𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴊𐴤𐴡𐴌𐴔𐴡 𐴌𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴔𐴟𐴏𐴡𐴓𐴔𐴝𐴕 𐴀𐴠𐴕𐴑𐴠𐴓𐴝𐴁𐴞 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴊𐴤𐴡𐴌𐴔𐴡 𐴌𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞 𐴏𐴥𐴞𐴘𐴝𐴏𐴡𐴃 𐴒𐴡𐴌𐴠𐴀𐴠𐴌 𐴁𐴡𐴓𐴞 , 𐴁𐴡𐴔𐴝 𐴔𐴟𐴏𐴓𐴞𐴔 𐴀𐴠𐴕𐴑𐴠𐴓𐴝𐴁𐴞 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 , 𐴒𐴡𐴃𐴡 𐴈𐴝𐴓𐴞𐴘𐴝 𐴆𐴤𐴙𐴝𐴙𐴑 𐴄𐴤𐴞 𐴌𐴥𐴟 𐴉𐴝𐴀𐴝𐴌𐴡𐴌 𐴕𐴞𐴏𐴠 , 𐴂𐴝𐴂𐴓𐴞𐴑 𐴃𐴞𐴕 𐴎𐴡𐴕 𐴔𐴡𐴙𐴅𐴧𐴤𐴙𐴠𐴊𐴠 𐴀𐴞𐴀𐴞𐴕 , 𐴊𐴠𐴐𐴡𐴙𐴃𐴧𐴝 𐴂𐴞 𐴋𐴞 𐴀𐴠𐴉𐴢 𐴉𐴦𐴝𐴄𐴞𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴀𐴝𐴙𐴅𐴧𐴙𐴝 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴂𐴞𐴕𐴧𐴥𐴠 𐴒𐴤𐴟𐴕 𐴀𐴝𐴌𐴑𐴝𐴕 𐴅𐴝𐴔𐴠 𐴔𐴡𐴏𐴥𐴡𐴙𐴃𐴠 𐴘𐴥𐴡 , 𐴔𐴝𐴕𐴥𐴟𐴙𐴐𐴢 𐴔𐴡𐴌𐴝𐴌 𐴀𐴠𐴓𐴎𐴝𐴔 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 , 𐴂𐴞 𐴋𐴞 𐴀𐴠𐴉𐴡𐴌 𐴖𐴡𐴌𐴠 𐴉𐴥𐴠𐴓𐴝𐴘 𐴊𐴞𐴘𐴠𐴊𐴠 𐴘𐴝𐴀𐴝𐴕𐴡𐴌 𐴇𐴥𐴠𐴔𐴝𐴘𐴡𐴃 𐴒𐴡𐴙𐴅𐴧𐴤𐴙𐴠 , 𐴀𐴥𐴠𐴕𐴋𐴞𐴓𐴧𐴝 𐴇𐴥𐴠𐴔𐴝𐴘𐴡𐴃𐴞 𐴁𐴡𐴕𐴡𐴀𐴡𐴕𐴡𐴃 , 𐴁𐴡𐴔𐴝 𐴔𐴟𐴏𐴓𐴞𐴔𐴡𐴌 𐴌𐴝𐴘 𐴕𐴡𐴎𐴡𐴌𐴞𐴘𐴝 𐴒𐴡𐴓𐴡𐴃 𐴁𐴡𐴓𐴞 𐴈𐴡𐴀𐴡𐴕 𐴉𐴝𐴀𐴝𐴕 𐴀𐴥𐴡𐴘𐴁𐴡 𐴁𐴡𐴓𐴞 , 𐴁𐴡𐴔𐴝 𐴔𐴟𐴏𐴓𐴞𐴔 𐴀𐴠𐴕𐴑𐴠𐴓𐴝𐴁𐴞 𐴃𐴡𐴕𐴎𐴞𐴔𐴡𐴌 𐴔𐴞𐴔𐴁𐴤𐴡𐴌 𐴔𐴡𐴏𐴥𐴡𐴙𐴃𐴡𐴌 𐴀𐴞𐴔𐴝𐴔 / 𐴑𐴟 𐴏𐴥𐴟 𐴕𐴠 𐴀𐴥𐴟 𐴘𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴒𐴡𐴌𐴠𐴀𐴠𐴌 𐴊𐴠 𐴔𐴦𐴝𐴔𐴠𐴓𐴝 𐴌𐴥𐴠 𐴔𐴟𐴏𐴡𐴓𐴔𐴝𐴕𐴠 𐴀𐴥𐴟𐴊𐴧𐴝 𐴁𐴠𐴌𐴟𐴊𐴧𐴤𐴞𐴃𐴤𐴝 𐴒𐴡𐴌𐴥𐴞 𐴉𐴝𐴌𐴠𐴀𐴠𐴌 𐴁𐴡𐴓𐴞 𐴈𐴡𐴀𐴡𐴘 , 𐴂𐴞 𐴋𐴞 𐴀𐴠𐴉𐴡𐴌 𐴕𐴝𐴔 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴁𐴡𐴓𐴧𐴝 𐴀𐴠𐴕𐴋𐴞𐴓𐴧𐴝 𐴒𐴡𐴌𐴠𐴀𐴠𐴌 𐴊𐴠 , 𐴀𐴝𐴣𐴀𐴝𐴌𐴝 𐴁𐴠𐴌𐴟𐴊𐴧𐴤𐴞𐴃𐴤𐴝 𐴒𐴡𐴌𐴞𐴀𐴞𐴌 , 𐴁𐴡𐴊𐴡𐴓𐴝 𐴓𐴡𐴘𐴁𐴝𐴌 𐴀𐴟𐴉𐴡𐴎𐴟𐴑𐴃𐴡 𐴌𐴥𐴠 𐴁𐴡𐴊𐴡𐴓𐴝 𐴓𐴡𐴘𐴧𐴟𐴔 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴀𐴥𐴡𐴑𐴧𐴡𐴓 𐴊𐴤𐴡𐴌𐴔𐴡 𐴔𐴞𐴓𐴝𐴘 𐴉𐴦𐴝𐴄𐴞 𐴁𐴝𐴕𐴝𐴘 𐴀𐴡𐴊𐴤𐴞𐴑𐴝𐴌𐴞 𐴁𐴝𐴕𐴝𐴘 , 𐴔𐴝𐴙𐴕𐴧𐴝 𐴒𐴡𐴙𐴕𐴧𐴝 𐴔𐴟𐴏𐴡𐴓𐴔𐴝𐴕𐴡𐴌 𐴔𐴡𐴏𐴥𐴡𐴙𐴃 𐴀𐴥𐴡𐴑𐴧𐴡𐴓𐴡𐴌𐴠 𐴘𐴥𐴡 ,𐴀𐴥𐴠 𐴉𐴦𐴝𐴄𐴞𐴃 𐴒𐴤𐴡𐴓𐴝𐴘 𐴌𐴝𐴙𐴑𐴧𐴤𐴙𐴠 , 𐴂𐴞𐴕𐴧𐴥𐴠 𐴒𐴤𐴟𐴕 𐴀𐴝𐴌𐴑𐴝𐴕𐴞 𐴔𐴡𐴏𐴥𐴡𐴙𐴃𐴡𐴌 𐴎𐴞𐴔𐴧𐴝𐴊𐴝𐴌 𐴔𐴟𐴃𐴡𐴖𐴡𐴓𐴧𐴞 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴁𐴤𐴝𐴓𐴝 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴁𐴡𐴓𐴞 / 𐴑𐴟 𐴏𐴥𐴟 𐴕𐴠 𐴀𐴥𐴟 𐴘𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞𐴌 𐴏𐴥𐴝𐴙𐴋 𐴓𐴡𐴘 𐴃𐴤𐴝𐴑𐴡𐴀𐴡𐴕𐴧𐴝𐴕 𐴀𐴞𐴏𐴓𐴝𐴔 𐴊𐴤𐴡𐴌𐴔𐴡 𐴔𐴡𐴎𐴞𐴕 𐴅𐴝𐴀𐴠𐴎 𐴕𐴥𐴝𐴘 𐴁𐴡𐴓𐴞 𐴘𐴥𐴡 𐴁𐴡𐴔𐴝 𐴔𐴟𐴏𐴓𐴞𐴔 𐴀𐴠𐴕𐴑𐴠𐴓𐴝𐴁𐴞 𐴉𐴦𐴝𐴄𐴞 𐴘𐴠 𐴈𐴡𐴘𐴧𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴀𐴥𐴡 𐴑𐴟𐴀𐴟𐴂𐴑𐴝𐴌𐴞𐴌 𐴁𐴠𐴌𐴟𐴊𐴧𐴤𐴠 𐴇𐴥𐴡𐴌𐴑𐴡𐴃𐴡𐴃 𐴐𐴦𐴝𐴔𐴞𐴓 𐴀𐴝𐴐𐴧𐴤𐴞𐴀𐴞𐴓 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴹 𐴶 𐴎𐴡𐴕 𐴓𐴡𐴃𐴞 𐴔𐴟𐴏𐴡𐴓𐴔𐴝𐴕 𐴔𐴡𐴙𐴅𐴧𐴤𐴙𐴠 , 𐴀𐴝𐴌 𐴁𐴡𐴀𐴡𐴃 𐴔𐴟𐴏𐴡𐴓𐴔𐴝𐴕 𐴎𐴞𐴘𐴡𐴓𐴡𐴃 𐴁𐴡𐴕 𐴀𐴝𐴏𐴥𐴠 , 𐴀𐴝𐴌 𐴁𐴡𐴀𐴡𐴃 𐴀𐴞𐴏𐴓𐴝𐴔𐴞 𐴊𐴤𐴡𐴌𐴔𐴡 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴁𐴝𐴚𐴞 𐴏𐴟𐴌𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱𐴱

Sources : RFAburmese