𐴈𐴥𐴡𐴌𐴝𐴁 𐴔𐴝𐴙𐴕𐴐𐴤𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴑𐴞𐴋𐴕𐴝𐴂𐴢 𐴒𐴡𐴌𐴥𐴞 𐴑𐴤𐴟𐴁 𐴁𐴠𐴐𐴤𐴞 𐴌𐴠𐴇𐴥𐴝𐴘 𐴄𐴞𐴛𐴝 𐴔𐴝𐴒𐴠𐴀𐴠𐴌 𐴱𐴱

𐴀𐴝𐴙𐴅𐴧𐴙𐴝 𐴴 𐴲 / 𐴷 / 𐴴 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝 𐴸 / 𐴰 𐴱 / 𐴲 𐴲 𐴰 𐴲 𐴐𐴤𐴡𐴕𐴞 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴀𐴡𐴏𐴞𐴕𐴧𐴡 𐴔𐴝𐴙𐴕𐴐𐴤𐴡𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 , 𐴀𐴟𐴑𐴤𐴞𐴘𐴝 𐴹 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴈𐴡𐴁𐴡𐴌𐴡𐴏𐴃𐴝𐴕 𐴎𐴞𐴘𐴝𐴌𐴡𐴃 𐴒𐴡𐴙𐴃𐴧𐴤𐴡 𐴒𐴞𐴘𐴠𐴊𐴠 𐴉𐴟𐴖𐴝 𐴀𐴠𐴑 𐴎𐴡𐴕 𐴑𐴞𐴋𐴕𐴝𐴂𐴢 𐴒𐴡𐴌𐴥𐴞 𐴓𐴡𐴘 𐴎𐴝𐴘 𐴁𐴦𐴝𐴊𐴠 , 𐴉𐴟𐴖𐴝𐴌 𐴁𐴝𐴉𐴢 𐴔𐴝𐴣 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞 𐴘𐴠 𐴊𐴞𐴀𐴞 𐴉𐴝𐴌𐴞𐴁𐴤𐴝𐴌 𐴐𐴤𐴡𐴔𐴁𐴡𐴁 𐴕𐴡 𐴀𐴥𐴡𐴀𐴡𐴊𐴠 𐴀𐴥𐴠𐴊𐴦𐴟𐴕 𐴄𐴞𐴛𐴝 𐴔𐴝𐴒𐴠𐴀𐴠𐴌 𐴱𐴱

𐴉𐴟𐴖𐴝 𐴀𐴥𐴞𐴁𐴝 𐴱 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴅𐴞 𐴶 𐴁𐴡𐴓𐴡𐴑𐴡𐴃 𐴃𐴤𐴝𐴑𐴠𐴊𐴠 / 𐴊𐴞𐴓 𐴔𐴟𐴇𐴝𐴔𐴧𐴡𐴊𐴡𐴌 𐴉𐴟𐴖𐴝 , 𐴑𐴞𐴋𐴕𐴝𐴂𐴢 𐴒𐴡𐴙𐴅𐴧𐴤𐴙𐴝 𐴉𐴟𐴖𐴝𐴌 𐴁𐴝𐴉𐴢 / 𐴊𐴞𐴓 𐴔𐴟𐴇𐴝𐴔𐴧𐴡𐴊𐴠 𐴈𐴡𐴘𐴧𐴠𐴊𐴠 ” 𐴀𐴡𐴑𐴄𐴟𐴁𐴡𐴌𐴡𐴌 𐴷 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴞𐴀𐴞𐴕𐴧𐴝 , 𐴀𐴝𐴣𐴀𐴝𐴌 𐴉𐴟𐴖𐴝 𐴖𐴥𐴝 𐴹 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴈𐴡𐴁𐴡𐴌𐴡𐴏𐴃𐴝𐴕 𐴎𐴞𐴘𐴝𐴌𐴡𐴃 𐴒𐴡𐴙𐴃𐴧𐴤𐴡 𐴒𐴞𐴘𐴠𐴊𐴠 , 𐴸 𐴁𐴝𐴎𐴠𐴀𐴠𐴌𐴊𐴧𐴠 𐴀𐴥𐴟𐴊𐴧𐴝 𐴒𐴤𐴡𐴌𐴡𐴃 𐴕𐴡𐴀𐴡 𐴉𐴡𐴣𐴀𐴡𐴏𐴠 , 𐴀𐴝𐴣𐴀𐴝𐴌𐴝 𐴉𐴟𐴖𐴝𐴌𐴥𐴠 𐴎𐴠𐴊𐴧𐴤𐴟𐴌 𐴃𐴟𐴖𐴝𐴘 𐴉𐴝𐴌𐴞 𐴃𐴟𐴖𐴝𐴘 𐴉𐴥𐴠𐴓𐴥𐴝𐴘𐴧𐴞 𐴱𐴱

𐴀𐴡𐴕𐴟𐴔𐴝𐴕𐴞𐴑 𐴱 𐴱 𐴁𐴝𐴎𐴠 𐴈𐴡𐴊𐴦𐴟𐴕 𐴔𐴝𐴙𐴕𐴐𐴤𐴠 𐴉𐴥𐴟𐴕 𐴒𐴡𐴌𐴥𐴞 𐴈𐴡𐴘𐴧𐴠𐴊𐴠 ” 𐴃𐴡𐴌 𐴉𐴟𐴖𐴝 𐴔𐴡𐴕𐴏𐴦𐴟𐴌𐴡 𐴌𐴠 𐴇𐴥𐴝𐴘𐴅𐴤𐴠𐴑 𐴒𐴡𐴙𐴅𐴧𐴤𐴙𐴠 , 𐴌𐴠𐴇𐴥𐴝𐴘 𐴄𐴞𐴛𐴝 𐴰 𐴰 𐴰 𐴰 𐴰 𐴱 𐴀𐴠𐴑 𐴓𐴝𐴑 𐴄𐴞𐴛𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴕𐴡𐴀𐴡𐴘𐴓𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴟𐴔 𐴁𐴡𐴓𐴞 𐴊𐴞𐴓 𐴔𐴟𐴇𐴝𐴔𐴧𐴡𐴊𐴠 𐴈𐴡𐴘𐴧𐴠 , 𐴇𐴥𐴡𐴌𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴀𐴝𐴣𐴀𐴝𐴌 𐴉𐴟𐴖𐴝𐴌𐴠 𐴘𐴥𐴡 𐴔𐴡𐴌 𐴓𐴡𐴘 𐴉𐴥𐴟𐴕𐴡𐴃 𐴈𐴡𐴃𐴤𐴝 𐴈𐴟𐴖𐴝 𐴁𐴝𐴘𐴧𐴠 𐴱𐴱

𐴉𐴟𐴖𐴝 𐴘𐴠 𐴈𐴡𐴘𐴧𐴠𐴊𐴠 ” 𐴈𐴡𐴊𐴦𐴟𐴕 𐴔𐴝𐴙𐴕𐴐𐴤𐴙𐴠 𐴀𐴝𐴣𐴀𐴝𐴌𐴠 ( 𐴏𐴞 𐴀𐴠𐴕 𐴅𐴞 ) 𐴒𐴝𐴌𐴥𐴞 𐴁𐴤𐴡𐴌𐴞 𐴀𐴝𐴕𐴥𐴞 𐴌𐴟𐴔 𐴀𐴟𐴒𐴧𐴤𐴗𐴝𐴌 𐴁𐴤𐴟𐴃𐴡𐴌𐴠 𐴁𐴝𐴣𐴊𐴞 𐴌𐴝𐴙𐴑𐴧𐴤𐴙𐴠 , 𐴀𐴝𐴣𐴀𐴝𐴌𐴠 𐴁𐴠𐴐𐴤𐴞 𐴋𐴡𐴌 𐴓𐴝𐴒𐴝𐴀𐴝𐴌 𐴊𐴤𐴡𐴔𐴑𐴞 𐴊𐴠𐴀𐴠𐴌 𐴁𐴡𐴓𐴞 𐴉𐴟𐴖𐴝 𐴘𐴠 𐴈𐴡𐴘𐴧𐴠 , 𐴇𐴥𐴡𐴌𐴡𐴕 𐴒𐴡𐴙𐴅𐴧𐴤𐴙𐴝 𐴉𐴟𐴖𐴝𐴌 𐴁𐴝𐴉𐴠 , 𐴇𐴥𐴡𐴌𐴡𐴕 𐴒𐴡𐴌𐴥𐴞 𐴏𐴞 𐴀𐴠𐴕 𐴅𐴞 𐴁𐴤𐴡𐴌𐴞 𐴊𐴟𐴌𐴥𐴠 𐴓𐴡𐴘 𐴎𐴝𐴘 𐴏𐴥𐴞𐴌𐴝 𐴌𐴟𐴔𐴡𐴌 𐴁𐴤𐴟𐴃𐴡𐴌𐴠 𐴁𐴝𐴣𐴊𐴞 𐴌𐴝𐴙𐴑𐴧𐴤𐴙𐴠𐴊𐴠 , 𐴘𐴝𐴀𐴝𐴕𐴡𐴌 𐴎𐴡𐴌𐴞𐴘𐴝 𐴁𐴟𐴎𐴤𐴝 𐴎𐴝𐴀𐴝𐴌𐴊𐴧 𐴇𐴥𐴝𐴘𐴅𐴞𐴑𐴡𐴌 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕𐴡𐴃 𐴊𐴠𐴐𐴡𐴙𐴃𐴧 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴔𐴞𐴛𐴝𐴘𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴁𐴟𐴎𐴠𐴀𐴠𐴌 𐴱𐴱

𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴠 𐴔𐴦𐴝𐴔𐴠𐴓𐴝 𐴊𐴦𐴝𐴙𐴌 𐴒𐴡𐴌𐴠𐴀𐴠𐴌𐴊𐴧𐴠 𐴀𐴡𐴑𐴃𐴤𐴡 𐴉𐴡𐴙𐴅𐴧𐴡𐴕𐴃𐴡 𐴉𐴟𐴖𐴝𐴌 𐴀𐴟𐴃 𐴈𐴥𐴡𐴁𐴡𐴌 𐴉𐴝𐴀𐴝 𐴕𐴥𐴡 𐴎𐴝𐴀𐴝 , 𐴀𐴝𐴌 𐴀𐴝𐴘𐴅𐴤𐴡 𐴉𐴡𐴙𐴅𐴧𐴡𐴕𐴃𐴡 𐴇𐴥𐴡𐴑𐴟𐴔𐴡𐴃𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴕𐴡𐴀𐴡 𐴒𐴡𐴌𐴥𐴠 𐴱𐴱

Sources : Rohingyakhobor.com