𐴉𐴥𐴞𐴃𐴞𐴕 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴒𐴟𐴓𐴞 𐴔𐴝𐴌𐴞 𐴊𐴟𐴘 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔 𐴀𐴞𐴌𐴝𐴕𐴞 𐴉𐴝𐴀𐴝𐴌𐴡𐴃 𐴉𐴥𐴞𐴃𐴞𐴕 𐴀𐴥𐴡 , 𐴀𐴝𐴃𐴡𐴚𐴁𐴝𐴊𐴞 𐴀𐴡𐴉𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴠 𐴒𐴟𐴓𐴞 𐴒𐴡𐴌𐴥𐴞 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠, 𐴁𐴞𐴐𐴤𐴞𐴃 𐴁𐴝𐴌𐴠 𐴒𐴡𐴀𐴡𐴙𐴕 𐴌𐴝𐴙𐴃𐴧𐴝 𐴐𐴤𐴝𐴀𐴝𐴌𐴡 𐴃𐴞𐴕 𐴁𐴝𐴎𐴠 𐴀𐴡𐴕𐴟𐴔𐴝𐴕𐴞𐴑 𐴱𐴱

𐴷 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴔𐴦𐴠𐴙𐴕 𐴁𐴡𐴓𐴡𐴑 𐴏𐴞 , 𐴏𐴥𐴝𐴁𐴢 𐴁𐴡𐴓𐴡𐴑-𐴀𐴠𐴙𐴆/𐴶 𐴷 , 𐴀𐴠 𐴀𐴠𐴓𐴝𐴑𐴝𐴃 𐴔𐴡𐴌𐴝𐴌 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴀𐴥𐴡𐴘𐴧𐴠𐴊𐴠 , 𐴒𐴟𐴓𐴞 𐴒𐴡𐴌𐴥𐴞 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 , 𐴀𐴥𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴈𐴥𐴝𐴄𐴞 𐴁𐴡𐴓𐴞 , 𐴴 𐴱 𐴓𐴡𐴔𐴁𐴤𐴡𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴀𐴠 𐴋𐴞 𐴀𐴝𐴘 𐴅𐴞 / 𐴏𐴡𐴘𐴧𐴡𐴊 𐴇𐴝𐴌𐴟𐴕 𐴌𐴡𐴐𐴇𐴞𐴊𐴠 𐴈𐴡𐴘𐴧𐴠 𐴱𐴱

𐴐𐴡𐴇𐴞𐴊 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 , 𐴷 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 𐴑𐴠𐴉𐴝𐴘𐴡𐴃𐴟𐴓𐴧𐴝𐴇𐴌 𐴉𐴟𐴖𐴝 / 𐴀𐴝𐴘𐴡𐴃𐴟𐴓𐴧𐴝𐴇 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌 𐴀𐴝𐴌 𐴔𐴟𐴇𐴝𐴔𐴧𐴡𐴊 𐴑𐴝𐴏𐴞𐴔𐴡𐴌 𐴉𐴟𐴖𐴝 / 𐴘𐴝𐴏𐴦𐴞𐴕 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 𐴱𐴱

𐴀𐴠 𐴋𐴞 𐴀𐴝𐴘 𐴅𐴞 / 𐴏𐴡𐴘𐴧𐴡𐴊 𐴇𐴝𐴌𐴟𐴕 𐴌𐴡𐴐𐴞𐴊𐴠 𐴈𐴡𐴘𐴧𐴠𐴊𐴠 , 𐴁𐴞𐴐𐴤𐴞𐴃 𐴁𐴝𐴌𐴠 𐴒𐴡𐴀𐴡𐴙𐴕 𐴌𐴝𐴙𐴃𐴧𐴝 𐴀𐴞𐴌𐴝𐴕𐴞 𐴉𐴝𐴀𐴝𐴌𐴡𐴃 , 𐴁𐴠𐴕𐴝𐴔𐴞 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴀𐴡𐴏𐴞𐴕𐴧𐴡 𐴔𐴝𐴙𐴕𐴐𐴡𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴀𐴝𐴀𐴝𐴘 , 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴒𐴟𐴓𐴞 𐴔𐴝𐴌𐴞 𐴐𐴡𐴇𐴞𐴊 𐴒𐴡𐴌𐴥𐴞 𐴊𐴤𐴝𐴘 𐴒𐴞𐴘𐴠 𐴒𐴤𐴡𐴘 𐴱𐴱

𐴘𐴝𐴏𐴦𐴞𐴕 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴒𐴟𐴓𐴞 𐴈𐴥𐴝𐴘 𐴀𐴥𐴡𐴊𐴡𐴃 𐴔𐴡𐴌𐴞𐴒𐴞𐴘𐴡𐴘, 𐴒𐴟𐴓𐴞 𐴈𐴥𐴝𐴘𐴧𐴝 𐴊𐴟𐴘𐴀𐴡𐴔 𐴎𐴡𐴕 𐴀𐴝𐴘𐴡𐴃𐴟𐴓𐴧𐴝𐴇𐴌𐴠,𐴓𐴡𐴖𐴧𐴠 𐴃𐴡𐴖𐴧𐴠 𐴀𐴝𐴊𐴤𐴝 𐴉𐴡𐴌𐴝𐴙𐴕𐴧𐴝 𐴀𐴟𐴑𐴤𐴞𐴘𐴝𐴌 𐴀𐴠𐴔 𐴀𐴠𐴏𐴢 𐴀𐴠𐴉𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴕𐴞𐴘𐴠 , 𐴋𐴞𐴘𐴟𐴄𐴞𐴃 𐴀𐴝𐴏𐴥𐴠𐴊𐴠 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴠 𐴔𐴟𐴀𐴝𐴘𐴕𐴝 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴦𐴝𐴊𐴠 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴔𐴡𐴌𐴝𐴌 𐴒𐴤𐴡𐴄𐴡𐴕𐴝 𐴑𐴠𐴀𐴠𐴕𐴠 𐴀𐴝𐴌 𐴈𐴡𐴕 𐴃𐴝𐴌𐴝𐴌 𐴎𐴡𐴌𐴞𐴘𐴝 𐴒𐴤𐴡𐴄𐴡𐴕𐴝 𐴒𐴤𐴡𐴄𐴞𐴓𐴥𐴡𐴊𐴠 , 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴎𐴝𐴕𐴝𐴀𐴝 𐴕𐴥𐴡 𐴎𐴝𐴀𐴝 𐴁𐴡𐴓𐴞 𐴈𐴡𐴘𐴧𐴠 , 𐴒𐴤𐴡𐴄𐴡𐴕𐴝𐴌 𐴉𐴡𐴌 𐴀𐴥𐴡𐴘𐴃𐴠 𐴑𐴠𐴀𐴠𐴔𐴡𐴃 𐴉𐴝𐴌𐴝 𐴊𐴝𐴌𐴞 𐴁𐴦𐴠𐴐𐴢 𐴒𐴡𐴌𐴥𐴞 𐴊𐴞𐴘𐴠 𐴀𐴝𐴌 𐴀𐴠 𐴂𐴞 𐴁𐴞 𐴀𐴠𐴕𐴠 𐴑𐴤𐴟𐴕𐴞 𐴀𐴝𐴐𐴤𐴝𐴔𐴞 𐴀𐴥𐴡𐴑𐴧𐴡𐴓 𐴊𐴤𐴡𐴌𐴞𐴁𐴝𐴌 𐴑𐴝𐴌𐴖𐴝𐴘 𐴏𐴝𐴓𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : Ukhiyanews.com