𐴀𐴝𐴔𐴧𐴝 𐴐𐴤𐴡𐴀𐴡𐴌𐴡𐴃 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄 𐴀𐴠𐴑𐴧𐴝𐴕 𐴋𐴟𐴉𐴥𐴞 𐴒𐴞𐴘𐴡𐴘 𐴰 𐴲 𐴎𐴡𐴕 𐴃𐴟𐴖𐴝𐴘 𐴕𐴥𐴡 𐴉𐴝𐴀𐴝 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 𐴂𐴙𐴝 𐴂𐴟𐴕 𐴑𐴠𐴌𐴝𐴙𐴚𐴡𐴌 𐴀𐴝𐴔𐴧𐴝 𐴐𐴤𐴡𐴀𐴡𐴌𐴡𐴌 𐴑𐴡𐴋𐴧𐴤𐴟𐴚 𐴓𐴥𐴠 𐴉𐴝𐴌𐴝𐴌 𐴈𐴝𐴣𐴏𐴥𐴠 , 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃 , 𐴰 𐴸 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴞 𐴓𐴡𐴘 𐴀𐴝𐴘𐴧𐴠𐴌𐴊𐴧𐴠 , 𐴁𐴟𐴄 𐴀𐴠𐴑𐴧𐴝𐴕 𐴋𐴟𐴉𐴥𐴞 𐴎𐴝𐴘𐴒𐴤𐴡𐴘 𐴁𐴦𐴝𐴊𐴠 𐴰 𐴲 𐴎𐴡𐴕 𐴓𐴡𐴃𐴞 𐴃𐴟𐴖𐴝𐴘 𐴕𐴥𐴡 𐴉𐴝𐴀𐴝 𐴁𐴡𐴓𐴞 , 𐴰 𐴳 𐴃𐴝𐴌𐴥𐴞𐴑𐴡𐴃 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴁𐴟𐴄 𐴘𐴝𐴀𐴝𐴕 𐴑𐴡𐴋𐴧𐴤𐴟𐴚 𐴓𐴥𐴠 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴋𐴟𐴉𐴥𐴞 𐴎𐴝𐴘𐴒𐴤𐴡𐴘 𐴁𐴦𐴝𐴊𐴠, 𐴕𐴦𐴡𐴌 𐴖𐴡𐴌𐴠 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴔𐴝𐴕𐴥𐴟𐴙𐴐𐴢 𐴰 𐴸 𐴎𐴡𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴰 𐴶 𐴎𐴡𐴕 𐴓𐴡𐴃𐴞 𐴁𐴝𐴏𐴝𐴘 𐴉𐴝𐴙𐴅𐴧𐴤𐴙𐴠 𐴁𐴝𐴑𐴞 𐴰 𐴲 𐴎𐴡𐴕 𐴓𐴡𐴃𐴞 𐴀𐴥𐴝𐴣𐴎𐴞 𐴒𐴞𐴘𐴡𐴘 𐴁𐴡𐴓𐴞 , 𐴂𐴙𐴝 𐴂𐴟𐴕𐴡𐴌 𐴊𐴠𐴐𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴃𐴝𐴌𐴝 𐴀𐴝𐴌𐴑𐴝𐴕𐴡𐴃𐴧𐴟 𐴀𐴝𐴘𐴧𐴠𐴌 𐴊𐴧𐴠𐴕𐴠 𐴕𐴥𐴝𐴑𐴞 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴀𐴝𐴘𐴧𐴠𐴌 , 𐴕𐴡 𐴎𐴝𐴀𐴝𐴕𐴞 𐴓𐴥𐴠 𐴘𐴥𐴡 , 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴝 𐴁𐴟𐴄 𐴓𐴡𐴘 𐴀𐴝𐴘𐴧𐴠𐴌 𐴁𐴡𐴓𐴞 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 , 𐴀𐴠𐴈𐴥𐴡𐴕 𐴁𐴝𐴏𐴝𐴘 𐴉𐴝𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴴 𐴵 𐴎𐴡𐴕 𐴁𐴠𐴍𐴝𐴀𐴝𐴙𐴕 𐴶 𐴎𐴡𐴕 𐴁𐴠𐴍𐴞𐴀𐴝𐴙𐴕 𐴁𐴠𐴒𐴧𐴤𐴟𐴕𐴠 𐴰 𐴶 𐴎𐴡𐴕 , 𐴸 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴵 𐴴 𐴎𐴡𐴕 , 𐴸 𐴱 𐴁𐴡𐴏𐴥𐴡𐴌𐴡𐴌 𐴖𐴡𐴌𐴠 𐴵 𐴱 𐴎𐴡𐴕 𐴁𐴡𐴓𐴞 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴀𐴥𐴞𐴃𐴝𐴌𐴝𐴌𐴠 𐴁𐴟𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴡 𐴕𐴥𐴠 𐴕𐴥𐴝𐴑𐴞 𐴕𐴡 𐴒𐴡𐴌𐴥𐴞𐴁𐴡 𐴕𐴡 𐴎𐴝𐴀𐴝𐴕𐴥𐴞 𐴁𐴡𐴓𐴞 𐴁𐴟𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴌 𐴀𐴥𐴠𐴏𐴃𐴝𐴕𐴞 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴒𐴡𐴃𐴡 𐴲 𐴲 𐴃𐴝𐴌𐴥𐴞𐴑 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴃 𐴔𐴝𐴎𐴠 𐴘𐴥𐴡 , 𐴔𐴡𐴀𐴟 𐴁𐴝𐴚 𐴐𐴤𐴡𐴀𐴡𐴌𐴡𐴌 𐴀𐴥𐴡𐴑 𐴋𐴤𐴟𐴚 𐴉𐴝𐴌𐴝𐴌 𐴈𐴝𐴣𐴏𐴥𐴠 , 𐴄𐴤𐴟𐴀𐴟 𐴈𐴥𐴝𐴓𐴡𐴌 𐴁𐴤𐴟𐴃𐴡𐴌𐴠 𐴐𐴤𐴡𐴔 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕 𐴐𐴤𐴡𐴣𐴀𐴡 𐴴 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

Sources : RFA