𐴀𐴝𐴌𐴑𐴝𐴕𐴡𐴃𐴧𐴟 𐴔𐴝𐴓 𐴒𐴝𐴌𐴥𐴞 𐴁𐴤𐴡𐴌𐴞 𐴀𐴝𐴘𐴧𐴠𐴌𐴊𐴧𐴠 𐴸 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴔𐴠𐴓𐴠𐴄𐴠𐴌𐴞 𐴘𐴠 𐴓𐴞𐴑𐴤𐴟𐴃 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴌𐴠𐴕𐴒𐴟𐴕 𐴋𐴞𐴐𐴄𐴤𐴞𐴑 , 𐴓𐴞𐴑𐴤𐴟 𐴐𐴤𐴡𐴀𐴡𐴌𐴡𐴌 𐴁𐴡𐴄𐴒𐴝𐴏𐴢 𐴐𐴝𐴐𐴡𐴌 𐴎𐴟𐴕 𐴓𐴡𐴔𐴁𐴤𐴡𐴌 𐴀𐴠𐴑𐴡𐴃 , 𐴕𐴡𐴖𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 , 𐴲 𐴱 𐴁𐴝𐴌𐴥𐴡 𐴏𐴝𐴑𐴧𐴝 𐴀𐴡𐴓𐴝 𐴔𐴝𐴓 𐴒𐴝𐴌𐴥𐴞 𐴀𐴠𐴑𐴧𐴤𐴝𐴕𐴡𐴌 𐴖𐴡𐴌𐴃𐴧𐴟, 𐴸 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴒𐴝𐴌𐴥𐴞 𐴀𐴡𐴓𐴝 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴀𐴥𐴟𐴊𐴧𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴔𐴝𐴙𐴕𐴐𐴡𐴌 𐴃𐴟𐴌𐴥𐴟 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴁𐴝𐴌𐴥𐴡 𐴏𐴝𐴑𐴧𐴝 𐴔𐴝𐴓𐴒𐴝𐴌𐴥𐴞 𐴁𐴤𐴡𐴌𐴞 𐴀𐴝𐴌𐴑𐴝𐴕𐴡𐴃𐴧𐴟 𐴀𐴝𐴘𐴧𐴠𐴌𐴊𐴧𐴠 𐴸 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 , 𐴓𐴞𐴑𐴤𐴟 𐴐𐴤𐴡𐴀𐴡𐴌𐴡𐴌 𐴁𐴡𐴄 𐴒𐴝𐴏𐴢 𐴐𐴝𐴐𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴎𐴟𐴕𐴡𐴌 𐴋𐴤𐴝𐴑𐴠 𐴀𐴝𐴏𐴥𐴠𐴊𐴠 , 𐴒𐴝𐴌𐴥𐴞 𐴏𐴠𐴑 𐴒𐴠𐴀𐴞𐴍𐴡𐴃 , 𐴁𐴡𐴕 𐴀𐴥𐴡𐴘𐴧𐴠 𐴁𐴡𐴓𐴞 𐴒𐴝𐴌𐴥𐴞𐴌 𐴋𐴠𐴌𐴠𐴁𐴝𐴌 𐴀𐴠𐴑 𐴎𐴡𐴕𐴠 𐴋𐴞 𐴁𐴗𐴞 𐴁𐴞 𐴈𐴥𐴡𐴁𐴡𐴌 𐴀𐴡𐴓𐴝𐴌𐴠 𐴈𐴡𐴘𐴧𐴠 , 𐴈𐴥𐴡𐴁𐴡𐴌 𐴉𐴝𐴘𐴧𐴡𐴌𐴠 𐴏𐴠𐴑 𐴒𐴡𐴌𐴥𐴡𐴙𐴕𐴧𐴝 𐴁𐴠𐴐𐴤𐴞 𐴔𐴝𐴙𐴕𐴐𐴠 , 𐴁𐴝𐴌𐴥𐴡 𐴏𐴝𐴑𐴧𐴝 𐴒𐴝𐴌𐴥𐴞 𐴘𐴝𐴀𐴝𐴕𐴡𐴌 𐴁𐴤𐴟𐴃𐴡𐴌𐴠 𐴁𐴝𐴀𐴝𐴌𐴠 𐴏𐴠𐴑 𐴒𐴡𐴌𐴥𐴞 , 𐴔𐴝𐴘𐴧𐴝 𐴔𐴡𐴌𐴡𐴊 𐴁𐴠𐴒𐴧𐴤𐴟𐴕 𐴊𐴤𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴒𐴝𐴌𐴥𐴞 𐴀𐴏𐴡𐴓𐴝 𐴊𐴟𐴕𐴥𐴞𐴎𐴡𐴕 𐴐𐴤𐴡𐴣𐴀𐴡 𐴁𐴠𐴍𐴝𐴀𐴝𐴙𐴕 𐴴 𐴵 𐴎𐴡𐴕 𐴁𐴠𐴍𐴞𐴀𐴝𐴙𐴕 𐴴 𐴱 𐴎𐴡𐴕 , 𐴔𐴟𐴄 𐴸 𐴶 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴠 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴁𐴡𐴓𐴞 , 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴈𐴝𐴣𐴏𐴥𐴠 𐴀𐴝𐴏𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴋𐴝𐴓𐴝𐴓𐴞 𐴈𐴥𐴡𐴏𐴧𐴝 𐴁𐴠𐴒𐴧𐴤𐴟𐴕 𐴓𐴡𐴘 𐴁𐴦𐴝𐴊𐴠 𐴌𐴠𐴕𐴒𐴟𐴕 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴀𐴝𐴙𐴕𐴧𐴙𐴠𐴊𐴠 , 𐴀𐴝𐴒𐴠 𐴘𐴥𐴡 𐴈𐴡𐴊𐴦𐴟𐴕 𐴓𐴞𐴑𐴤𐴟 𐴐𐴤𐴡𐴀𐴡𐴌𐴡𐴌 𐴁𐴤𐴟𐴃𐴡𐴌𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴝𐴏𐴥𐴠 𐴱𐴱

𐴀𐴠𐴈𐴥𐴡𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 , 𐴓𐴞𐴑𐴤𐴟 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴏𐴠𐴑 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴞𐴔𐴞𐴒𐴞𐴌𐴞𐴐𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴑𐴠𐴙𐴏𐴢 𐴑𐴤𐴟𐴓𐴞𐴁𐴡 𐴁𐴡𐴓𐴞 , 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴈𐴝𐴣𐴏𐴠 𐴀𐴝𐴏𐴥𐴠𐴊𐴠 𐴔𐴝𐴙𐴕𐴐𐴡𐴌 𐴃𐴟𐴌𐴥𐴟 𐴎𐴝𐴕𐴝𐴀𐴝 𐴒𐴞𐴘𐴠 , 𐴒𐴡𐴃𐴡 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴃 𐴔𐴝𐴎𐴤𐴠 𐴘𐴥𐴡 𐴓𐴞𐴑𐴤𐴟 𐴐𐴤𐴡𐴀𐴡𐴌𐴡𐴃 𐴰 𐴲 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴀𐴥𐴡𐴀𐴡𐴙𐴓 𐴱𐴱

Sources : DVBburmese