𐴑𐴤𐴡𐴑𐴠𐴌𐴥𐴞 𐴑𐴠𐴌𐴝𐴙𐴚𐴡𐴌 𐴉𐴟𐴓𐴞𐴐𐴠 ( 𐴱 𐴰 𐴱 ) 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴌𐴥𐴞 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴱𐴱

𐴑𐴠𐴀𐴞𐴚 𐴂𐴙𐴠𐴕𐴠 , 𐴑𐴤𐴡𐴑𐴠𐴌𐴞𐴀 𐴐𐴤𐴡𐴀𐴡𐴌𐴡𐴌 𐴓𐴝𐴙𐴚 𐴖𐴥𐴝 𐴉𐴟𐴓𐴡𐴌 𐴖𐴡𐴌𐴠 , 𐴕𐴡𐴖𐴡𐴔𐴁𐴡𐴌 𐴔𐴝𐴐𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴊𐴦𐴟𐴛𐴅𐴧𐴙𐴝 (𐴰 𐴳 : 𐴳) 𐴁𐴝𐴎𐴠, 𐴀𐴝𐴌𐴑𐴝𐴕𐴡𐴃, 𐴁𐴤𐴟𐴏𐴞𐴊𐴡𐴚𐴡𐴃 𐴃𐴤𐴝𐴑𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 (𐴸 𐴷) 𐴎𐴡𐴕 𐴁𐴠𐴍𐴞𐴀𐴝𐴙𐴕 ( 𐴳 𐴲 ) 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 ( 𐴱 𐴰 𐴱 ) 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 , 𐴉𐴝𐴣𐴏𐴧𐴝𐴕 𐴒𐴝𐴌𐴥𐴞 𐴓𐴡𐴘 𐴀𐴝𐴘𐴧𐴠𐴌𐴊𐴧𐴠 𐴐𐴤𐴡𐴣𐴀𐴡𐴃 , 𐴑𐴤𐴡𐴑𐴠𐴌𐴞𐴀 𐴑𐴠𐴌𐴝𐴙𐴚𐴡𐴌 𐴉𐴟𐴓𐴞𐴐𐴢 𐴀𐴝𐴌 𐴓𐴝𐴙𐴚 𐴖𐴥𐴝 𐴉𐴟𐴓𐴡𐴌 𐴇𐴥𐴠𐴉𐴝𐴎𐴡𐴃𐴞 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴞𐴓𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴑𐴤𐴡𐴑𐴠𐴌𐴠𐴀 𐴑𐴠𐴌𐴝𐴙𐴚𐴡𐴌 𐴉𐴟𐴓𐴞𐴐𐴢 𐴓𐴡𐴘 𐴈𐴥𐴝𐴃𐴞𐴓 𐴀𐴝𐴏𐴥𐴠𐴊𐴠 𐴔𐴝𐴙𐴕𐴐𐴡𐴌 𐴃𐴟𐴌𐴥𐴟 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 ( 𐴱 𐴰 𐴱 ) 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌𐴠 , 𐴑𐴤𐴡𐴑𐴠𐴌𐴞𐴀 𐴐𐴤𐴡𐴀𐴡𐴌𐴡𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕- -𐴡𐴌 𐴊𐴟𐴘𐴀𐴡𐴔 𐴁𐴡𐴌𐴡 𐴐𐴤𐴝𐴀𐴝𐴉𐴢 , 𐴉𐴥𐴡𐴌𐴘𐴝𐴊𐴞 𐴁𐴡𐴕𐴞 𐴹 𐴴 𐴹 𐴱 𐴐𐴤𐴡𐴕𐴡𐴌 , 𐴁𐴡𐴌𐴔𐴥𐴝 𐴔𐴟𐴓𐴧𐴟𐴑𐴡𐴌 𐴁𐴤𐴟𐴃𐴡𐴌𐴠 𐴃𐴤𐴝𐴑𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 , ( 𐴀𐴠𐴕 𐴀𐴝𐴌 𐴏𐴞 ) 𐴉𐴡𐴄𐴤𐴟𐴌 𐴁𐴝𐴁𐴡𐴃𐴠 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴓𐴡𐴔𐴁𐴡𐴌 (𐴳)𐴶 / (𐴲) 𐴶 𐴔𐴡𐴎𐴞𐴕 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴁𐴤𐴟𐴏𐴞𐴊𐴡𐴚𐴡𐴌 𐴁𐴤𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴒𐴝𐴌𐴥𐴞 𐴓𐴡𐴘 𐴁𐴡𐴌𐴔𐴥𐴝-𐴄𐴤𐴝𐴘𐴓𐴠𐴕 𐴁𐴡𐴖𐴋𐴝𐴌𐴡𐴃 𐴉𐴡𐴣𐴀𐴡𐴏𐴝𐴘 𐴊𐴡𐴀𐴡𐴙𐴕𐴧𐴝 , 𐴔𐴡𐴌𐴥𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌𐴡𐴌 ( 𐴲 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴗𐴥𐴝 , 𐴏𐴞𐴕 𐴕𐴝𐴒𐴝 ( 𐴲 ) 𐴓𐴡𐴔𐴁𐴤𐴡𐴌 𐴌𐴝𐴏𐴧𐴝𐴃 𐴃𐴤𐴝𐴑𐴠𐴊𐴠 / 𐴀𐴡𐴚 𐴕𐴝𐴙𐴚 𐴔𐴥𐴟 , 𐴑𐴤𐴡𐴑𐴠𐴌𐴞𐴀 𐴐𐴤𐴡𐴀𐴡𐴌𐴡𐴌 𐴖𐴞𐴎𐴧𐴝 𐴒𐴤𐴟𐴕 𐴉𐴝𐴌𐴝𐴌 / 𐴏𐴥𐴡 𐴖𐴥𐴝 𐴄𐴤𐴟 , 𐴀𐴥𐴡𐴓𐴠 𐴐𐴤𐴡𐴀𐴡𐴌𐴡𐴌 𐴔𐴡𐴌𐴝𐴙𐴚 𐴉𐴝𐴌𐴝𐴌 / 𐴏𐴥𐴡 𐴓𐴥𐴝 𐴄𐴤𐴟 , 𐴔𐴡𐴌𐴥𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌𐴡𐴌 𐴃𐴤𐴡𐴌𐴝 𐴆𐴤𐴙𐴡𐴚 𐴌𐴝𐴏𐴧𐴝 ( 𐴴 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴗𐴥𐴝𐴌 / 𐴛𐴟 𐴓𐴥𐴝𐴚 𐴀𐴥𐴟 , 𐴔𐴡𐴌𐴥𐴝 𐴖𐴡𐴋𐴧𐴞 𐴐𐴤𐴡𐴀𐴡𐴌𐴡𐴌 ( 𐴳 ) 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴗𐴥𐴝𐴌 / 𐴏𐴥𐴡 𐴔𐴙𐴥𐴟 𐴆𐴙𐴡 , 𐴀𐴠 ( 𐴵 ) 𐴎𐴡𐴕 𐴋𐴝𐴓𐴝𐴓 𐴀𐴟𐴀𐴟𐴕𐴡𐴌𐴠 , 𐴀𐴡𐴉𐴥𐴡𐴌𐴝𐴊𐴞 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴓𐴡𐴔𐴁𐴤𐴡𐴌 ( 𐴷 𐴶 𐴳 ) 𐴋𐴝𐴓𐴝𐴓𐴞 𐴑𐴠𐴙𐴏𐴢 𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 𐴁𐴤𐴟𐴏𐴞𐴊𐴡𐴚 𐴁𐴤𐴝𐴐𐴞 ( 𐴱 𐴰 𐴱 ) 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕 , 𐴁𐴡𐴌𐴔𐴥𐴝-𐴄𐴤𐴝𐴘𐴓𐴠𐴕𐴡𐴌 𐴁𐴡𐴖𐴋𐴝𐴌𐴡𐴌 𐴃𐴟𐴌𐴥𐴟 𐴔𐴡𐴓𐴠𐴆𐴤𐴙𐴝𐴃 𐴈𐴝𐴔 𐴒𐴡𐴙𐴃𐴧𐴡 𐴎𐴡𐴀𐴡𐴙𐴕𐴧𐴝 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱