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴷 𐴲 𐴎𐴡𐴕 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴥𐴠 𐴌𐴝𐴙𐴑𐴧𐴤𐴙𐴠 𐴊𐴠 𐴒𐴤𐴡𐴌𐴡𐴌 𐴒𐴞𐴌𐴡𐴏𐴢 𐴀𐴝𐴌 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴊𐴤𐴝𐴘 𐴓𐴟𐴖𐴝𐴘 𐴒𐴞𐴘𐴡𐴘 , 𐴔𐴝𐴕𐴥𐴟𐴙𐴐𐴢 𐴀𐴟𐴀𐴟𐴕 𐴈𐴡𐴃𐴧𐴤𐴟 𐴀𐴝𐴙𐴐𐴧𐴤𐴙𐴠 , 𐴈𐴦𐴡𐴣𐴃𐴧𐴠 𐴓𐴡𐴃𐴞 𐴐𐴗𐴠 𐴂𐴠𐴌𐴠𐴏𐴝 𐴐𐴤𐴡𐴀𐴡𐴌𐴡𐴃 𐴃𐴤𐴝𐴙𐴑𐴧𐴙𐴠𐴊𐴠 , 𐴀𐴥𐴠 𐴁𐴝𐴁𐴡𐴃𐴠 𐴈𐴥𐴝𐴄𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴕𐴥𐴡 𐴎𐴝𐴀𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴀𐴝𐴘 𐴈𐴡𐴕𐴧𐴥𐴡𐴃 𐴃𐴤𐴝𐴙𐴑𐴧𐴙𐴠 𐴁𐴡𐴌𐴝 𐴁𐴡𐴌 𐴒𐴡𐴌𐴥𐴞 𐴈𐴥𐴡𐴁𐴡𐴌 𐴊𐴠𐴀𐴠 𐴊𐴠 𐴀𐴥𐴠𐴃𐴡𐴓𐴧𐴝 𐴇𐴥𐴡𐴑𐴟𐴔𐴡𐴃𐴠 𐴁𐴡𐴕 𐴒𐴡𐴌𐴥𐴞 𐴉𐴝𐴌𐴠 𐴊𐴠 , 𐴘𐴝𐴀𐴝 𐴘𐴥𐴡 𐴐𐴗𐴠 𐴂𐴠𐴌𐴠𐴏𐴝 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴡 𐴌𐴥𐴠 𐴋𐴝𐴑𐴞 𐴀𐴝𐴕𐴥𐴞 𐴊𐴤𐴡𐴌𐴝𐴘 𐴊𐴞𐴘𐴠𐴊𐴠 𐴁𐴡𐴓𐴞 , 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴈𐴝𐴣𐴏𐴥𐴠 𐴀𐴝𐴏𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴡𐴌 𐴃𐴟𐴌𐴥𐴟 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴊𐴠𐴐𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴒𐴞𐴘𐴡𐴘 𐴊𐴠 𐴀𐴡𐴑𐴃𐴤𐴡𐴃 , 𐴔𐴟𐴀𐴟𐴔 𐴈𐴝𐴓 𐴁𐴤𐴝𐴓𐴝 𐴁𐴝𐴕𐴝𐴘𐴁𐴤𐴝𐴌 𐴀𐴝𐴐𐴤𐴝 𐴓𐴡𐴘 , 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃𐴧𐴟 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴝𐴀𐴝𐴘 𐴋𐴝𐴀𐴝𐴘 𐴊𐴠𐴐𐴡𐴃𐴧𐴟 𐴕𐴠𐴀𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘 , 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴠𐴀𐴠𐴌 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴌 𐴁𐴦𐴝𐴁𐴡𐴃𐴠 𐴕𐴡𐴌𐴡𐴔 𐴌𐴝𐴘 𐴌𐴝𐴑𐴤𐴠𐴊𐴠 ( 𐴀𐴠𐴕 𐴀𐴠𐴓 𐴋𐴞) 𐴇𐴥𐴡𐴑𐴟𐴔𐴡𐴃𐴡𐴌 𐴎𐴡𐴁𐴝𐴕𐴝𐴃, 𐴀𐴠𐴕𐴋𐴞𐴓𐴧𐴝 𐴕𐴠𐴀𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴡𐴌𐴝 𐴉𐴡𐴌𐴞𐴓𐴥𐴠 , 𐴇𐴥𐴡𐴑𐴟𐴔𐴡𐴃𐴡𐴌 𐴈𐴥𐴡𐴏𐴧𐴝 𐴓𐴡𐴘 𐴔𐴟𐴓𐴥𐴝 𐴎𐴝𐴒𐴝𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴃𐴡 , 𐴎𐴞𐴘𐴡𐴓𐴡𐴃 𐴕𐴡 𐴊𐴞𐴀𐴞𐴃𐴤𐴡 , 𐴔𐴡𐴕𐴃𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴎𐴡𐴁𐴝𐴕𐴝𐴃 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴓𐴡𐴘 𐴎𐴞𐴘𐴡𐴓𐴡𐴃 𐴊𐴠𐴀𐴠𐴌 𐴱𐴱

𐴀𐴝𐴌 𐴀𐴠𐴉𐴢 𐴀𐴠 𐴘𐴠 𐴏𐴥𐴞𐴌𐴝 𐴒𐴡𐴌𐴥𐴞 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 𐴊𐴠 𐴐𐴡𐴌𐴡𐴃 𐴔𐴡𐴎𐴞𐴕 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 𐴲 𐴲 𐴰 𐴲 𐴋𐴞𐴏𐴡𐴔𐴁𐴡𐴌𐴡𐴌 𐴱 𐴲 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴳 𐴵 𐴶 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴀𐴥𐴠𐴃𐴧𐴟 𐴱 𐴷 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴊𐴟𐴘 𐴁𐴡𐴏𐴡𐴌𐴡𐴃𐴧𐴟 𐴉𐴝𐴣𐴏𐴢 𐴁𐴡𐴏𐴡𐴌 𐴓𐴦𐴡𐴃 𐴎𐴞𐴘𐴡𐴓 𐴊𐴞𐴘𐴠 𐴱𐴱

Sources : RFFburmese