𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴀𐴠 𐴀𐴠 𐴔𐴡𐴒𐴁𐴝𐴒𐴞𐴌 𐴔𐴝𐴎𐴤𐴠 𐴃𐴡𐴀𐴡𐴙𐴃𐴧𐴝 𐴓𐴝𐴌𐴥𐴝𐴘 𐴁𐴡𐴕 𐴱𐴱

𐴀𐴝𐴌𐴑𐴝𐴕𐴡𐴃 𐴏𐴝𐴙𐴌𐴀𐴥𐴡 𐴔𐴞𐴑𐴧𐴤𐴤𐴙𐴝 𐴑𐴤𐴟𐴂𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴘 𐴏𐴡𐴓𐴠𐴌𐴊𐴧𐴠 𐴀𐴡𐴑𐴃𐴤𐴡𐴃 , 𐴀𐴠 𐴀𐴠 𐴔𐴡𐴒𐴁𐴝𐴒𐴞 𐴀𐴝𐴌 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴊𐴟𐴘 𐴃𐴡𐴌𐴉𐴥𐴝 , 𐴃𐴡𐴀𐴡𐴙𐴃𐴧𐴝 𐴓𐴝𐴌𐴥𐴝𐴘 𐴁𐴡𐴕𐴡𐴌 𐴏𐴟𐴑𐴃𐴞 𐴀𐴥𐴡𐴘𐴧𐴠 𐴁𐴡𐴓𐴞 , 𐴊𐴟𐴕𐴥𐴞 𐴋𐴝𐴀𐴝𐴙𐴌 𐴈𐴝𐴣𐴏𐴥𐴡𐴌 𐴔𐴝𐴙𐴕𐴐𐴠 𐴈𐴡𐴘𐴧𐴠 𐴱𐴱

𐴀𐴠𐴑𐴀𐴡𐴔 𐴓𐴠𐴁𐴤𐴠𐴓 𐴀𐴥𐴞𐴏𐴝𐴉𐴠 𐴓𐴝𐴌𐴥𐴝𐴘 𐴁𐴡𐴕 𐴀𐴥𐴡𐴘𐴧𐴠,𐴉𐴡𐴌𐴠 𐴊𐴟𐴘𐴀𐴡𐴔 𐴓𐴠𐴁𐴤𐴠𐴓 𐴀𐴝𐴀𐴝𐴙𐴃 𐴉𐴝𐴌𐴠, 𐴀𐴝𐴈𐴥𐴡𐴕 𐴀𐴠𐴊𐴧𐴟𐴌 𐴁𐴤𐴠 𐴈𐴡𐴀𐴡𐴘 𐴉𐴝𐴌𐴞𐴌 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞𐴌 𐴋𐴤𐴝𐴑𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴓𐴝𐴌𐴥𐴝𐴘 𐴁𐴡𐴕 𐴏𐴟𐴑𐴃𐴞 𐴀𐴥𐴡𐴀𐴡𐴕𐴠 𐴀𐴝𐴌𐴑𐴝𐴕𐴡𐴃 𐴁𐴡𐴕 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴌𐴝𐴏𐴧𐴝 𐴒𐴤𐴝𐴣𐴄 , 𐴔𐴠𐴓𐴠𐴄𐴠𐴌𐴞 𐴘𐴠 𐴑𐴤𐴟𐴓𐴞 𐴊𐴞𐴀𐴞𐴁𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴀𐴝𐴙𐴑𐴧𐴙𐴝𐴁𐴡𐴌 𐴌𐴝𐴏𐴧𐴝 𐴘𐴥𐴡 𐴀𐴡𐴓𐴉𐴡 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴑𐴤𐴟𐴓𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴊𐴟𐴘 𐴃𐴡𐴌𐴉𐴥𐴝 𐴓𐴝𐴌𐴥𐴝𐴘 𐴁𐴡𐴕𐴡𐴌 𐴁𐴝𐴁𐴡𐴃𐴠 , 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴁𐴟 𐴆𐴤𐴙𐴟𐴑 / 𐴎𐴡𐴔𐴥𐴞𐴕 𐴄𐴟𐴕𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃 𐴁𐴞 𐴁𐴞 𐴏𐴞 𐴌𐴥𐴠 𐴈𐴡𐴘𐴧𐴠 , 𐴔𐴡𐴕𐴃𐴡𐴌 𐴔𐴡𐴒𐴁𐴝𐴒𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴀𐴝𐴘𐴅𐴤𐴡 𐴀𐴠𐴓𐴝𐴕 𐴕𐴥𐴡 𐴕𐴠𐴀𐴠𐴓𐴠 , 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴁𐴟 𐴆𐴤𐴙𐴟𐴑 𐴅𐴤𐴞 / 𐴌𐴝 𐴁𐴠𐴌𐴥𐴠𐴌 𐴏𐴥𐴡𐴊𐴧𐴝𐴌𐴞𐴃 𐴋𐴝𐴀𐴝𐴘 𐴀𐴝𐴌 𐴔𐴡𐴒𐴁𐴝𐴒𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴁𐴟 𐴔𐴥𐴟 𐴅𐴤𐴞 / 𐴆𐴙𐴡 𐴇𐴠𐴕𐴡𐴌 𐴏𐴥𐴡𐴊𐴧𐴝𐴌𐴞𐴃 𐴋𐴝𐴀𐴝𐴘 𐴓𐴡𐴘 , 𐴀𐴦𐴡𐴕𐴓𐴝𐴙𐴕𐴡𐴌 𐴃𐴟𐴌𐴥𐴟 𐴘𐴠 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 𐴏𐴟𐴑𐴃𐴞 𐴀𐴥𐴡𐴘𐴓𐴠 𐴘𐴥𐴡 , 𐴈𐴡𐴕𐴋𐴞𐴓𐴧𐴝 𐴌𐴝𐴎𐴞𐴕𐴝𐴔𐴝 𐴀𐴝𐴉𐴥𐴡𐴏𐴡𐴃 𐴀𐴥𐴡𐴘𐴧𐴠𐴊𐴠 𐴈𐴥𐴝𐴄𐴞 𐴁𐴤𐴝𐴉𐴠 𐴈𐴟𐴖𐴥𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 𐴓𐴝𐴌𐴥𐴝𐴘𐴌 𐴔𐴝𐴇𐴥𐴠𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴑𐴟𐴀𐴟𐴂𐴢 𐴒𐴡𐴌𐴥𐴞𐴁𐴝𐴌 𐴑𐴠𐴙𐴏𐴧𐴥𐴟 𐴔𐴝𐴐𐴢 𐴀𐴝𐴒𐴠 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴁𐴝𐴒𐴞𐴌 𐴔𐴝𐴎𐴤𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴀𐴥𐴡𐴘 𐴓𐴝𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴠 𐴁𐴡𐴏𐴥𐴡𐴌 𐴔𐴠 𐴔𐴝𐴐𐴢 𐴀𐴥𐴡𐴘𐴃𐴠 𐴀𐴝𐴌𐴑𐴝𐴕𐴡𐴃 𐴏𐴝𐴙𐴌𐴀𐴥𐴡 𐴔𐴞𐴑𐴧𐴤𐴙𐴝 𐴓𐴝𐴌𐴥𐴝𐴘 𐴐𐴤𐴞𐴣𐴍𐴞 𐴒𐴞𐴘𐴡𐴘 , 𐴓𐴝𐴌𐴥𐴝𐴘𐴃 𐴔𐴠𐴓𐴠𐴄𐴠𐴌𐴞𐴌 𐴓𐴟𐴏𐴧𐴝𐴕 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴞 𐴒𐴤𐴡𐴌𐴁𐴝𐴌𐴞 𐴁𐴤𐴣𐴚𐴞 𐴉𐴥𐴠𐴓𐴝𐴘𐴧𐴠 , 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴝𐴘𐴧𐴠 , 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴌𐴝𐴏𐴧𐴝 𐴒𐴤𐴝𐴣𐴄 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴠 𐴱𐴱

Sources : Burmese Irrawaddy