𐴌𐴟𐴇𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴑𐴠𐴙𐴏𐴢 𐴓𐴝𐴒𐴝𐴃𐴝𐴌 𐴁𐴝𐴀𐴝𐴘 𐴎𐴝𐴘𐴁𐴡𐴓𐴧𐴝 , 𐴁𐴝𐴚𐴓𐴝𐴊𐴠𐴐𐴠 𐴀𐴡 𐴀𐴝𐴘 𐴏𐴞𐴌 𐴔𐴡𐴊𐴡𐴊 𐴏𐴝𐴘𐴧𐴠 𐴱𐴱

𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴃 𐴀𐴝𐴏𐴥𐴠𐴊𐴠 𐴁𐴝𐴚𐴓𐴝𐴊𐴠𐴐𐴡𐴌 𐴏𐴥𐴡𐴉𐴞𐴌 𐴀𐴝𐴌 𐴀𐴡 𐴀𐴝𐴘 𐴏𐴞 𐴃𐴡𐴕𐴎𐴞𐴔𐴡𐴌 𐴂𐴝𐴌𐴔𐴠𐴕𐴥𐴠𐴕 𐴕𐴡𐴔𐴝𐴙𐴕𐴊𐴝 / 𐴔𐴟𐴇𐴝𐴔𐴧𐴡𐴊 𐴅𐴝𐴖𐴞𐴊 𐴂𐴡𐴄𐴖𐴝𐴌𐴞 𐴘𐴠 !𐴒𐴝𐴔𐴁𐴞𐴘𐴝𐴌 𐴊𐴟𐴖𐴝𐴌𐴝 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴡𐴃 (𐴀𐴝𐴘 𐴏𐴞 𐴅𐴠) 𐴑𐴤𐴟𐴙𐴓𐴧𐴙𐴠 𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴑𐴠𐴙𐴏𐴢 𐴓𐴝𐴒𐴝𐴃𐴝𐴌 𐴁𐴝𐴀𐴝𐴘 𐴎𐴝𐴘𐴁𐴡𐴓𐴧𐴝 , ( 𐴀𐴡 𐴀𐴝𐴘 𐴏𐴞 ) 𐴃𐴡𐴕𐴎𐴞𐴔𐴡𐴌 𐴔𐴞𐴔𐴁𐴤𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴏𐴝𐴘𐴧𐴠 𐴱𐴱

𐴕𐴡𐴖𐴡𐴔𐴁𐴡𐴌 𐴔𐴝𐴐𐴡𐴌 𐴰 𐴱 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃 𐴁𐴝𐴌𐴠 𐴅𐴞𐴊𐴧𐴤𐴝 𐴐𐴤𐴡𐴀𐴡𐴌𐴡𐴃 , 𐴁𐴡𐴌𐴔𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌𐴠 𐴀𐴡𐴔𐴝𐴙𐴕𐴧𐴡𐴃𐴝 𐴀𐴝𐴌 𐴑𐴟𐴁𐴠𐴁𐴝𐴀𐴝𐴌 𐴒𐴡𐴌𐴥𐴝𐴌, 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃 𐴊𐴝𐴘 𐴀𐴝𐴌 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴃𐴧𐴟 𐴅𐴟𐴖𐴝𐴁 𐴊𐴞𐴘𐴝 𐴉𐴡𐴌𐴞𐴁𐴤𐴡𐴊𐴠 𐴘𐴝𐴀𐴝𐴕𐴡 𐴖𐴡𐴌𐴠 , 𐴒𐴡𐴙𐴅𐴧𐴤𐴙𐴠𐴊𐴠 𐴇𐴥𐴝𐴚𐴒𐴝𐴔𐴞 𐴔𐴞𐴄𐴤𐴞𐴚𐴡𐴃 / 𐴅𐴝𐴖𐴞𐴊𐴠 𐴔𐴡𐴊𐴡𐴊𐴡𐴌 𐴀𐴝𐴌𐴎 𐴒𐴡𐴙𐴅𐴧𐴤𐴙𐴠 𐴊𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴑𐴠𐴙𐴏𐴢 𐴓𐴝𐴃𐴧𐴤𐴝𐴃 𐴏𐴝𐴓𐴝𐴀𐴝𐴃 𐴌𐴝𐴑𐴤𐴞 𐴉𐴝𐴌𐴠 𐴉𐴝𐴀𐴝𐴕 , 𐴁𐴝𐴚𐴓𐴝𐴊𐴠𐴐𐴠 𐴌𐴡𐴎𐴝𐴑𐴝𐴌𐴝𐴕𐴝 𐴉𐴥𐴝𐴕𐴡𐴃 𐴵 . 𐴰 $ 𐴔𐴡𐴓𐴞𐴘𐴟𐴕 𐴀𐴝𐴒𐴠 𐴓𐴡𐴃𐴞 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 , 𐴔𐴟𐴀𐴟𐴔 𐴔𐴞𐴑𐴧𐴤𐴙𐴝 𐴎𐴝𐴘 𐴀𐴝𐴌𐴀𐴥𐴡 𐴲 . 𐴰 $ 𐴊𐴞𐴀𐴞𐴁𐴡 , 𐴖𐴡𐴌𐴠 𐴓𐴠𐴑𐴤𐴝 𐴒𐴞𐴘𐴠𐴊𐴠 𐴄𐴞𐴛𐴝 𐴀𐴟𐴀𐴟𐴕 𐴁𐴦𐴝𐴊𐴠 𐴘𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴌𐴝𐴑𐴤𐴞𐴁𐴡𐴓𐴧𐴝 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴰 𐴵 𐴳 $ 𐴔𐴡𐴓𐴞𐴘𐴟𐴕 𐴈𐴥𐴡𐴏𐴧𐴝 𐴒𐴡𐴌𐴥𐴞 𐴒𐴤𐴡𐴌 𐴁𐴝𐴕𐴝𐴘𐴧𐴠, 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴈𐴥𐴡𐴏𐴧𐴝 𐴒𐴡𐴙𐴅𐴧𐴤𐴙𐴠𐴊𐴠 𐴄𐴞𐴛𐴝 𐴀𐴟𐴀𐴟𐴕 𐴁𐴠𐴒𐴧𐴤𐴟𐴕 𐴐𐴤𐴟𐴊𐴠 𐴁𐴝𐴚𐴓𐴝𐴊𐴠𐴐𐴡𐴌 𐴉𐴥𐴝𐴕𐴡𐴃𐴧𐴟 𐴊𐴞𐴘𐴠𐴊𐴠 𐴁𐴡𐴓𐴞 / 𐴅𐴝𐴖𐴞𐴊𐴠 𐴈𐴡𐴘𐴧𐴠 𐴱𐴱

𐴅𐴝𐴖𐴞𐴊𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴁𐴝𐴚𐴓𐴝𐴊𐴠𐴐𐴡𐴃𐴧𐴟 ( 𐴀𐴡 𐴀𐴝𐴘 𐴏𐴞) 𐴃𐴡𐴕𐴎𐴞𐴔𐴡𐴃 𐴐𐴝𐴔𐴠𐴓 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 , 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴀𐴡 𐴀𐴝𐴘 𐴏𐴞 𐴃𐴡𐴕𐴎𐴞𐴔𐴡𐴌 𐴊𐴠𐴐𐴢 𐴀𐴡𐴑𐴧𐴡𐴓𐴡𐴃𐴧𐴟 𐴀𐴟𐴏𐴥𐴟𐴓 𐴀𐴥𐴡𐴘𐴧𐴠𐴊𐴠 𐴔𐴡𐴊𐴡𐴊 𐴀𐴞𐴀𐴞𐴕 𐴎𐴡𐴌𐴟𐴌𐴡𐴃𐴡𐴌 𐴃𐴟 𐴁𐴤𐴝𐴌𐴥𐴡 𐴁𐴠𐴐𐴤𐴞 𐴈𐴡𐴔 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴘 𐴏𐴞 𐴅𐴠 𐴀𐴝𐴊𐴝𐴓𐴡𐴃𐴡𐴌 𐴃𐴟𐴌𐴥𐴟 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴇𐴥𐴡𐴓 𐴁𐴠𐴐𐴤𐴞 𐴓𐴝𐴔𐴁𐴝 , 𐴐𐴤𐴠𐴐𐴢 𐴉𐴡𐴙𐴅𐴧𐴡𐴕𐴃𐴡 𐴑𐴤𐴟𐴂𐴢 𐴊𐴤𐴝𐴂𐴢 𐴒𐴡𐴌𐴥𐴞 𐴀𐴝𐴣𐴀𐴝𐴌𐴝𐴌 𐴑𐴟𐴐𐴤𐴞𐴐𐴢 𐴎𐴝𐴌𐴞 𐴌𐴝𐴑𐴤𐴝 𐴉𐴡𐴌𐴞𐴁𐴤𐴡, 𐴐𐴤𐴞𐴛𐴡𐴌 𐴀𐴥𐴝𐴣𐴌𐴞 𐴎𐴞𐴁𐴡𐴕 𐴈𐴥𐴡𐴃𐴡𐴔 𐴒𐴡𐴌𐴞 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌𐴃𐴧𐴟 𐴔𐴦𐴝𐴌𐴟𐴔 𐴒𐴡𐴌𐴥𐴞 𐴉𐴥𐴠𐴓𐴝𐴘𐴃𐴡 , 𐴑𐴟𐴐𐴤𐴞𐴐𐴢 𐴒𐴡𐴌𐴠𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴀𐴟𐴒𐴧𐴤𐴗𐴝 𐴔𐴡𐴎𐴓𐴟𐴔 𐴑𐴡𐴗𐴔𐴠 𐴀𐴝𐴘 𐴏𐴞 𐴅𐴠 𐴀𐴝𐴊𐴝𐴓𐴡𐴃𐴡𐴃 𐴀𐴞𐴕𐴏𐴝𐴉𐴢 𐴉𐴝𐴘𐴁𐴡𐴓𐴧𐴝 𐴀𐴠𐴃𐴧𐴠𐴉𐴝𐴑𐴡𐴌 𐴏𐴥𐴝𐴣𐴀𐴝𐴃𐴠 𐴇𐴥𐴠𐴔𐴝𐴘𐴡𐴃 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 / 𐴅𐴝𐴖𐴞𐴊𐴠 𐴈𐴡𐴘𐴧𐴠 𐴱𐴱

Sources : Dhakatribune