𐴔𐴡𐴗𐴚𐴋𐴤𐴟𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴓𐴝𐴌𐴥𐴝𐴘𐴃 𐴒𐴟𐴓 𐴉𐴡𐴌𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴗𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴰 𐴱 𐴃𐴝𐴌𐴥𐴞𐴑 𐴀𐴡𐴑𐴄𐴟𐴁𐴡𐴌 𐴐𐴤𐴡𐴔 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝 𐴑𐴟𐴀𐴟𐴛𐴌 𐴈𐴥𐴝𐴓𐴞𐴃, 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴊𐴡𐴌𐴥𐴡 𐴔𐴡𐴌𐴥𐴡 𐴓𐴝𐴌𐴥𐴝𐴘 𐴀𐴥𐴡𐴘𐴧𐴠, 𐴀𐴥𐴠 𐴓𐴝𐴌𐴥𐴝𐴘𐴃/𐴈𐴝𐴘𐴌𐴟𐴓𐴧𐴝𐴇𐴌 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴝𐴃𐴤𐴝𐴃 𐴒𐴟𐴓𐴞 𐴉𐴡𐴌𐴞 𐴔𐴡𐴌𐴞 𐴒𐴞𐴘𐴡𐴘𐴱𐴱

𐴓𐴡𐴒𐴢𐴁𐴤𐴡𐴒𐴢 𐴌𐴝𐴙𐴃𐴡𐴌𐴲 𐴁𐴝𐴎𐴠 𐴓𐴡𐴃𐴞 𐴁𐴞𐴀𐴞𐴕𐴧𐴝 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴝𐴌𐴝 𐴋𐴡𐴣𐴀𐴡𐴌 𐴀𐴝𐴌 𐴐𐴤𐴡𐴣𐴍𐴡 𐴀𐴥𐴝𐴣𐴃𐴞𐴘𐴝𐴌𐴡𐴌 𐴀𐴝𐴁𐴝𐴏𐴢 𐴀𐴥𐴡𐴑𐴧𐴡𐴓 𐴉𐴥𐴟𐴕𐴝𐴃 𐴀𐴝𐴏𐴥𐴞 , 𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴟𐴌𐴝 𐴔𐴞𐴑𐴧𐴤𐴙𐴝 𐴀𐴟𐴒𐴧𐴤𐴗𐴝 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠 , 𐴀𐴠𐴑 𐴎𐴡𐴕 𐴑𐴠𐴀𐴠𐴔 𐴑𐴡𐴔𐴦𐴝𐴕𐴋𐴝𐴌 𐴐𐴤𐴡𐴣𐴀𐴡 𐴈𐴡𐴀𐴠𐴑 𐴎𐴡𐴕 𐴉𐴟𐴓𐴞𐴐𐴢 𐴀𐴥𐴡 𐴎𐴞𐴛𐴝𐴃𐴝 𐴊𐴤𐴡𐴌𐴞 𐴓𐴡𐴘 𐴒𐴞𐴘𐴡𐴘 𐴱𐴱

𐴉𐴟𐴌𐴟𐴏𐴧𐴝𐴁 𐴁𐴞𐴏𐴃𐴝𐴌𐴞𐴃𐴡 𐴁𐴤𐴝𐴉𐴠 𐴕𐴡 𐴎𐴝𐴕𐴞𐴀𐴞 𐴁𐴡𐴓𐴞 , 𐴔𐴡𐴗𐴚𐴋𐴤𐴟𐴃𐴧𐴟 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴇𐴥𐴡𐴑𐴟𐴔𐴡𐴃𐴡𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴠𐴈𐴥𐴡𐴕 𐴀𐴠𐴈𐴥𐴡𐴕 𐴉𐴝𐴀𐴝𐴌𐴡𐴌 𐴈𐴝𐴣𐴏𐴥𐴠 𐴈𐴝𐴣𐴏𐴥𐴠 𐴋𐴡𐴣𐴀𐴡𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴠𐴀𐴠𐴌 𐴁𐴡𐴓𐴞 𐴘𐴥𐴡 , 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴒𐴟𐴓𐴞 𐴔𐴝𐴌𐴝 𐴎𐴝𐴌𐴞 𐴀𐴝𐴏𐴥𐴠, 𐴀𐴥𐴠𐴃𐴡𐴓𐴧𐴝 𐴀𐴡𐴙𐴕𐴧𐴡 𐴈𐴡𐴕𐴥𐴡 𐴑𐴞𐴏𐴞𐴔𐴧𐴝 𐴓𐴟𐴏𐴧𐴝𐴕𐴡𐴌 𐴁𐴝𐴁𐴡𐴃𐴠 𐴈𐴥𐴡𐴁𐴡𐴌 𐴕𐴡 𐴎𐴝𐴕𐴞𐴀𐴞 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴠 𐴀𐴠 , 𐴊𐴟𐴕𐴥𐴞 𐴉𐴝𐴄𐴞 𐴘𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴌𐴥𐴠 𐴓𐴝𐴌𐴥𐴝𐴘𐴌 𐴔𐴡𐴘𐴊𐴝𐴕 𐴁𐴝𐴕𐴝𐴘 , 𐴔𐴝𐴀𐴝𐴙𐴕 𐴁𐴟𐴔 𐴀𐴥𐴡𐴑𐴧𐴡𐴓 𐴊𐴟𐴕𐴥𐴞 𐴋𐴝𐴀𐴝𐴘𐴧𐴠 𐴒𐴝𐴣𐴌𐴠𐴀𐴠𐴌 𐴱𐴱

𐴑𐴠𐴏𐴧𐴟 𐴊𐴞𐴕 𐴀𐴝𐴒𐴠 𐴘𐴥𐴡 𐴔𐴡𐴗𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴉𐴝𐴌𐴝 𐴀𐴠𐴑𐴧𐴤𐴝𐴕 𐴓𐴡𐴘 𐴁𐴝𐴎𐴤𐴝𐴘 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 , 𐴁𐴤𐴟𐴏𐴞𐴊𐴡𐴚𐴡𐴌 𐴊𐴡𐴀𐴡𐴙𐴕𐴠 𐴒𐴟𐴊𐴝𐴔 𐴉𐴝𐴌𐴝𐴃 𐴔𐴝𐴎𐴤𐴠 𐴘𐴥𐴡 , 𐴋𐴡𐴣𐴀𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴠𐴓𐴡𐴔𐴊𐴝𐴌 𐴀𐴠𐴑 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴀𐴝𐴌 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴀𐴥𐴡 𐴁𐴤𐴝𐴚𐴞 𐴏𐴟𐴌𐴞 𐴓𐴟𐴏𐴧𐴝𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱𐴱

Sources : Rohingyakhbor