𐴔𐴡𐴒𐴢 𐴁𐴝𐴒𐴞 𐴀𐴠 𐴀𐴠 𐴘𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴔𐴝𐴐𐴄𐴡𐴌𐴡𐴌 𐴁𐴡𐴖𐴧𐴡𐴌 𐴁𐴞𐴋𐴞𐴘𐴟 𐴉𐴥𐴝𐴙𐴓𐴡𐴌 𐴖𐴡𐴌𐴠 𐴎𐴝𐴕𐴡𐴌 𐴈𐴥𐴡𐴃𐴡𐴌𐴝𐴌 𐴊𐴤𐴡𐴔𐴑𐴞 𐴱𐴱

𐴲 𐴲 𐴰 𐴲 𐴐𐴤𐴡𐴕 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴟𐴓𐴞 𐴔𐴝𐴌𐴞 , 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴒𐴟𐴊𐴝𐴔 𐴉𐴝𐴌𐴝𐴌 𐴄𐴙𐴟𐴐𐴤𐴞𐴕 𐴉𐴡𐴌𐴥𐴝𐴊𐴠 𐴔𐴝𐴐𐴄𐴡𐴌 / 𐴐𐴠𐴙𐴑𐴟𐴓 𐴀𐴞𐴏𐴓𐴝𐴔𐴡𐴌 𐴁𐴡𐴖𐴧𐴠 𐴕𐴞𐴎𐴡𐴌 𐴀𐴝𐴁𐴝𐴏𐴢 𐴓𐴡𐴘 𐴉𐴟𐴌𐴝 𐴒𐴤𐴡𐴄𐴡𐴕𐴝𐴌 𐴇𐴥𐴝𐴑𐴞𐴑𐴡𐴃 𐴁𐴡𐴘𐴝𐴕 𐴒𐴡𐴌𐴥𐴞 𐴁𐴞𐴋𐴞𐴘𐴟 𐴉𐴥𐴝𐴙𐴓 𐴁𐴝𐴕𐴝𐴘𐴧𐴠𐴊𐴠 𐴱𐴱

𐴘𐴝𐴀𐴝𐴕𐴡𐴌 𐴖𐴡𐴌𐴠 𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞𐴌 𐴈𐴡𐴏𐴥𐴟𐴌𐴞 𐴏𐴥𐴝𐴁𐴟𐴃 𐴀𐴥𐴡𐴘 𐴀𐴝𐴘𐴧𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴔𐴝𐴐𐴄𐴡𐴌 𐴐𐴠𐴙𐴑𐴟𐴓 𐴀𐴞𐴏𐴓𐴝𐴔𐴡𐴌 𐴁𐴡𐴖𐴧𐴡𐴌𐴠 , 𐴎𐴝𐴕𐴠 𐴔𐴝𐴌𐴞 𐴉𐴥𐴠𐴓𐴝𐴘𐴁𐴡 𐴁𐴡𐴓𐴞 𐴔𐴡𐴒𐴢 𐴁𐴝𐴒𐴞 𐴀𐴠 𐴀𐴠 𐴘𐴠 𐴊𐴤𐴡𐴔𐴑𐴞 𐴊𐴞𐴘𐴠 𐴀𐴝𐴌 𐴊𐴠𐴀𐴠𐴌 𐴁𐴡𐴓𐴞 𐴁𐴠𐴐𐴤𐴞 𐴈𐴝𐴣𐴏𐴡𐴌 𐴔𐴝𐴙𐴕𐴐𐴙𐴠 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴎𐴝𐴕𐴝𐴀𐴝 𐴒𐴞𐴘𐴠 𐴱𐴱

𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴀𐴠𐴕𐴋𐴞𐴓𐴧𐴝 𐴔𐴦𐴝𐴔𐴠𐴓𐴝 𐴒𐴡𐴌𐴥𐴞 𐴎𐴝𐴀𐴝𐴌𐴊𐴧𐴠 𐴀𐴥𐴡𐴘𐴓𐴠 , 𐴀𐴥𐴞𐴃𐴝𐴌𐴝 𐴁𐴠𐴐𐴤𐴞 𐴋𐴡𐴣𐴀𐴡𐴌 𐴈𐴡𐴏𐴟𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴁𐴟𐴎𐴠𐴀𐴠𐴌 , 𐴀𐴥𐴞𐴃𐴡𐴓𐴧𐴝 𐴕𐴞𐴎𐴡𐴌 𐴈𐴡𐴏𐴟𐴌𐴥𐴞 𐴓𐴟𐴖𐴝𐴘 𐴁𐴤𐴟𐴎𐴝𐴘 𐴉𐴥𐴠𐴓𐴝𐴘 𐴁𐴡𐴓𐴧𐴝 𐴎𐴡𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴠𐴕𐴋𐴞𐴓𐴧𐴝 𐴒𐴡𐴌𐴠𐴀𐴠𐴌 𐴈𐴡𐴘𐴓𐴠 𐴃𐴦𐴡 , 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴠𐴑𐴧𐴤𐴝𐴕 𐴒𐴝𐴙𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴎𐴟𐴓𐴟𐴔 𐴀𐴥𐴡𐴘𐴁𐴡 𐴱𐴱

𐴀𐴝𐴌 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴕𐴞𐴎𐴡𐴌 𐴊𐴠𐴐𐴡𐴃 𐴈𐴡𐴔𐴐𐴤𐴡𐴙𐴚𐴒𐴙𐴝 𐴀𐴥𐴞𐴏𐴝𐴉𐴠 𐴎𐴞𐴕𐴊𐴞𐴒𐴞 𐴈𐴝𐴍𐴝𐴀𐴝𐴌𐴊𐴧𐴠 𐴐𐴤𐴝𐴕𐴃𐴞 𐴏𐴡𐴀𐴡𐴙𐴕𐴧𐴝 , 𐴀𐴞𐴏𐴓𐴝𐴔 𐴊𐴤𐴡𐴌𐴔𐴡 𐴔𐴝𐴕𐴡𐴀𐴡𐴙𐴕𐴧𐴝 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 , 𐴓𐴝𐴌𐴥𐴝𐴘𐴌 𐴔𐴡𐴘𐴊𐴝𐴕𐴡𐴃 𐴄𐴝𐴕𐴞𐴀𐴞 𐴀𐴝𐴙𐴕𐴧𐴥𐴙𐴠 𐴉𐴝𐴀𐴝𐴕 𐴀𐴥𐴡𐴘𐴁𐴡 𐴁𐴡𐴓𐴞 𐴁𐴟𐴎𐴤𐴝 𐴎𐴝𐴀𐴝𐴌 𐴱𐴱

𐴔𐴟𐴃𐴦𐴝𐴓𐴧𐴠𐴑𐴝 𐴇𐴥𐴡𐴑𐴟𐴔𐴡𐴃𐴡𐴌 𐴔𐴝𐴙𐴕𐴐𐴡𐴌𐴃𐴧𐴟 𐴔𐴝𐴘𐴧𐴝 𐴀𐴞𐴁𐴤𐴝𐴌𐴠 𐴕𐴞𐴌𐴝𐴉𐴡𐴃𐴧𐴝 𐴀𐴡𐴣𐴀𐴡𐴏𐴥𐴝 𐴊𐴡𐴀𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 , 𐴀𐴡𐴓𐴉𐴡 𐴐𐴤𐴡𐴔𐴡𐴌 𐴁𐴤𐴟𐴃𐴡𐴌𐴠 𐴁𐴝𐴉𐴢 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴉𐴝𐴣𐴏𐴧𐴥𐴗𐴝 𐴉𐴟𐴖𐴝𐴌 𐴔𐴝𐴣 𐴌𐴥𐴠 , 𐴀𐴠𐴕𐴋𐴞𐴓𐴧𐴝 𐴎𐴝𐴕𐴠 𐴔𐴝𐴌𐴞 𐴉𐴥𐴠𐴓𐴝𐴘𐴁𐴡 𐴁𐴡𐴓𐴞 𐴈𐴡𐴘𐴓𐴠 , 𐴈𐴡𐴕𐴥 𐴡 𐴀𐴡𐴑𐴃𐴤𐴠 𐴕𐴡 𐴀𐴥𐴟𐴖𐴝 𐴉𐴡𐴌𐴠 𐴊𐴠 𐴔𐴦𐴝𐴔𐴠𐴓𐴝 𐴀𐴠𐴑𐴧𐴤𐴝𐴕 𐴀𐴥𐴡𐴘𐴁𐴡 𐴊𐴠 𐴱𐴱