𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 :𐴁𐴡𐴌𐴔𐴥𐴝 𐴘𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴉𐴡𐴌𐴁𐴝 𐴕𐴡 𐴒𐴡𐴌𐴠𐴀𐴠𐴌 𐴱𐴱

𐴁𐴡𐴌𐴔𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴁𐴝𐴁𐴡𐴃𐴠 𐴉𐴡𐴌𐴁𐴝 𐴕𐴡 𐴒𐴡𐴌𐴠𐴀𐴠𐴌 ,𐴁𐴡𐴌𐴔𐴥𐴝𐴌 𐴔𐴡𐴑𐴏𐴟𐴊 𐴀𐴥𐴡𐴙𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴔𐴦𐴝𐴔𐴠𐴓𐴝 𐴀𐴠𐴑 𐴏𐴥𐴝𐴘𐴋𐴠 𐴌𐴝𐴑𐴤𐴞 , 𐴁𐴝𐴚𐴓𐴝𐴊𐴠𐴐𐴢 𐴓𐴡𐴘 𐴏𐴡𐴓𐴠𐴀𐴠𐴌 𐴊𐴧𐴠 𐴄𐴠𐴕𐴐𐴤𐴠𐴕 𐴈𐴡𐴔𐴝𐴘 𐴉𐴥𐴠𐴓𐴝𐴀𐴡𐴕 𐴁𐴡𐴓𐴞 , 𐴀𐴝𐴏𐴞𐴘𐴝 𐴄𐴝𐴙𐴔 𐴈𐴥𐴡𐴁𐴡𐴌𐴡𐴌 𐴀𐴝𐴄𐴞𐴑𐴠𐴓𐴡𐴃 𐴈𐴡𐴘𐴧𐴠 𐴱𐴱

𐴀𐴥𐴠 𐴀𐴝𐴄𐴞𐴑𐴠𐴓 𐴔𐴡𐴎𐴞𐴕 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴕𐴞𐴎𐴡𐴌 𐴊𐴠𐴐𐴡𐴃𐴧𐴟 𐴕𐴠𐴀𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 , 𐴀𐴡𐴙𐴕𐴧𐴡 𐴊𐴠𐴐𐴡𐴃 𐴉𐴝𐴕𐴥𐴝 𐴓𐴡𐴘 𐴀𐴡𐴔𐴝𐴙𐴕𐴐𐴤𐴡𐴃𐴝 𐴃𐴤𐴝𐴑𐴝 𐴃𐴤𐴝𐴑𐴠𐴀𐴠𐴌 , 𐴅𐴠𐴕𐴟𐴏𐴥𐴝𐴙𐴋𐴡𐴌 𐴁𐴡𐴑𐴡𐴌𐴝 𐴁𐴡𐴕𐴞 𐴁𐴦𐴝𐴊𐴠 , 𐴀𐴠𐴑 𐴔𐴡𐴓𐴞𐴘𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 , 𐴁𐴝𐴚𐴓𐴝𐴊𐴠𐴐𐴡𐴃 𐴉𐴝𐴕𐴥𐴝 𐴓𐴡𐴘 𐴃𐴤𐴝𐴙𐴑𐴧𐴙𐴠 𐴊𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴟𐴌𐴝𐴘 𐴒𐴞𐴘𐴡𐴘 𐴱𐴱

𐴔𐴡𐴕𐴃𐴡𐴌 𐴁𐴝𐴌 𐴁𐴤𐴝𐴌 𐴖𐴝𐴉𐴠𐴏𐴢 𐴕𐴞𐴎𐴝𐴘𐴁𐴤𐴡 𐴁𐴡𐴓𐴞 𐴖𐴝𐴊𐴝 𐴁𐴦𐴝𐴊𐴠 , 𐴏𐴥𐴡𐴚𐴑𐴡𐴄 𐴇𐴥𐴡𐴓 𐴒𐴡𐴌𐴥𐴞𐴁𐴝𐴌 𐴑𐴠𐴙𐴏𐴧𐴥𐴟 𐴀𐴝𐴓𐴝𐴔𐴡𐴃 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 , 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴠 𐴖𐴝𐴊𐴝 𐴉𐴟𐴌𐴝 𐴕𐴡 𐴒𐴡𐴌𐴠𐴀𐴠𐴌 ,𐴀𐴝𐴈𐴥𐴠𐴌𐴑𐴝𐴌 𐴀𐴞𐴕𐴏𐴝𐴕𐴞𐴘𐴡𐴃𐴞 𐴁𐴤𐴝𐴉𐴝 𐴀𐴝𐴌 𐴕𐴡𐴎𐴡𐴌 𐴓𐴡𐴘 𐴏𐴝𐴘𐴓𐴥𐴠 , 𐴀𐴠𐴊𐴤𐴟𐴒𐴧𐴟𐴕 𐴔𐴝𐴙𐴕𐴐𐴡𐴌𐴠 𐴏𐴥𐴝𐴀𐴝𐴌𐴝 𐴊𐴞𐴀𐴞 𐴌𐴝𐴑𐴤𐴡𐴀𐴡𐴕 , 𐴁𐴝𐴚𐴓𐴝𐴊𐴠𐴐𐴡𐴌 𐴓𐴧𐴝 𐴉𐴟𐴣𐴎𐴤𐴝 𐴀𐴥𐴡𐴘𐴧𐴠 𐴱𐴱

𐴉𐴥𐴟𐴣𐴖𐴝𐴣𐴃𐴞 𐴉𐴥𐴟𐴣𐴖𐴝𐴃𐴞 𐴀𐴠𐴓𐴝𐴑𐴝𐴀𐴞 𐴕𐴞𐴌𐴝𐴉𐴡𐴃𐴧𐴝𐴌 𐴇𐴥𐴟𐴔𐴑𐴞𐴌 𐴐𐴤𐴝𐴣𐴃𐴠 𐴐𐴤𐴝𐴣𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴀𐴥𐴠𐴏𐴃𐴝𐴕𐴞𐴘𐴡 𐴊𐴠𐴐𐴤𐴞 𐴁𐴝𐴐𐴤𐴞𐴌 𐴈𐴡𐴙𐴅𐴧𐴙𐴝 𐴊𐴞𐴕 𐴊𐴞𐴕 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘 , 𐴏𐴥𐴝𐴔𐴧𐴞 𐴳 𐴲 𐴰 𐴲 𐴐𐴤𐴡𐴕𐴡𐴃 𐴁𐴝𐴚𐴓𐴝𐴊𐴠𐴐𐴡𐴃 𐴁𐴤𐴟𐴄 𐴀𐴥𐴡𐴘𐴁𐴡 , 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴈𐴡𐴃𐴤𐴝 𐴁𐴠𐴐𐴤𐴞 𐴒𐴟𐴌𐴟𐴃𐴧𐴡 𐴉𐴟𐴕𐴧𐴡 𐴁𐴤𐴝𐴉𐴠 𐴀𐴟𐴍𐴠𐴀𐴠𐴌 𐴱𐴱

𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴅𐴠𐴕𐴟𐴏𐴥𐴝𐴙𐴋𐴡𐴌𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴡𐴃 𐴉𐴝𐴌𐴥𐴝𐴘 𐴑𐴝𐴑𐴏𐴡 𐴁𐴝𐴎𐴝𐴌𐴡𐴌 𐴀𐴟𐴑𐴤𐴞𐴘𐴝𐴃 𐴄𐴠𐴑𐴕𐴝𐴉𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴙𐴠 , 𐴀𐴥𐴠 𐴁𐴡𐴏𐴡𐴌𐴡𐴃 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴉𐴥𐴠𐴌𐴡𐴃 𐴕𐴞𐴀𐴞𐴁𐴝𐴌 𐴁𐴝𐴁𐴡𐴃𐴠 𐴁𐴡𐴌𐴔𐴥𐴝 𐴓𐴡𐴘 𐴏𐴟𐴑𐴃𐴞𐴕𐴝𐴔𐴝 𐴀𐴥𐴡𐴘𐴧𐴠 , 𐴔𐴡𐴕𐴃𐴡𐴌 𐴀𐴝𐴌𐴑𐴝𐴕𐴡𐴌 𐴅𐴠𐴕𐴟𐴏𐴥𐴝𐴙𐴋𐴡𐴌 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴟𐴌𐴝𐴘𐴧𐴠𐴊𐴠 𐴘𐴥𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴱𐴱

Sources : Ukhiyanews.com