𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴀𐴝𐴏𐴞𐴘𐴠𐴕𐴠 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝𐴃 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴡 𐴱𐴱

𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴃 𐴀𐴝𐴏𐴞𐴘𐴠𐴕 𐴕𐴠𐴃𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚 𐴀𐴥𐴡𐴘𐴁𐴝𐴌 𐴀𐴝𐴏𐴥𐴠𐴊𐴠, 𐴔𐴞𐴄𐴤𐴞𐴚 𐴀𐴥𐴞𐴁𐴝𐴌 𐴀𐴝𐴒𐴠 , 𐴀𐴝𐴘𐴧𐴠𐴌𐴊𐴧𐴠 𐴷 𐴲 𐴃𐴝𐴌𐴥𐴞𐴑 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴃 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 , 𐴀𐴝𐴏𐴞𐴘𐴠𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴠 , 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴅𐴝𐴑𐴝𐴌𐴝𐴃𐴝 𐴐𐴤𐴡𐴀𐴡𐴌𐴡𐴃 , 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝𐴃 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴡 𐴱𐴱

𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴓𐴧𐴝 , 𐴒𐴠𐴓𐴊𐴠 𐴱 𐴲 𐴰 𐴲 𐴀𐴠𐴂𐴌𐴞𐴓 𐴔𐴝𐴐𐴡𐴃 , 𐴁𐴠𐴒𐴧𐴤𐴟𐴕 𐴌𐴝𐴎𐴞 𐴀𐴥𐴡𐴘𐴧𐴡𐴌𐴠 𐴵 𐴉𐴝𐴣𐴏𐴧𐴥𐴝𐴕 𐴐𐴡𐴌𐴥𐴡𐴃 𐴉𐴥𐴟𐴕𐴝𐴘 𐴊𐴞𐴀𐴞𐴓 , 𐴀𐴠 𐴐𐴡𐴌𐴡𐴃 𐴀𐴞𐴀𐴞𐴕𐴡𐴌 𐴁𐴤𐴟𐴃𐴡𐴌𐴠 , 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴈𐴥𐴡𐴃𐴡𐴔 𐴒𐴡𐴌𐴡𐴀𐴡𐴕 , 𐴔𐴟𐴃𐴦𐴝𐴓𐴧𐴠𐴑𐴝 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕 𐴓𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴡𐴀𐴡𐴕 , 𐴐𐴡𐴌𐴥𐴡𐴃 𐴀𐴠 𐴊𐴟𐴕𐴥𐴞 𐴘𐴝𐴀𐴝𐴕 𐴀𐴥𐴡 𐴀𐴝𐴐𐴧𐴞𐴀𐴞𐴓 𐴱𐴱

𐴃𐴤𐴝𐴑𐴞𐴓𐴠 𐴘𐴥𐴡 , 𐴊𐴠𐴌 𐴁𐴡𐴏𐴥𐴡𐴌 𐴉𐴥𐴟𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴟𐴊𐴧𐴝 , 𐴀𐴞𐴀𐴞𐴕 𐴔𐴡𐴎𐴞𐴕 𐴀𐴝𐴔𐴡𐴓 𐴕𐴡 𐴒𐴡𐴌𐴠𐴀𐴠𐴌 𐴁𐴡𐴓𐴞 , 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴀𐴝𐴌 𐴑𐴠𐴙𐴏𐴧𐴟 𐴀𐴝𐴏𐴞𐴘𐴠𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓𐴠 𐴈𐴡𐴀𐴡𐴌 , 𐴀𐴝𐴏𐴞𐴘𐴠𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 , 𐴈𐴥𐴝𐴔𐴝𐴈𐴥𐴝 𐴔𐴡𐴎𐴁𐴟𐴃𐴞𐴌 𐴏𐴥𐴝𐴣𐴀𐴝𐴊𐴠 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴁𐴟𐴎𐴠𐴀𐴠𐴌 𐴊𐴠 , 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 ! 𐴀𐴝𐴒𐴠 𐴊𐴞𐴘𐴝 𐴒𐴞𐴀𐴞𐴓𐴊𐴠 𐴌𐴝𐴎𐴞𐴕𐴝𐴔𐴝 𐴐𐴡𐴌𐴥𐴡𐴃 𐴀𐴞𐴀𐴞𐴕𐴡𐴌 𐴎𐴝𐴒𐴝𐴃 , 𐴉𐴥𐴞𐴃𐴞𐴕 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 , 𐴁𐴦𐴠𐴐𐴢 𐴒𐴡𐴌𐴥𐴞 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴘𐴥𐴡 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴝𐴎𐴞𐴕𐴝𐴔𐴝 𐴐𐴡𐴌𐴥𐴡𐴃 𐴔𐴡𐴎𐴞𐴕 𐴀𐴝𐴔𐴥𐴡𐴓 𐴕𐴡 𐴒𐴡𐴌𐴥𐴞 𐴉𐴥𐴠𐴓𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴘𐴝𐴀𐴝𐴕𐴡𐴃 𐴁𐴠𐴐𐴤𐴞 𐴀𐴡𐴐𐴤𐴝𐴕 𐴃𐴞 𐴓𐴝𐴒𐴠𐴀𐴠𐴌 𐴁𐴡𐴓𐴞 𐴈𐴡𐴘𐴧𐴠 , 𐴀𐴝𐴏𐴞𐴘𐴠𐴕 𐴀𐴥𐴞𐴏𐴝𐴉𐴠 𐴋𐴦𐴝𐴌𐴥𐴞𐴑 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴕𐴡𐴔𐴝𐴙𐴕𐴊𐴝 𐴓𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴡𐴓𐴧𐴝 , 𐴉𐴞𐴓𐴞𐴂𐴞𐴕𐴡𐴌 𐴕𐴟𐴖𐴝 𐴌𐴝𐴎𐴝 / 𐴉𐴝𐴋𐴞𐴕𐴠𐴕 𐴔𐴥𐴝𐴑𐴟𐴏𐴢 𐴅𐴤𐴙𐴟𐴕𐴞𐴘𐴝 𐴘𐴠 𐴈𐴡𐴘𐴧𐴠 , 𐴀𐴝𐴘𐴧𐴠𐴌𐴊𐴧𐴠 𐴕𐴡𐴖𐴡𐴔𐴁𐴡𐴌𐴡𐴃 𐴀𐴥𐴡𐴘𐴁𐴡𐴊𐴠 𐴀𐴝𐴏𐴞𐴘𐴠𐴕𐴡𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚𐴡𐴃 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴌𐴠 𐴇𐴥𐴝𐴎𐴞𐴌 𐴀𐴥𐴡𐴘𐴁𐴝𐴌 𐴀𐴠𐴅𐴝𐴎𐴡𐴃 𐴕𐴡𐴀𐴡 𐴊𐴠𐴀𐴠 𐴱𐴱

Sources : RFAburmese