𐴒𐴗𐴥𐴝 𐴐𐴤𐴡𐴀𐴡𐴌𐴡𐴌 𐴋𐴤𐴡𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴦𐴟𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴒𐴗𐴥𐴝 𐴐𐴤𐴡𐴀𐴡𐴌𐴡𐴌 𐴋𐴤𐴡𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴦𐴟𐴕 𐴓𐴟𐴖𐴝𐴘 𐴌𐴡𐴘𐴧𐴠𐴊𐴠 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 , 𐴅𐴝𐴕𐴖𐴝𐴌𐴞𐴌 𐴲 𐴃𐴝𐴌𐴥𐴞𐴑𐴡𐴃 𐴌𐴝𐴙𐴃𐴧𐴝 𐴀𐴡𐴕𐴟𐴔𐴝𐴕𐴞𐴑 𐴹 𐴁𐴝𐴎𐴠 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓 𐴎𐴝𐴘 , 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴁𐴞𐴏𐴑𐴤𐴝𐴘 𐴃𐴟𐴖𐴝𐴘 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴏𐴟𐴖𐴝𐴓 𐴅𐴟𐴖𐴝𐴁 𐴀𐴞𐴕𐴑𐴗𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴔𐴡𐴎𐴞𐴕, 𐴔𐴥𐴝𐴚 𐴁𐴡𐴌𐴥𐴝 𐴐𐴤𐴡𐴀𐴡𐴌 𐴀𐴝𐴌 𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴃𐴧𐴟 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴎𐴝𐴒𐴝 𐴎𐴝𐴒𐴝 𐴉𐴝𐴌𐴝 𐴉𐴝𐴌𐴝 𐴄𐴡𐴀𐴡𐴕𐴠 𐴄𐴡𐴀𐴡𐴕𐴠 𐴎𐴝𐴘 𐴁𐴦𐴝𐴊𐴠 𐴔𐴡𐴓𐴠𐴆𐴤𐴙𐴝𐴃 𐴈𐴝𐴔 𐴒𐴡𐴌𐴥𐴞𐴁𐴡𐴓𐴧𐴝 𐴎𐴝𐴘𐴃𐴡 𐴔𐴡𐴕𐴠 𐴈𐴡𐴘𐴓𐴥𐴠 , 𐴀𐴝𐴣𐴀𐴝𐴌𐴝 𐴉𐴡𐴣𐴀𐴡𐴏𐴝𐴘 𐴊𐴞𐴘𐴟𐴔 , 𐴃𐴟𐴣𐴖𐴝𐴣𐴌𐴝𐴌 𐴒𐴤𐴡𐴌𐴡𐴃𐴧𐴟 𐴌𐴠𐴕𐴒𐴟𐴕 𐴉𐴡𐴙𐴅𐴧𐴡𐴕𐴃𐴡 𐴵 𐴴 𐴓𐴝𐴑 𐴄𐴞𐴛𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴌𐴠𐴕𐴒𐴟𐴕𐴡𐴃𐴧𐴟 𐴔𐴡𐴓𐴠𐴆𐴤𐴙𐴝 𐴉𐴡𐴙𐴅𐴧𐴡𐴕𐴃𐴡 𐴵 𐴴 𐴓𐴝𐴑 𐴄𐴞𐴛𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴱𐴱

𐴔𐴟𐴄 𐴔𐴞𐴓𐴝𐴘 𐴰 𐴹 𐴓𐴝𐴑 𐴄𐴞𐴛𐴝 𐴓𐴡𐴘 𐴔𐴡𐴓𐴠𐴆𐴤𐴙𐴝 𐴉𐴡𐴣𐴀𐴡𐴏𐴝𐴘 𐴊𐴞𐴘𐴟𐴔 , 𐴑𐴠𐴙𐴏𐴧𐴥𐴟 𐴈𐴥𐴡𐴏𐴧𐴝𐴌 𐴄𐴞𐴛𐴝 𐴊𐴡𐴀𐴡𐴕 , 𐴁𐴝𐴑𐴞 𐴄𐴞𐴛𐴝 𐴌𐴠𐴕𐴒𐴟𐴕 𐴀𐴝𐴌 𐴔𐴡𐴓𐴠𐴆𐴤𐴙𐴝 𐴉𐴡𐴣𐴀𐴡𐴏𐴞𐴓𐴠 𐴊𐴡𐴀𐴡𐴕 𐴁𐴡𐴓𐴞 𐴈𐴡𐴀𐴡𐴘 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴌𐴠 𐴉𐴥𐴝𐴣𐴊𐴡𐴃 𐴉𐴥𐴠𐴓𐴝𐴘 𐴒𐴤𐴡𐴌𐴡𐴃𐴧𐴟 𐴕𐴠𐴀𐴠𐴓𐴝𐴘 𐴀𐴝𐴕𐴥𐴠 , 𐴀𐴞𐴃𐴝𐴌𐴝 𐴘𐴥𐴡 𐴘𐴝𐴀𐴝𐴕𐴡𐴌 𐴖𐴡𐴌𐴠 𐴌𐴝𐴎𐴞 𐴀𐴥𐴡𐴘 𐴒𐴤𐴡𐴌𐴡𐴃𐴧𐴟 𐴕𐴠𐴀𐴠𐴓𐴞 𐴀𐴝𐴙𐴐𐴧𐴤𐴙𐴠 𐴊𐴠 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 , 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌 𐴂𐴡𐴌𐴟𐴒𐴠𐴌𐴝𐴔 𐴔𐴡𐴎𐴞𐴕 , 𐴲 𐴲 𐴰 𐴲 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 𐴁𐴠𐴒𐴧𐴤𐴟𐴕𐴡𐴌𐴠 𐴔𐴥𐴝𐴔𐴁𐴡𐴌𐴝 𐴐𐴤𐴡𐴀𐴡𐴌𐴡𐴌 𐴑𐴠𐴌𐴥𐴠 𐴏𐴝𐴚 𐴉𐴟𐴓𐴡𐴌 𐴈𐴝𐴣𐴏𐴥𐴠 𐴊𐴡𐴓𐴝 𐴒𐴡𐴌𐴥𐴞 𐴁𐴦𐴝𐴊𐴠 , 𐴕𐴦𐴡𐴌 𐴁𐴟𐴄 𐴓𐴡𐴘 𐴄𐴡𐴚𐴒𐴤𐴟 𐴐𐴤𐴡𐴀𐴡𐴌𐴡𐴃 𐴀𐴝𐴙𐴕𐴧𐴥𐴙𐴠 𐴱𐴱

𐴘𐴝𐴀𐴝𐴕𐴃𐴟 𐴶 𐴖𐴝𐴕 𐴏𐴝𐴙𐴑𐴧𐴤𐴝 𐴓𐴡𐴘 𐴌𐴡𐴖𐴝𐴕𐴝 𐴊𐴞𐴀𐴞 𐴁𐴦𐴝𐴊𐴠 , 𐴋𐴤𐴡𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴏𐴠𐴑 𐴂𐴦𐴟𐴏𐴄𐴡𐴃 𐴕𐴡𐴀𐴡 𐴉𐴡𐴣𐴀𐴡𐴏𐴞𐴃𐴠 , 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝𐴌𐴠 𐴈𐴡𐴘𐴧𐴠𐴊𐴠 ! 𐴀𐴝𐴣𐴀𐴝𐴌𐴝 𐴏𐴝𐴙𐴑𐴧𐴤𐴝 𐴓𐴡𐴘 𐴏𐴠𐴑 𐴉𐴥𐴠𐴓𐴝𐴘 𐴁𐴦𐴝𐴊𐴠 𐴃𐴟𐴣𐴖𐴝𐴣𐴌𐴝𐴌 𐴀𐴠𐴕𐴃𐴠𐴎𐴝𐴌 𐴒𐴡𐴙𐴅𐴧𐴤𐴟𐴔 , 𐴃𐴟𐴣𐴖𐴝𐴣𐴌𐴝 𐴎𐴦𐴡𐴣𐴓𐴡𐴌 𐴉𐴡𐴣𐴃𐴤𐴠 𐴎𐴡𐴀𐴡 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡 𐴌𐴠 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴁𐴦𐴝𐴊𐴠 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴠 𐴘𐴥𐴡 𐴊𐴤𐴡𐴌𐴞𐴁𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴝 𐴎𐴝𐴀𐴝𐴌 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

Sources : ၇ခိုင်နေ့စ်