𐴕𐴦𐴡 𐴓𐴡𐴘 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴝 𐴕𐴠𐴀𐴠𐴙𐴓𐴧𐴙𐴠𐴊𐴠 𐴰 𐴸 𐴎𐴡𐴕 𐴌𐴇𐴝𐴙𐴚𐴒𐴙𐴝 𐴁𐴡𐴕 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴃𐴧𐴟 𐴕𐴦𐴡 𐴓𐴡𐴘 𐴔𐴡𐴓𐴠𐴆𐴤𐴙𐴝 𐴈𐴝𐴔 𐴒𐴡𐴌𐴥𐴞𐴃𐴤𐴡 𐴎𐴝𐴘𐴁𐴡𐴓𐴧𐴝 𐴕𐴠𐴀𐴠𐴙𐴓𐴧𐴙𐴠 𐴊𐴠 , 𐴰 𐴸 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴒𐴡𐴃𐴡 𐴈𐴝𐴙𐴓𐴧𐴝 𐴁𐴡𐴕 𐴀𐴥𐴡𐴘𐴧𐴠 𐴁𐴡𐴓𐴞 𐴀𐴠 𐴀𐴠𐴉𐴢 𐴂𐴞 𐴈𐴥𐴡𐴁𐴡𐴌𐴡𐴃 𐴉𐴝𐴀𐴝 𐴒𐴞𐴘𐴠,𐴀𐴥𐴞𐴃𐴝𐴌𐴝 𐴀𐴝𐴌𐴑𐴝𐴕𐴡𐴃𐴧𐴟 𐴕𐴠𐴀𐴠𐴓𐴞 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴝𐴌 𐴉𐴡𐴣𐴃𐴤𐴡𐴃 𐴔𐴗𐴠𐴕 𐴂𐴠𐴌𐴠𐴕𐴠𐴌 𐴏𐴠𐴕 𐴂𐴟𐴌𐴟 𐴎𐴠𐴌𐴥𐴠𐴃 𐴔𐴝𐴎𐴤𐴠 𐴉𐴡𐴣𐴀𐴡𐴙𐴏𐴧𐴙𐴠𐴊𐴠 𐴀𐴡𐴑𐴃𐴤𐴡𐴃 𐴁𐴡𐴕 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴋𐴝𐴓𐴝𐴓𐴠 𐴔𐴡𐴓𐴠𐴆𐴤𐴙𐴝𐴃 𐴉𐴝𐴄𐴤𐴝𐴘𐴁𐴡𐴓𐴧𐴝 𐴁𐴡𐴓𐴞 𐴈𐴡𐴀𐴡𐴘 𐴀𐴥𐴞𐴃𐴝𐴌𐴝𐴌𐴠 𐴋𐴝𐴑𐴞 𐴀𐴝𐴕𐴥𐴞 𐴕𐴦𐴡 𐴀𐴠𐴑𐴧𐴤𐴝𐴕𐴡𐴃 𐴃𐴟𐴓𐴞 𐴊𐴞𐴘𐴠 𐴁𐴡𐴓𐴞 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 ,𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴥𐴡 𐴀𐴝𐴏𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌 𐴁𐴝𐴁𐴡𐴃𐴠 𐴈𐴡𐴕𐴋𐴞𐴓𐴧𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡 𐴕𐴡 𐴎𐴝𐴕𐴥𐴞 𐴱𐴱

𐴀𐴝𐴒𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴠 , 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴔𐴡𐴎𐴞𐴕 𐴑𐴝𐴌𐴖𐴝𐴘 𐴒𐴡𐴌𐴥𐴞 , 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴊𐴡𐴌𐴠 𐴎𐴞𐴘𐴡𐴓 𐴊𐴞𐴘𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴡𐴌 𐴁𐴤𐴟𐴃𐴡𐴌𐴠 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴡𐴀𐴡𐴕 𐴀𐴝𐴌 𐴏𐴥𐴡𐴉𐴡𐴌 𐴒𐴡𐴌𐴡𐴀𐴡𐴕𐴡𐴌 𐴀𐴠𐴅𐴝𐴎𐴡𐴃 𐴕𐴡 𐴉𐴝𐴀𐴝𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴀𐴠𐴑 𐴎𐴝𐴒𐴝𐴃𐴧𐴟 𐴀𐴝𐴌𐴀𐴠𐴑 𐴎𐴝𐴒𐴝𐴃 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴇𐴥𐴝𐴔𐴞𐴐𐴤𐴝 𐴁𐴡𐴕 𐴀𐴟𐴖𐴝𐴃 𐴀𐴝𐴏𐴥𐴠𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴕 𐴒𐴡𐴌𐴥𐴝 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠, 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴎𐴞𐴘𐴡𐴓𐴡𐴃 𐴊𐴞𐴘𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴰 𐴰 𐴲 𐴱 𐴎𐴡𐴕 𐴓𐴡𐴃𐴞 𐴀𐴝𐴏𐴥𐴠 𐴁𐴡𐴓𐴞 , 𐴊𐴠𐴐𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃𐴡𐴌 ( 𐴀𐴠𐴕 𐴘𐴟 𐴅𐴞 ) 𐴔𐴡𐴐𐴖𐴝𐴌𐴝 𐴊𐴡𐴀𐴡𐴙𐴕𐴧𐴝 𐴑𐴡𐴔𐴞𐴄𐴤𐴞𐴌 𐴔𐴞𐴔𐴁𐴤𐴡𐴌 / 𐴀𐴥𐴟 𐴀𐴡𐴚 𐴆𐴙𐴡 𐴔𐴥𐴟 𐴘𐴠 𐴈𐴡𐴘𐴧𐴠 𐴱𐴱

𐴑𐴟𐴀𐴟𐴂𐴑𐴝𐴌 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝 𐴒𐴡𐴌𐴠𐴀𐴠𐴌 𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴊𐴠𐴐𐴡𐴙𐴃𐴧𐴝 𐴀𐴡𐴙𐴕𐴧𐴡 𐴑𐴡𐴗𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴘𐴥𐴡 𐴒𐴡𐴌𐴠𐴀𐴠𐴌 𐴊𐴠 𐴎𐴟𐴓𐴟𐴔𐴡𐴌 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴎𐴞𐴔𐴧𐴝𐴊𐴝𐴌 𐴁𐴡𐴓𐴞 / 𐴀𐴥𐴟 𐴀𐴡𐴚 𐴆𐴙𐴡 𐴔𐴥𐴟 𐴘𐴠 𐴈𐴡𐴘𐴧𐴠 𐴱𐴱

Sources : RFAburmese