𐴓𐴥𐴞𐴑𐴤𐴟 𐴐𐴤𐴡𐴀𐴡𐴌𐴡𐴌 𐴑𐴗𐴠𐴕 𐴑𐴠𐴌𐴥𐴝𐴘 𐴌𐴝𐴏𐴧𐴝𐴌 𐴈𐴝𐴣𐴏𐴝𐴃 𐴏𐴥𐴡𐴏𐴝𐴁𐴟𐴃 𐴏𐴥𐴝𐴌𐴝 𐴳 𐴱 𐴖𐴥𐴝 𐴔𐴡𐴌𐴝 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴠 𐴱𐴱

𐴌𐴠𐴕𐴒𐴟𐴕 𐴋𐴞𐴐𐴄𐴤𐴞𐴑 , 𐴓𐴥𐴞𐴑𐴤𐴟 𐴐𐴤𐴡𐴀𐴡𐴌𐴡𐴃 𐴁𐴤𐴝𐴓𐴥𐴝 𐴒𐴤𐴗𐴝𐴚𐴡𐴌 𐴁𐴤𐴝𐴓𐴥𐴝 𐴉𐴝𐴌𐴝𐴌 𐴃𐴡𐴁𐴧𐴝𐴚 𐴐𐴗𐴠𐴄𐴤𐴞 𐴑𐴗𐴠𐴕 𐴑𐴠𐴌𐴥𐴝𐴘 𐴌𐴝𐴏𐴧𐴝𐴌 𐴈𐴝𐴣𐴏𐴝𐴃 , 𐴋𐴞𐴏𐴡𐴔𐴁𐴡𐴌 𐴔𐴝𐴐𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴰 𐴰 : 𐴷 𐴁𐴝𐴎𐴠 , 𐴳 𐴱 𐴖𐴥𐴝 𐴔𐴡𐴌𐴝 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴠 𐴁𐴡𐴓𐴞 𐴁𐴤𐴝𐴓𐴥𐴝 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴁𐴦𐴝𐴊𐴠 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 , 𐴔𐴡𐴌𐴝 𐴓𐴝𐴐𐴢 𐴀𐴟𐴀𐴟𐴕 𐴉𐴝𐴀𐴝 𐴎𐴡𐴀𐴡𐴕𐴡𐴌 𐴓𐴡𐴒𐴠 𐴓𐴡𐴒𐴠 𐴔𐴟𐴃𐴦𐴝𐴓𐴧𐴠𐴑𐴝 𐴇𐴥𐴡𐴑𐴟𐴔𐴡𐴃𐴞 𐴋𐴝𐴀𐴝𐴘 𐴀𐴝𐴀𐴝𐴘𐴧𐴡𐴌𐴠 𐴃𐴝𐴊𐴝𐴌𐴟𐴑 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 𐴱𐴱 𐴖𐴡𐴌𐴡𐴌 𐴔𐴡𐴌𐴝 𐴓𐴝𐴐𐴢 𐴀𐴥𐴟𐴀𐴟𐴕 𐴏𐴥𐴡 𐴏𐴝𐴁𐴟𐴃 𐴏𐴥𐴝𐴌𐴝 𐴁𐴠𐴒𐴧𐴤𐴟𐴕 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴊𐴡𐴌 𐴓𐴝𐴐𐴢 𐴁𐴡𐴓𐴞 𐴔𐴟𐴓 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝𐴀𐴝 𐴒𐴞𐴘𐴠 , 𐴔𐴡𐴌𐴝 𐴓𐴝𐴐𐴢 𐴀𐴥𐴟𐴀𐴟𐴕𐴡𐴌 𐴏𐴝𐴙𐴌𐴀𐴥𐴡 𐴋𐴤𐴡𐴑𐴡𐴃 𐴃𐴠𐴌𐴉𐴝𐴓𐴡𐴌 𐴑𐴡𐴁𐴤𐴝𐴌 ( 𐴔𐴥𐴟 𐴑𐴝 ) 𐴀𐴝𐴌 𐴉𐴝𐴕𐴥𐴞𐴌 𐴈𐴥𐴝𐴓𐴞 𐴁𐴡𐴃𐴡𐴓 𐴀𐴥𐴡𐴑𐴧𐴡𐴓 𐴉𐴝𐴀𐴝𐴎𐴡𐴕𐴠 , 𐴁𐴟𐴎𐴤𐴝 𐴎𐴝𐴀𐴝𐴌𐴊𐴧𐴠 ! 𐴔𐴝𐴙𐴕𐴐𐴡𐴌 𐴈𐴡𐴕𐴥𐴡 𐴀𐴟𐴒𐴧𐴤𐴗𐴝 𐴋𐴝𐴀𐴝𐴘𐴧𐴠 𐴓𐴝𐴐𐴢 𐴀𐴥𐴟𐴀𐴟𐴕 𐴀𐴝𐴕𐴥𐴞 𐴛𐴥𐴡𐴀𐴡𐴃 𐴉𐴥𐴠𐴓𐴝𐴘 𐴊𐴞𐴀𐴞 𐴒𐴞𐴘𐴡𐴘 𐴊𐴠 𐴘𐴝𐴀𐴝𐴕 𐴀𐴝𐴕𐴃𐴝𐴎 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴓𐴝𐴐𐴢 𐴀𐴥𐴟𐴀𐴟𐴕 𐴌𐴠𐴕𐴒𐴟𐴕 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 , 𐴀𐴥𐴠𐴍𐴠 𐴀𐴥𐴞𐴃𐴝𐴌𐴝 𐴑𐴠𐴀𐴠𐴕𐴠 𐴔𐴡𐴙𐴓𐴧𐴡 𐴊𐴠 𐴁𐴡𐴓𐴞 𐴈𐴡𐴀𐴡𐴘 , 𐴈𐴝𐴌𐴡𐴕𐴡𐴌 𐴁𐴝𐴁𐴡𐴃𐴠 𐴃𐴝𐴊𐴝𐴌𐴟𐴑 𐴒𐴡𐴌𐴠𐴀𐴠𐴌 , 𐴀𐴝𐴌 𐴓𐴝𐴐𐴢 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕𐴡𐴌 𐴁𐴡𐴐𐴢 𐴰 𐴲 – 𐴶 𐴱 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴡𐴌 𐴉𐴟𐴖𐴝𐴙𐴕 𐴁𐴡𐴓𐴞 𐴀𐴝𐴕𐴃𐴝𐴎 𐴒𐴡𐴌𐴥𐴝 𐴎𐴝𐴀𐴝𐴌 𐴱𐴱

𐴀𐴝𐴌𐴑𐴝𐴕𐴡𐴃𐴧𐴟 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴁𐴡𐴕 𐴒𐴝𐴌𐴥𐴞 𐴓𐴡𐴘 𐴀𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴉𐴡𐴣𐴃𐴤𐴡𐴃 𐴀𐴡𐴑𐴏𐴞𐴅𐴝𐴕 𐴕𐴡 𐴉𐴝𐴘 𐴕𐴞𐴘𐴝𐴐𐴢 𐴓𐴡𐴘 𐴕𐴡 𐴉𐴝𐴌𐴥𐴞 , 𐴒𐴝𐴌𐴥𐴞𐴌 𐴁𐴤𐴟𐴃𐴡𐴌𐴠 𐴔𐴡𐴌𐴞 𐴒𐴞𐴘𐴡𐴘 𐴊𐴠 𐴁𐴡𐴓𐴞 , 𐴁𐴝𐴎𐴡 𐴔𐴞𐴋𐴞𐴘𐴝 𐴘𐴠 𐴈𐴡𐴘𐴓𐴠 𐴘𐴥𐴡 , 𐴁𐴞𐴐𐴧𐴤𐴝𐴐𐴢 𐴒𐴡𐴌𐴥𐴝 𐴕𐴡 𐴎𐴝𐴀𐴝𐴌 , 𐴑𐴞𐴘𐴡𐴓𐴧𐴝 𐴈𐴡𐴘𐴓𐴠 𐴀𐴥𐴞𐴃𐴝𐴌𐴝𐴌 𐴒𐴝𐴀𐴝𐴃 𐴀𐴥𐴝𐴃𐴡𐴃 𐴑𐴠𐴙𐴏𐴧𐴥𐴟 𐴎𐴡𐴈𐴥𐴡𐴔 𐴉𐴝𐴀𐴝 𐴒𐴞𐴘𐴠 𐴱𐴱

𐴀𐴦𐴡 𐴌𐴟𐴇𐴝𐴙𐴚𐴒𐴙𐴝 𐴁𐴝𐴉𐴢 𐴁𐴤𐴝𐴘 𐴀𐴥𐴡𐴑𐴧𐴡𐴓 ! 𐴎𐴞𐴛𐴡𐴃 𐴉𐴝𐴀𐴝 𐴛𐴥𐴡𐴀𐴡𐴃 , 𐴎𐴠 𐴉𐴝𐴀𐴝 𐴃𐴠 , 𐴕𐴞𐴎𐴡𐴌 𐴑𐴡𐴗𐴔𐴠 𐴀𐴥𐴡𐴀𐴡𐴑 𐴘𐴝 𐴀𐴡𐴙𐴕𐴧𐴡 𐴑𐴡𐴗𐴔𐴠 𐴀𐴥𐴡𐴀𐴡𐴑 𐴀𐴠 𐴁𐴤𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴔𐴝𐴌𐴝𐴃 𐴃𐴤𐴝𐴑𐴞𐴓𐴠 , 𐴁𐴤𐴝𐴉𐴞 𐴏𐴡𐴀𐴡 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔 𐴉𐴥𐴟𐴌𐴝𐴘 𐴎𐴝𐴘𐴃𐴠 𐴈𐴡 𐴊𐴞𐴕 𐴓𐴝𐴒𐴞𐴁𐴤𐴡 ؟ 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴑𐴠𐴀𐴠𐴔𐴡𐴃 𐴔𐴦𐴝𐴣 𐴁𐴤𐴡𐴙𐴕 𐴀𐴥𐴡𐴑𐴧𐴡𐴓𐴠 𐴒𐴤𐴡𐴌𐴒𐴟𐴐𐴧𐴞 𐴂𐴠𐴓𐴝𐴕 𐴌𐴠 𐴘𐴥𐴡 𐴑𐴡𐴁𐴟𐴓 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴡𐴘𐴓𐴠 𐴱𐴱

Sources : npnewsmm.com