𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴒𐴟𐴓𐴞 𐴔𐴝𐴌𐴞 𐴉𐴟𐴖𐴝 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝𐴃 𐴁𐴝𐴓𐴟 𐴈𐴥𐴝𐴓𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴸 𐴱 𐴁𐴡𐴓𐴡𐴑 𐴀𐴠𐴆-𐴲 𐴵 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴔𐴡𐴚𐴒𐴡𐴓 𐴁𐴝𐴌𐴠 , 𐴀𐴡𐴏𐴞𐴕𐴧𐴡 𐴈𐴥𐴡𐴌𐴝𐴁 𐴔𐴝𐴙𐴕𐴐𐴡𐴌 𐴋𐴝𐴀𐴝𐴘𐴧𐴠 𐴒𐴟𐴓𐴞 𐴔𐴝𐴌𐴞 𐴔𐴝𐴘𐴧𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴀𐴝𐴌 𐴈𐴡𐴊𐴦𐴟𐴕 𐴒𐴤𐴝𐴙𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴡𐴙𐴅𐴧𐴤𐴙𐴠 𐴊𐴠 𐴔𐴝𐴘𐴧𐴝 𐴉𐴟𐴖𐴝 𐴀𐴥𐴞𐴁𐴤𐴝 , 𐴑𐴠𐴀𐴠𐴔𐴡𐴃 𐴕𐴞𐴎𐴡𐴌 𐴑𐴤𐴟𐴐𐴠 𐴘𐴠 𐴈𐴥𐴠𐴊𐴔𐴡𐴃 𐴒𐴡𐴌𐴥𐴠 𐴊𐴠 𐴁𐴤𐴡𐴓𐴡𐴕𐴄𐴞𐴘𐴝𐴌 / 𐴔𐴟𐴇𐴝𐴔𐴧𐴡𐴊 𐴘𐴝𐴏𐴞𐴕𐴡𐴌 𐴎𐴤𐴞𐴀𐴞 𐴃𐴡𐴏𐴉𐴞𐴘𐴝 𐴁𐴡𐴐𐴢 𐴸 𐴁𐴡𐴏𐴥𐴡𐴌 𐴁𐴡𐴓𐴞 𐴎𐴝𐴕𐴝𐴀𐴝 𐴒𐴞𐴘𐴠 , 𐴀𐴥𐴠 𐴒𐴤𐴡𐴄𐴡𐴕𐴡𐴃 𐴀𐴠𐴑𐴧𐴟𐴀𐴞 𐴑𐴠𐴀𐴠𐴔𐴡𐴌 / 𐴋𐴞𐴓 𐴑𐴝𐴘𐴠𐴏𐴢 𐴕𐴝𐴔𐴡𐴌 𐴔𐴝𐴘𐴧𐴝 𐴀𐴠𐴑 𐴎𐴡𐴕 𐴀𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴉𐴟𐴓𐴞𐴐𐴠 𐴈𐴡𐴘𐴧𐴠 𐴊𐴠 𐴔𐴡𐴎𐴞𐴕 , 𐴈𐴥𐴡𐴌𐴝𐴁 𐴔𐴝𐴙𐴕𐴐𐴡𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 , 𐴊𐴝𐴌𐴟𐴓 𐴀𐴟𐴓𐴟𐴔 𐴕𐴡𐴊𐴖𐴡𐴃𐴟𐴓 𐴀𐴟𐴓𐴡𐴔𐴝 𐴀𐴞𐴏𐴓𐴝𐴔𐴞𐴘𐴝 𐴔𐴡𐴊𐴡𐴌𐴡𐴏𐴝 𐴀𐴝𐴌 𐴘𐴝𐴏𐴞𐴕𐴡𐴌 𐴒𐴤𐴡𐴌𐴡𐴃 𐴀𐴝𐴣𐴊𐴤𐴝𐴊𐴤𐴟𐴕 𐴒𐴟𐴓𐴞 𐴔𐴝𐴌𐴝𐴀𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴎𐴞𐴘𐴝𐴕𐴡𐴌 𐴏𐴥𐴡𐴁𐴡𐴁𐴠 𐴉𐴟𐴌𐴝 𐴑𐴠𐴀𐴠𐴔𐴡𐴃 𐴋𐴡𐴌 𐴉𐴥𐴡𐴘𐴓𐴝𐴘 𐴒𐴞𐴘𐴠 𐴒𐴤𐴡𐴘 𐴱𐴱

𐴀𐴥𐴠𐴃𐴡𐴑𐴧𐴡𐴕𐴡𐴃 / 𐴃𐴡𐴏𐴉𐴞𐴘𐴝 𐴀𐴝𐴌 𐴊𐴞𐴓𐴑𐴝𐴘𐴠𐴏𐴢 𐴊𐴟𐴕𐴥𐴞 𐴎𐴡𐴕 𐴒𐴤𐴡𐴌𐴒𐴟𐴐𐴧𐴞𐴌 𐴉𐴥𐴟𐴣𐴖𐴝𐴣𐴃𐴞 𐴊𐴤𐴝𐴘𐴁𐴡 𐴒𐴤𐴡𐴙𐴓𐴧𐴝 𐴏𐴠𐴐𐴃𐴝 𐴒𐴡𐴌𐴠𐴀𐴠𐴌 𐴊𐴠 𐴐𐴤𐴡𐴣𐴀𐴡𐴃 𐴒𐴟𐴓𐴞 𐴉𐴡𐴌𐴞 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴀𐴥𐴞𐴃𐴝𐴌𐴝𐴌𐴠 𐴅𐴤𐴡𐴄 𐴉𐴡𐴄 𐴑𐴝𐴑𐴏𐴡 𐴁𐴝𐴎𐴝𐴌 𐴏𐴥𐴡𐴊𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴒𐴞𐴘𐴠 , 𐴋𐴞𐴘𐴟𐴄𐴞𐴃 𐴀𐴝𐴏𐴥𐴠𐴊𐴠 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴠 𐴔𐴟𐴀𐴝𐴘𐴕𐴝 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴦𐴝𐴊𐴠 / 𐴃𐴡𐴏𐴉𐴞𐴘𐴝 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴈𐴡𐴘𐴧𐴠 , 𐴀𐴝𐴌 𐴊𐴞𐴓 𐴑𐴝𐴘𐴠𐴏𐴢 𐴀𐴠𐴈𐴥𐴡𐴕 𐴇𐴥𐴝𐴐𐴉𐴝𐴃𐴝𐴓𐴡𐴃 𐴀𐴠𐴓𐴝𐴅𐴡𐴃 𐴀𐴝𐴏𐴥𐴠 𐴱𐴱

𐴀𐴟𐴑𐴤𐴞𐴘𐴝 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴀𐴡𐴉𐴥𐴞𐴏𐴝𐴌 𐴀𐴞𐴕𐴐𐴝𐴀𐴝𐴌𐴅 ( 𐴀𐴡 𐴏𐴞 ) 𐴐𐴠𐴙𐴑 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 ! 𐴀𐴡𐴉𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴤𐴡𐴌𐴞𐴁𐴡𐴓𐴧𐴝 𐴉𐴟𐴓𐴞𐴐𐴢 𐴀𐴝𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴠𐴓𐴞𐴘𐴠𐴕 𐴔𐴞𐴓𐴞 𐴉𐴥𐴟𐴣𐴖𐴝𐴣𐴃𐴞 𐴑𐴝𐴌𐴖𐴝𐴘 𐴒𐴡𐴌𐴠𐴀𐴠𐴌 𐴁𐴡𐴓𐴞 𐴈𐴡𐴘𐴧𐴠 , 𐴃𐴡𐴏𐴉𐴞𐴘𐴝𐴌 𐴓𐴝𐴐𐴢 𐴂𐴦𐴟𐴏𐴄 𐴔𐴝𐴌𐴄𐴡𐴔 𐴒𐴡𐴌𐴥𐴞𐴁𐴡𐴓𐴧𐴝 , 𐴑𐴝𐴑𐴏𐴡 𐴁𐴝𐴎𐴝𐴌 𐴏𐴥𐴡𐴊𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴌 𐴔𐴟𐴌𐴊𐴝 𐴈𐴝𐴕𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴁𐴡𐴓𐴞 𐴘𐴥𐴡 ( 𐴀𐴡 𐴏𐴞 ) 𐴘𐴠 𐴈𐴡𐴘𐴧𐴠 𐴱𐴱

Sources : Dhakatribune