𐴁𐴝𐴚𐴓𐴝𐴊𐴠𐴐𐴠 𐴁𐴡𐴌𐴔𐴥𐴝𐴌 𐴁𐴡𐴖𐴋𐴝𐴌𐴡 𐴌𐴠 𐴋𐴡𐴌𐴟𐴕 𐴓𐴡𐴘 𐴕𐴡𐴎𐴡𐴌𐴊𐴝𐴌𐴞 𐴒𐴡𐴌𐴠𐴀𐴠𐴌 𐴱𐴱

𐴁𐴠𐴐𐴤𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌𐴑𐴝𐴕𐴡𐴃𐴧𐴟 𐴊𐴤𐴝𐴘 𐴀𐴝𐴘𐴁𐴝𐴌 𐴔𐴦𐴝𐴔𐴠𐴓𐴝 , 𐴉𐴥𐴞𐴃𐴞𐴕 𐴀𐴥𐴡𐴘 𐴀𐴝𐴘𐴁𐴝𐴌 𐴐𐴤𐴡𐴔𐴁𐴡𐴁𐴤𐴡𐴕𐴝 𐴊𐴠𐴈𐴥𐴝 𐴎𐴝𐴀𐴝𐴌𐴊𐴧𐴠 𐴁𐴡𐴌𐴔𐴥𐴝𐴌 𐴁𐴡𐴖𐴋𐴝𐴌𐴡𐴃 , 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴋𐴡𐴌𐴟𐴕 𐴓𐴡𐴘 𐴕𐴡𐴎𐴡𐴌 𐴊𐴝𐴌𐴞 𐴒𐴡𐴌𐴥𐴞𐴁𐴡𐴓𐴧𐴝 , 𐴁𐴝𐴚𐴓𐴝𐴊𐴠𐴐𐴡𐴌 𐴒𐴤𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴃𐴧𐴟 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴟𐴓𐴞𐴐𐴡𐴌𐴠 𐴀𐴡𐴋𐴝𐴌 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴁𐴡𐴖𐴋𐴝𐴌 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴋𐴡𐴌𐴟𐴕 𐴓𐴡𐴘 𐴕𐴡𐴎𐴡𐴌𐴊𐴝𐴌𐴞 𐴒𐴡𐴌𐴥𐴞𐴁𐴡𐴓𐴧𐴝 𐴀𐴝𐴣𐴀𐴝𐴌𐴝 𐴇𐴥𐴡𐴑𐴟𐴔 𐴎𐴝𐴌𐴞 𐴒𐴡𐴌𐴥𐴞 𐴊𐴞𐴘𐴞 𐴁𐴡𐴓𐴞 , 𐴂𐴝𐴓𐴞𐴔𐴠𐴕 𐴕𐴡𐴎𐴡𐴌𐴊𐴝𐴌𐴞 𐴒𐴟𐴌𐴥𐴟𐴉𐴡𐴌 𐴕𐴠𐴃𐴝 / 𐴁𐴡𐴕𐴡𐴎𐴞𐴌 𐴀𐴝𐴇𐴔𐴡𐴊𐴠 𐴈𐴡𐴘𐴧𐴠 , 𐴁𐴤𐴝𐴐𐴡𐴕 𐴏𐴡𐴌 𐴐𐴤𐴡𐴣𐴀𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴃𐴤𐴝𐴑𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴋𐴡𐴌𐴟𐴕 𐴉𐴥𐴞𐴄 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴞 𐴱𐴱

𐴒𐴡𐴃𐴡 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴀𐴝𐴊𐴧𐴡𐴑𐴡𐴃𐴧𐴟 𐴓𐴡𐴃𐴞 , 𐴁𐴡𐴌𐴔𐴥𐴝𐴌 𐴀𐴥𐴠𐴑𐴟𐴓𐴃𐴟 𐴔𐴝𐴙𐴅𐴧𐴤𐴙𐴠𐴊𐴠 𐴆𐴠𐴀𐴠𐴓 𐴁𐴝𐴚𐴓𐴝𐴊𐴠𐴐𐴡𐴌 𐴁𐴤𐴟𐴃𐴡𐴌𐴠 𐴈𐴡𐴀𐴠𐴑 𐴁𐴝𐴌 𐴉𐴡𐴌𐴡𐴀𐴡𐴕𐴠 𐴊𐴟𐴕𐴥𐴞 𐴊𐴠𐴐𐴡𐴌 𐴔𐴝𐴎𐴤𐴠 𐴃𐴦𐴝𐴓𐴧𐴟𐴑 𐴈𐴥𐴡𐴌𐴝𐴁 𐴀𐴥𐴡𐴀𐴡𐴙𐴓 , 𐴁𐴡𐴌𐴔𐴥𐴝𐴃𐴧𐴟 𐴔𐴝𐴙𐴅𐴧𐴤𐴙𐴠𐴊𐴠 𐴆𐴠𐴀𐴠𐴓 𐴁𐴡𐴖𐴋𐴝𐴌 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴡𐴃 𐴉𐴡𐴌𐴞 𐴉𐴥𐴟𐴍𐴞 𐴊𐴡𐴐𐴢 𐴁𐴡𐴏𐴥𐴡𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴀𐴞𐴓 𐴒𐴤𐴡𐴘 , 𐴁𐴦𐴝𐴊𐴠 𐴁𐴝𐴕𐴊𐴡𐴌𐴁𐴡𐴕 𐴀𐴠𐴓𐴝𐴑𐴝𐴃 𐴔𐴝𐴎𐴤𐴠 𐴘𐴥𐴡 𐴁𐴝𐴚𐴓𐴝𐴊𐴠𐴐𐴤𐴞 𐴏𐴥𐴡 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴀𐴡𐴙𐴓 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴆𐴠𐴀𐴠𐴓 𐴉𐴡𐴌𐴞 𐴉𐴥𐴟𐴍𐴞𐴘𐴡𐴌𐴠 𐴊𐴡𐴐𐴢 𐴁𐴡𐴏𐴥𐴡𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴔𐴡𐴙𐴅𐴧𐴤𐴙𐴠𐴊𐴠 𐴎𐴝𐴒𐴝 𐴘𐴥𐴝𐴀𐴝𐴕𐴡𐴃 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴅𐴠𐴕𐴟𐴏𐴥𐴝𐴙𐴋 𐴑𐴝𐴌𐴖𐴝𐴘𐴃𐴧𐴤𐴟 , 𐴉𐴡𐴌𐴝𐴕 𐴁𐴝𐴏𐴝𐴘 𐴊𐴤𐴝𐴘 𐴀𐴝𐴀𐴝𐴘 𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴰 𐴰 𐴰 𐴴 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴃𐴤𐴝𐴑𐴠 , 𐴁𐴡𐴌𐴔𐴥𐴝𐴃𐴧𐴟 𐴔𐴝𐴙𐴅𐴧𐴤𐴙𐴠𐴊𐴠 𐴆𐴠𐴀𐴠𐴓 𐴁𐴝𐴌 𐴁𐴝𐴌 𐴁𐴝𐴚𐴓𐴝𐴊𐴠𐴐𐴡𐴌 𐴎𐴡𐴁𐴞𐴕𐴡𐴃 𐴉𐴡𐴌𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴏𐴥𐴠𐴊𐴠 𐴁𐴡𐴌𐴔𐴥𐴝𐴌 𐴏𐴥𐴡𐴉𐴞𐴌𐴡 𐴌𐴠 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 , 𐴔𐴝𐴃𐴝𐴘𐴧𐴡𐴌𐴠 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴀𐴝𐴈𐴠𐴌𐴞𐴃 𐴏𐴝𐴙𐴌 𐴁𐴝𐴌 𐴀𐴥𐴟𐴣𐴐𐴞𐴘𐴝𐴌𐴞 𐴊𐴞𐴀𐴞𐴓 𐴱𐴱

Sources : burmese.dvb